ខេត្តបាត់ដំបង ៖ ជនទំនើងមួយក្រុមត្រូវបានសមត្ថកិច្ចឃាត់ខ្លួនក្រោយពីពួកគេផឹកស៊ីស្រវឹងធ្លាក់ភ្លែក ហើយច្បាំងគ្នាបែកផ្សែងផ្អើលភ្ញៀវនៅក្នុងអាហារដ្ឋានមួយយីហោ«ម្លប់អំពិល»ដែលស្ថិតនៅក្នុងភូមិរំចេក៣ សង្កាត់រតនៈ ក្រុងបាត់ដំបង កាលពីវេលាម៉ោង៥និង៣០នាទីល្ងាចថ្ងៃទី៦កុម្ភៈ។ ប៉ុន្តែអ្វីដែលធ្វើឱ្យមានការភ្ញាក់ផ្អើលកាន់តែខ្លាំងនោះនៅពេលដែលគេឃើញក្រុមជនទំនើង ជាពិសេសប្ដី ប្រពន្ធមួយគូដែលទើបរៀបការរួចថ្មីថ្មោងបានស្រែកតិះដៀលសមត្ថកិច្ចកប់ៗមាត់ ក្នុងគ្រាដែលកម្លាំងសមត្ថកិច្ចចុះជួយអន្តរាគមន៍ ។
លោកអនុសេនីយឯកគឹម ពន្លក ប្រធានក្រុមបង្ការបង្ក្រាបកម្លាំងនគរបាលព្រហ្មទណ្ឌខេត្តដែលបានដឹកនាំកម្លាំងចុះអន្តរាគមន៍លើករណីនេះបាននិយាយថា ជម្លោះនោះបានកើតឡើងនៅក្នុងក្រុមតែមួយ ដែលម្នាក់ៗមានប្រឡាក់ឈាមពេញខ្លួន ។ លោកបន្តថា ដោយឃើញពួកគេមានឈាមប្រឡាក់គ្រប់ៗគ្នាបែបនេះទើបសមត្ថកិច្ចយើងសួរនាំអំពីមូលហេតុ តែត្រូវពួកគេឆ្លើយតបដោយសំដីស្រែកតិះដៀលសមត្ថកិច្ចវិញយ៉ាងចាស់ដៃ និងចង្អុលមុខសមត្ថកិច្ចស្ទើរដល់ថ្ងាស ជាពិសេសស្ត្រីម្នាក់ និងបុរសម្នាក់ដែលពួកគេអះអាងថា ជាប្ដីប្រពន្ធនឹងគ្នាដែលទើបរៀបការរួចថ្មីថ្មោង ។ ស្ថិតក្នុងស្ថានភាពបែបនេះទើបលោកស្នងការបញ្ជាឱ្យនាំខ្លួនពួកគេទាំងអស់យកទៅកាន់ស្នងការដ្ធានខេត្តដើម្បីសួរនាំ ។
លោកមៀន ឡាយ នាយការិយាល័យនគរបាលព្រហ្មទណ្ឌកម្រិតស្រាលខេត្តបានឱ្យដឹងថា ក្រុមជនទំនើងទាំង៦នាក់រួមមាន១-ឈ្មោះពុទ្ធ សុទិតសា ភេទប្រុស អាយុ២២ឆ្នាំ ២-ឈ្មោះសែម ស្រីភា ភេទស្រី អាយុ២៦ឆ្នាំ ទាំង២នាក់នេះជាប្ដីប្រពន្ធទើបរៀបការរួច ៣-ឈ្មោះសោម កញ្ញា ភេទស្រី អាយុ២៤ឆ្នាំ បម្រើការនៅហាងខារ៉ាអូខេអាស៊ានក្លឹប ៤-ឈ្មោះហួត សុផៃ ភេទប្រុស អាយុ១៨ឆ្នាំ ជាសិស្ស ៥-ឈ្មោះសែម សាមឿន ភេទប្រុស អាយុ២២ឆ្នាំ ៦-ឈ្មោះភិន សំបូរ ភេទប្រុស អាយុ១៨ឆ្នាំ ទាំង២នាក់នេះជាកម្មករសំណង់ ។ លោកនាយការិយាល័យរូបនេះបានបន្តថា ក្រុមនេះត្រូវបានលោកស្នងការនិងលោកព្រះរាជអាជ្ញាបញ្ជាឱ្យឃាត់ខ្លួន ហើយកសាងសំណុំរឿង ដើម្បីបញ្ជូនទៅតុលាការ ។
