ចរិតលក្ខណៈរបស់មនុស្សយើងម្នាក់ៗ កើតមានមិនដូចគ្នាទេ ដោយបុគ្គលខ្លះជាមនុស្សស្ងៀមស្ងាត់ ចំណែកឯបុគ្គលខ្លះទៀតជាមនុស្សរួសរាយរាក់ទាក់ចូលចិត្តជជែក មិនចូលចិត្តលាក់បញ្ហាដែលកើតមានក្នុងចិត្ត ។ ប៉ុន្តែបើសិនជាថ្ងៃណាមួយបុគ្គលដែលចូលចិត្តនិយាយច្រើននេះបែរជាលែងចង់និយាយស្តីប្រែទៅជាស្ងៀមស្ងាត់នោះ អ្នកដែលនៅជុំវិញខ្លួនងាយនឹងមើលដឹងថា បុគ្គលប្រភេទនេះ កំពុងមានបញ្ហាខុសប្លែកពីបុគ្គលដែលស្ងៀមស្ងាត់ពីកំណើត ដែលទោះបីជាមានបញ្ហាអ្វីក៏បុគ្គលប្រភេទនេះមិនមានអ្នកដឹងច្បាស់អំពីបញ្ហារបស់គេនោះដែរ ។
លោកវេជ្ជបណ្ឌិតយឹម សុបុត្រា អ្នកឯកទេសវិកលវិទ្យា នៃគ្លីនិកសាន់ រ៉ាយ បានមានប្រសាសន៍ឱ្យដឹងថា លក្ខណៈធម្មតារបស់មនុស្សម្នាក់ៗ គឺមានអាកប្បករិយាខុសប្លែកពីគ្នា ដោយបុគ្គលខ្លះមានទំនាក់ទំនងនឹងសង្គមខាងក្រៅច្រើន ហើយបុគ្គលប្រភេទនេះជាបុគ្គលមានការជជែកនិយាយលេង អាចបញ្ចេញយោបល់អាចផ្តោះផ្តងរាល់សកម្មភាពទាំងឡាយ ឬក៏បញ្ហាទាំងឡាយជាមួយមិត្តភក្តិ ជាមួយមហាជនដែលនៅជុំវិញខ្លួន ។ បុគ្គលប្រភេទនេះមិនមែនជាបុគ្គលស្ងៀមស្ងាត់នោះទេ ជាបុគ្គលដែលអាចជជែក អាចនិយាយដែលមានលក្ខណៈបើកចំហដែលអាចវែកញែក អាចបញ្ចេញយោបល់ ទៅអ្នកដែលនៅជុំវិញខ្លួន ។ រីឯបុគ្គលមួយទៀតជាបុគ្គលដែលស្ថិតនៅក្នុងអាកប្បករិយាស្ងៀមស្ងាត់ដែលមានតាំងពីកំណើតមក ។ បុគ្គលប្រភេទនេះមិនសូវជាមានពាក្យសម្តី ឬក៏មិនសូវមានទំនាក់ទំនងខាងក្រៅច្រើននោះទេ ដោយសារតែបុគ្គលប្រភេទនេះចូលចិត្តអ្វីដែលជាភាពស្ងៀមស្ងាត់ ដោយមិនបញ្ចេញមតិយោបល់ទាំងឡាយឱ្យអ្នកដទៃបានដឹងច្រើនឡើយ ទោះបីជាចូលរួមនៅក្នុងកម្មវិធី ឬក៏ព្រឹត្តការណ៍សង្គមក៏ដោយ ។
ប្រសិនបើនិយាយពីបុគ្គលដែលមានលក្ខណៈមួយទៀតគឺមានទំនាក់ទំនងទៅនឹងចិត្តសាស្ត្រ ឬទំនាក់ទំនងទៅនឹងបញ្ហាផ្លូវចិត្ត ជួនកាលបើសិនជាលោកអ្នកមិនមែនជាអ្នកជំនាញ ទៅប្រាស្រ័យទាក់ទងជាមួយបុគ្គលប្រភេទនេះ ដោយមិនបានវិភាគ មិនបានសាកសួរត្រឹមត្រូវ លោកអ្នកមិនអាចដឹងថា បុគ្គលនេះមានបញ្ហាផ្លូវចិត្តនោះទេ លុះត្រាតែអ្នកជំនាញ អ្នកឯកទេសវិកលវិទ្យាទើបអាចដឹងថា បុគ្គលស្ងៀមស្ងាត់ប្រភេទនេះមិនមែនជាបុគ្គលធម្មតា គឺជាបុគ្គលដែលអាចមានបញ្ហាជំងឺផ្លូវចិត្ត ៕
ចែករំលែកព័តមាននេះ