លោកសេប ប្ល៊េតធ័រ ប្រធានសហព័ន្ធបាល់ទាត់អន្តរជាតិ (FIFA) ប្រកាសថា នឹងប្រើអំណាចរបស់ខ្លួនប្រគល់សិទ្ធិដល់សមាគមបាល់ទាត់អេហ្ស៊ីប (EFA) ក្រោយពីរដ្ឋាភិបាលប្រទេសនេះបញ្ជាឱ្យឈប់បំពេញតួនាទីដោយផ្តល់ពីហេតុផល ដើម្បីទទួលខុសត្រូវលើហេតុការណ៍ចលាចលដែលបណ្តាលឱ្យមានអ្នកស្លាប់រហូតដល់៧៤នាក់ ។ ប្រធាន FIFA បានបញ្ជាក់ថា«ទិន្នន័យដែលទទួលបានបញ្ជាក់ពីចំនួនអ្នកស្លាប់រហូតដល់៧៤នាក់ហើយយើងក៏បានទទួលការបញ្ជាក់ក្នុងន័យស្រដៀងគ្នាថា រដ្ឋាភិបាលអេហ្ស៊ីបបានជ្រៀតជ្រែកដោយផ្ទាល់ក្នុងការប្រកាសរំសាយសមាគមបាល់ទាត់ EFA ។
លោកសេប ប្ល៊េតធ័រ ថ្លែងថា យើងនឹងចូលចាត់ចែងលើរឿងនេះ ចាប់ពីថ្ងៃទី៦ កុម្ភៈ ដូច្នេះសមាគមបាល់ទាត់អេហ្ស៊ីប នឹងមានសិទ្ធិចូលកាន់តួនាទីជាថ្មី ព្រោះពួកគេជាអង្គការទទួលខុសត្រូវលើការរៀបចំប្រកួត និងត្រូវដំណើរការបន្ត ។ គួរបញ្ជាក់ថា លោកសេប ប្លេ៊តធ័រ ធ្លាប់មានចំណាត់ការលើប្រទេសដែលរដ្ឋាភិបាលចូលជ្រៀតជ្រែកក្នុងមជ្ឈដ្ឋានបាល់ទាត់រួចមកហើយដោយនៅក្នុងឆ្នាំ២០០៨ លោកសេប ប្ល៊េតធ័រ បានកាត់ផ្តាច់សិទ្ធិប្រទេសប៉េរូ មិនឱ្យមានចំណែកចូលរួមក្នុងការប្រកួតបាល់ទាត់ ក្រោយពីរដ្ឋាភិបាលប្រកាសឱ្យបោះឆ្នោតលើតួនាទី លោកម៉ានូអេល ប៊័រហ្គា ជាប្រធានសហព័ន្ធបាល់ទាត់ គឺជារឿងខុសច្បាប់ ព្រោះជាករណីពុករលួយ ៕
ចែករំលែកព័តមាននេះ