ក្នុងគ្រានោះមនុស្សរាប់រយនាក់បានចោមរោមមើលកកស្ទះពេញផ្លូវ ។ រីឯម្ចាស់ហាងបានចាក់សោរបងមិនឱ្យក្រុមជនទំនើងចេញឡើយព្រោះពួកគេបានវាយកែវបែកខ្ទេចខ្ទីអស់គ្មានសល់ ។ នៅពេលដែលកំលាំងសមត្ថកិច្ចចូលដល់ក្នុងហាងដើម្បីសួរនាំជនបង្កហេតុ ស្រាប់តែគេឃើញឈ្មោះសុទិតសា និងស្រ្តីឈ្មោះស្រីភា បានស្រែកដៀលសមត្ថកិច្ចថា «ខ្លាចអីអាប៉ូលិសអស់នេះ វាគ្មានបានការអីទេ វាមានសិទ្ធិអីមកចាប់អញ ។ ជាមួយគ្នានោះជន២នាក់នេះដែលអះអាងថា ជាប្ដីប្រពន្ធនិងគ្នាទើបរៀបការរួចនោះបានចង្អុលមុខសមត្ថកិច្ចស្ទើរដល់ៗថ្ងាស ខណៈដែលសមត្ថកិច្ចបានព្យាយាមអត់ធ្មត់ស្ទើរទប់មិនបាន ។
រីឯអ្នកស្រីនាក់ ជា អាយុ៤៧ឆ្នាំ ដែលជាម្ចាស់ហាងបាននិយាយថា ពេលពួកគេឈ្លោះប្រកែកគ្នាអ្នកស្រីមិនបានដឹងទេ តែបានដឹងនៅពេលពួកគេប្រទាញប្រទង់គ្នាដែលម្នាក់ៗមានឈាមប្រឡាក់ពេញខ្លួនហើយកែវបែកខ្ទេចខ្ទីអស់ ។ អ្នកស្រីបន្តថា ឃើញដូច្នេះកូនចៅអ្នកស្រីក៏ទាញរបងបិទចាក់សោរួចរាយការណ៍ប្រាប់មេភូមិ ហើយមេភូមិក៏ប្ដឹងបន្តទៅសមត្ថកិច្ចភ្លាមដែរ ។
ពេលបញ្ជូនដល់ការិយាល័យសមត្ថកិច្ច ជនទំនើងឈ្មោះពុទ្ធ សុទិតសា បាននិយាយប្រាប់សមត្ថកិច្ចថា ខ្លួនទើបតែផឹកស្រាបៀរអស់ជិតកន្លះកេសប៉ុណ្ណោះ ដោយខឹងប្រពន្ធនិយាយឌឺដងច្រើនពេកក៏ទាញកែវវាយក្បាលខ្លួនឯងតែម្ដង ដែលបណ្ដាលឱ្យមុតស្ទើរសុសក្បាលហូរឈាមជោក ប៉ុន្តែមិនបង្កជម្លោះជាមួយអ្នកដទៃនោះ ទេ ។ រីឯនាងជាប្រពន្ធថ្មីថ្មោងបាននិយាយដែរ ថា ដោយសារចង់ផឹកស៊ីសប្បាយជាមួយមិត្តភក្ដិទើបបបួលគ្នាមកផឹកស៊ីនៅហាងខាងលើនេះតែមិនដឹងថាវាមានរឿងបែបនេះទេ ។ បើតាមការបំភ្លឺពីឈ្មោះសោម កញ្ញា ដែលនៅផឹកស៊ីជាមួយគ្នាបានប្រាប់ថា ឈ្មោះសុទិតសា ខឹងនិងប្រពន្ធនិយាយច្រើន ហើយបែបតូចចិត្តនិងឪពុក ម្ដាយខាងស្រីមិនសូវចូលចិត្តខ្លួនផងក៏ទាញកែវវាយក្បាលខ្លួនឯង ។ សាក្សីរូបនេះបានបញ្ជាក់ថា ពួកគេយកកែវក្នុងក្យូសខ្លួនឯងវាយក្បាលបែកឈាមកក្លាក់អស់ហើយរត់ទៅយកកែវក្នុងក្យូសគេមកវាយទៀត ហើយពួកនាងដែលនៅទីនោះជួយចាប់ទើបប្រឡាក់ឈាមគ្រប់ៗគ្នាបែបនេះ ។
ទោះជាបែបណាក្រុមនេះពេលនាំដល់ស្នងការហើយនៅតែស្រែកតិះដៀលសមត្ថកិច្ចមួយប្រាវទៀត ប៉ុន្តែក្រោយមកបានបង្ហាញពីចរិតស្លូតគួរឱ្យអាណិតពេលសមត្ថកិច្ចបញ្ជូនចូលទ្រុងសារិកានាយប់នោះ ។ លោកជេត វណ្ណនី ស្នងការរងខេត្តបានមានប្រសាសន៍ថា ក្នុងសកម្មភាពជាក់ស្ដែងក្រុមនេះព្រហើនណាស់ ។ ក្រុមនេះបានបង្កឱ្យមានភាពចលាចលក្នុងមូលដ្ឋាន ហើយមើលងាយកងកម្លាំងសមត្ថកិច្ចពេលបំពេញភារកិច្ចទៀត ។ លោកបញ្ជាក់ថា ដោយសារបែបនេះទើបលោកស្នងការនគរបាលខេត្ត និងលោកព្រះរាអាជ្ញាបញ្ជាឱ្យឃាត់ខ្លួនពួកគេកសាងសំណុំរឿងបញ្ជូនទៅតុលាការដើម្បីឱ្យភ្លឺភ្នែកម្តង ៕
ចែករំលែកព័តមាននេះ