យោងទៅតាមប្រភពព័ត៌មានស៊ីន ហួចេញផ្សាយកាលពីថ្ងៃចន្ទ ទី៦ កុម្ភៈ ឆ្នាំ២០១២ បានឱ្យដឹងថា ក្លឹប Sevilla បានសម្រេចបណ្តេញគ្រូបង្វឹកលោក Marcelino Garcia ចេញពីតំណែង បន្ទាប់ពីក្លឹបនេះប្រកួតចាញ់ Villarreal 2-1 ក្នុងផ្ទះ ហើយជាពិសេសទៅទៀតនោះ គឺក្លឹបកំពុងតែរអិលធ្លាក់ពីតំបន់លេងយូហ្វាខាប់មកដល់លេខរៀងទី១១ក្នុងតារាង ។ ក្រៅពីការដឹកនាំក្លឹបមិនបានល្អលោក Marcelino Gracia ក៏ត្រូវបានទទួលរងការរិះគន់ខ្លាំងៗផងដែរ ពីមន្ត្រីក្លឹប និងអ្នកគាំទ្រមួយចំនួនដោយរងការចោទប្រកាន់ថា លោកមិនមានការកែប្រែប្រព័ន្ធលេង បើទោះជាដឹងថា ប្រព័ន្ធនោះមិនបានជោគជ័យក៏ដោយ លើសពីនេះទៀតគឺលោកគ្មានទំនាក់ទំនងល្អជាមួយកីឡាករ។
បន្ទាប់ពីបណ្តេញគ្រូបង្វឹករូបនេះចេញ ក្លឹប Sevilla មិនទាន់បានប្រកាសតែងតាំងគ្រូបង្វឹកថ្មីមកជំនួសតំណែងនេះនៅឡើយទេ តែលោក Michel Gonzaloz អតីតគ្រូបង្វឹកក្លឹប Getafe ប្រហែលជាអាចចូលមកអង្គុយកៅអីនេះ ។ ជាការកត់សម្គាល់លោក Marcelino គឺជាគ្រូបង្វឹកទី៨ហើយដែលត្រូវបានបណ្តេញចេញពីក្លឹបបាល់ទាត់ក្របខណ្ឌអេស្ប៉ាញព្រីមេរ៉ាលីហ្គាគិតមកដល់ជុំទី២១នេះ ហើយអាចនឹងមានការដេញគ្រូបង្វឹកមួយចំនួនទៀតជាបន្តបន្ទាប់រហូតទៅដល់ចប់រដូវកាល ៕
ចែករំលែកព័តមាននេះ