យោងទៅតាមប្រភពព័ត៌មានពីកាសែតអង់ គ្លេសដេលីម៉េលចេញផ្សាយកាលពីថ្ងៃចន្ទ ទី៦ កុម្ភៈ ឆ្នាំ២០១២បានឱ្យដឹងថា ក្រុមហ៊ុនផលិតយន្តហោះ Jet Embraer របស់ប្រទេសប្រេស៊ីលបានជួលតារាសម្តែងហុងកុងដ៏ល្បីឈិនឡុងឱ្យជួយផ្សព្វផ្សាយផលិតផលយន្តហោះរបស់ខ្លួនក្នុងទីផ្សារទ្វីបអាស៊ី ។ កិច្ចព្រមព្រៀងមួយត្រូវបានធ្វើឡើងតាមរយៈការលក់យន្តហោះទំនើបមួយគ្រឿងបញ្ចុះតម្លៃយ៉ាងទាបបំផុតទៅឱ្យលោកឈិន ឡុង ។ ក្រុមហ៊ុនផលិតយន្តហោះ Embraer បានប្រគល់យន្តហោះ Legacy 650 ឱ្យទៅតារាសម្តែងដែលកើតក្នុងទីក្រុងហុងកុងកាលពីថ្ងៃសៅរ៍ ក្នុងទីក្រុងសាវប៊ូឡូ ។
យន្តហោះនោះត្រូវបានលាបពណ៌រូបទង់ជាតិរបស់ប្រទេសចិននៅត្រង់កន្ទុយ និងលាបពណ៌រូបនាគនៅតួយន្តហោះ ។ លោកឈិន ឡុង ដែលជាឯកអគ្គរដ្ឋទូតរបស់ក្រុមហ៊ុនផលិតយន្តហោះប្រេស៊ីលនឹងទទួលផ្សព្វផ្សាយពាណិជ្ជកម្ម ដើម្បីធ្វើឱ្យក្រុមហ៊ុនទទួលបន្ទុកទទួលបានជោគជ័យ មិនត្រឹមតែទីផ្សារក្នុងប្រទេសចិនប៉ុណ្ណោះទេ តែសម្រាប់ពិភពលោកទាំងមូលតែម្តង ។
លោក Frederico Curado ប្រធានក្រុមហ៊ុនបាននិយាយថា ៖ ក្រុមហ៊ុនមានសង្ឃឹមយ៉ាងមុតមាំចំពោះតួនាទីរបស់លោកឈិនឡុងថា នឹងជួយឱ្យប្រជាពលរដ្ឋទ្វីបអាស៊ីយល់កាន់តែច្បាស់ពីគុណភាពផលិតផលរបស់ខ្លួន ។ បន្ទាប់ពិធីចុះហត្ថលេខារួចរាល់លោកឈិនឡុងបាននិយាយថា៖ វាគឺជាកិត្តិយសខ្លាំងណាស់ដែលខ្ញុំបានក្លាយទៅជាសមាជិកអ្នកប្រើប្រាស់យន្តហោះរបស់ក្រុម Embraer ។ លោកបានបន្តទៀតថា ខ្ញុំស្រឡាញ់យន្តហោះប្រភេទនេះណាស់ ពីព្រោះវាជាប្រភេទយន្តហោះដ៏ទំនើបមួយ ៕
ចែករំលែកព័តមាននេះ