ជនជាតិជប៉ុនជាច្រើនសែននាក់ បានចូលរួមក្នុងពិធីដង្ហែក្បួនអវយវៈភេទបុរស-ស្ត្រីនៅទូទាំងប្រទេស និងរៀបចំយ៉ាងធំនៅឯរោងអ្នកតា «ថាកាតា» ក្នុងទីក្រុងហ្គោម៉ាគី ដោយមានសែងឈើចម្លាក់អវយវៈភេទបុរសប្រវែងពី២-៦,៥ហ៊្វូត (ប្រហែលពី០,៦-១,៩៥ម៉ែត្រ ) បន្ទាប់មកក៏ដង្ហែអវយវៈភេទស្រីនៅពេលរសៀល ។ ក្រៅពីនេះ ក្នុងពិធីខាងលើក៏មានលក់អាហារ និងវត្ថុអនុស្សាវរីយ៍មានរូបរាងដូចអវយវៈភេទសម្រាប់ជ្រើសរើសដូចជាទៀន និងវត្ថុចម្លាក់ជាអវយវៈភេទគួរឱ្យពេញនិយមជាច្រើនទៀត ។
របាយការណ៍បញ្ជាក់ថា ពិធីដង្ហែអវយវៈ ភេទបុរស-ស្ត្រីនៅជប៉ុននេះ គឺជាលក្ខណៈប្រពៃណីតាំងពីបុរាណមក ហើយបច្ចុប្បន្នមានអត្ថន័យប្រៀបដូចទៅនឹងការបួងសួងដល់ប្រជាជនជប៉ុនឱ្យមានបុត្រកាន់តែច្រើន ខណៈពេលប្រទេសកំពុងស្ថិតនៅក្នុងវិបត្តិកង្វះប្រជាជន ។ ការដង្ហែអវយវៈភេទស្រី ក៏ចាត់ទុកថាជាការបួងសួងដល់វត្ថុស័ក្តិសិទ្ធិនៃការសម្បូរធនធានម្ហូបអាហារ ហើយឪពុកម្តាយក៏មានការតុបតែងកាយដ៏ពិសេស រួមទាំងធ្វើការបួងសួងសុំអ្នកស្នងបន្តពូជពង្ស ព្រមទាំងទទួលទានគ្រឿងស្រវឹង ផ្សេងៗផងដែរ ។
អ្នកជំនាញជនជាតិជប៉ុនបញ្ជាក់ថា ពិធីដង្ហែក្បួនខាងលើមានប្រភពដើមពីជំនឿតាំងពីបុរាណរបស់ជប៉ុនទាក់ទងនឹងការរីកធំធាត់ និងការអភិវឌ្ឍលើវត្ថុនានានៅលើពិភពលោក ហើយពិធីនេះតែងតែរៀបចំឡើងនៅដើមខែកុម្ភៈ ជារៀងរាល់ឆ្នាំ ៕
ចែករំលែកព័តមាននេះ