រាជធានីភ្នំពេញ ៖ លោកខៀវ កាញារីទ្ធ រដ្ឋមន្រ្តីក្រសួងព័ត៌មាន បានបង្ហាញនូវការគាំទ្រយ៉ាងពេញទំហឹងចំពោះដំណើរការនៃការចេញផ្សាយរបស់ទស្សនាវដ្តីសេដ្ឋកិច្ចខ្មែរជាភាសាខ្មែរ និងភាសាចិន ដែលនឹងចាប់ផ្តើមលេខដំបូងប្រចាំខែរបស់ខ្លួននៅក្នុងខែមីនា ឆ្នាំ២០១២ នេះ។ ទស្សនាវដ្តីនេះ ក៏គ្រោងនឹងចេញផ្សាយនូវកាសែតជាភាសាខ្មែរ-ចិននៅក្នុងខែមិថុនា ខាងមុខនេះផងដែរ។
នៅពេលអនុញ្ញាតឲ្យគណៈប្រតិភូរបស់ទស្សនាវដ្តីសេដ្ឋកិច្ចខ្មែរចូលជួបសម្ដែងការគួរសមនៅទីស្តីការក្រសួងកាលពីថ្ងៃទី៦ កុម្ភៈ លោករដ្ឋមន្រ្តីដែលបានផ្អែកតាមរបាយការណ៍របស់ចាងហ្វាងការផ្សាយទស្សនាវដ្តីនេះស្តីពីធនធានមនុស្សរបស់ខ្លួននោះ បានសម្ដែងនូវក្តីសង្ឃឹមថា ដំណើរការចេញផ្សាយរបស់ទស្សនាវដ្តីនេះនឹងប្រព្រឹត្តទៅយ៉ាងល្អ ព្រោះតែបទពិសោធន៍ និងជំនាញច្បាស់លាស់នោះ។
លោកឆាវ អីុនទ័រ ចាងហ្វាងទស្សនាវដ្តីសេដ្ឋកិច្ចខ្មែរ បានជម្រាបជូនលោករដ្ឋមន្រ្តីថា ទស្សនាវដ្តីរបស់លោកនឹងផ្សព្វផ្សាយពីគោលនយោបាយរបស់រាជរដ្ឋាភិបាល និងការអភិវឌ្ឍកម្ពុជា និងគោរពតាមការណែនាំក៏ដូចជាបទបញ្ជារបស់ក្រសួងព័ត៌មាន ហើយធ្វើការចែកផ្សាយមិនយកថ្លៃ និងបានស្នើឱ្យមានការសហការពីក្រសួង ដើម្បីបង្កលក្ខណៈងាយស្រួលដល់ការចែកចាយនេះឲ្យបានរហូតដល់តំបន់ជនបទឆ្ងាយៗដែលអាចឲ្យប្រជាពលរដ្ឋបានដឹងបានយល់ពីគោលនយោបាយរាជរដ្ឋាភិបាល និងការអភិវឌ្ឍយ៉ាងលឿនរបស់ប្រទេសជាតិ ក៏ដូចជាអនុសាសន៍របស់ថ្នាក់ដឹកនាំទៅជូនប្រជាពលរដ្ឋផងដែរ។
ពាក់ព័ន្ធនឹងការសុំឲ្យមានការសហការជាមួយក្រសួងព័ត៌មាន ដើម្បីចែកផ្សាយទស្សនាវដ្តីសេដ្ឋកិច្ចខ្មែរ ដោយមិនគិតថ្លៃនេះ លោករដ្ឋមន្រ្តីបានឯកភាពដោយមានប្រសាសន៍ថា ក្រសួងព័ត៌មានក៏មានចេញផ្សាយនូវទស្សនាវដ្តីប្រចាំខែ ដែលមិនគិតថ្លៃ និងបានចែកជូននៅតាមស្ថាប័ននីតិបញ្ញត្តិ ស្ថាប័ននីតិប្រតិបត្តិ និងតាមបណ្តាខេត្ត ហើយនៅពេលដែលទស្សនាវដ្តីសេដ្ឋកិច្ចខ្មែរចេញផ្សាយ អាចយកមកប្រគល់ឲ្យក្រសួង ដើម្បីចែកផ្សាយដូចគ្នានេះដែរ។ ចំពោះបញ្ហាដែលថា នៅពេលដែលក្រុមហ៊ុននេះចេញផ្សាយកាសែតភាសាខ្មែរ និងភាសាចិននៅខែមិថុនា ហើយធ្វើការចែកផ្សាយមិនគិតថ្លៃដែរនោះ លោករដ្ឋមន្រ្តីបានផ្តល់ជាអនុសាសន៍ថា តាមបទពិសោធន៍នៅកម្ពុជា កាសែតដែលចែកផ្សាយមិនយកប្រាក់គឺគ្មានអតិថិជននោះទេ បើទោះបីជាកាសែតធំៗក៏នៅតែលក់ដើម្បីរក្សានូវកិត្យានុភាពរបស់ខ្លួនដែរ។ លោករដ្ឋមន្រ្តីបានផ្តល់អនុសាសន៍ឲ្យទស្សនាវដ្តីនេះ ធ្វើការលក់កាសែតក្នុងតម្លៃមួយទាបបំផុតវាល្អជាងការចែកផ្សាយ ដោយមិនគិតថ្លៃនោះ។
ទស្សនាវដ្តីសេដ្ឋកិច្ចខ្មែរស្ថិតនៅក្រោមការគ្រប់គ្រងរបស់ក្រុមហ៊ុន Khmer Resources Investment Holding Group Co.,ltd និង ក្រុមហ៊ុន Khmer First Coal Mining Group Co.,ltd ជាក្រុមហ៊ុនមកពីសាធារណរដ្ឋប្រជាមានិតចិន វិនិយោគលើវិស័យរុករករ៉ែនៅក្នុងខេត្តឧត្តរមានជ័យ ពោធិ៍សាត់ សៀមរាប ហើយ បច្ចុប្បន្នទំហំវិនិយោគដែលធំជាងគេគឺនៅខេត្តកោះកុង។ ក្រុមហ៊ុននេះបានចូលមកកម្ពុជា រយៈពេល៥ឆ្នាំមកហើយ ហើយនៅក្នុងរយៈពេល៥ឆ្នាំមកនេះ ក្រុមហ៊ុនបានធ្វើការសិក្សាលើគ្រប់វិស័យដែលទាក់ទងជាមួយកម្ពុជា ជាពិសេសលើការអភិវឌ្ឍវិស័យសេដ្ឋកិច្ច។
លោកឆាវ អីុនទ័រ បានថ្លែងថា មកដល់ពេលនេះដើមទុនរួមរបស់ក្រុមហ៊ុននេះ គឺមានលើសពី៥០០លានដុល្លារសហរដ្ឋអាមេរិក និងបានបញ្ជាក់ថា ការសម្រេចធ្វើវិនិយោគនៅកម្ពុជានេះ គឺអាស្រ័យដោយទំនាក់ទំនងកម្ពុជា-ចិនប្រៀបបានបងប្អូនជាមួយគ្នា។ ជាពិសេសស្ថិរភាពនយោបាយនៅកម្ពុជាមានលំនឹង នាំឲ្យមានជំនឿចិត្តចំពោះការបណ្តាក់ទុននេះ៕
ចែករំលែកព័តមាននេះ