រាជធានីភ្នំពេញ ៖ ចោរប្លន់ប្រដាប់អាវុធមួយក្រុមបានធ្វើសកម្មភាពចូលប្លន់ដល់ក្នុងលំនៅឋានប្រជាពលរដ្ឋទាំងថ្ងៃយកបានម៉ូតូស៊េរីទំនើបពីរគ្រឿង និងខ្សែ.កមាស១ខ្សែ ទម្ងន់៥ជី រួចនាំគ្នាជិះម៉ូតូគេចខ្លួនទៅបាត់ដោយ សុវត្ថិភាព ។ ហេតុការណ៍នោះបានកើតឡើងកាលពីវេលាម៉ោង១ និង៣០នាទីរសៀលថ្ងៃទី៦ កុម្ភៈ ឆ្នាំ២០១២ នៅក្បែររបងសាលាកសិកកម្មចម្ការដូង ស្ថិតក្នុងភូមិខ្វាខាងកើត សង្កាត់ដង្កោ ខណ្ឌដង្កោ ។
ក្រុមចោរប្លន់មានគ្នាពីរនាក់ស្លៀកពាក់ស៊ីវិលប្រដាប់ដោយកាំភ្លើងខ្លី១ដើម អត់មានម៉ូតូជិះទេ គឺដើរធ្វើសកម្មភាពតែម្តង ។ ចំណែកឯម៉ូតូដែលពួកចោរប្លន់យកទៅនោះមួយគ្រឿងម៉ាកហុងដា C125 ស៊េរីឆ្នាំ២០១០ ពណ៌ខ្មៅ ពាក់ស្លាកលេខស្វាយរៀង 1B 6887 ជាកម្មសិទ្ធិរបស់យុវជនឈ្មោះអ៊ិច សារ៉ាត់ អាយុ២៦ឆ្នាំ ជាកម្មកររោងចក្រ មានស្រុកកំណើតភូមិពោធិ៍រាជ ឃុំពោធិ៍រាជ ស្រុកស្វាយជ្រុំ ខេត្តស្វាយរៀង ។ ចំណែកឯម៉ូតូ១គ្រឿងទៀតម៉ាកហុងដា C125 ដូចគ្នា ស៊េរីឆ្នាំ២០១១ ពណ៌ខ្មៅ ពាក់ស្លាកលេខភ្នំពេញ 1AX 0681 ជាកម្មសិទ្ធិរបស់ស្ត្រីម្នាក់ឈ្មោះធី រិនឌី អាយុ២៥ឆ្នាំ ជាអាជីវករលក់ដូរនៅផ្សារអូឡាំពិក ។ ក្រៅពីនេះ ក្រុមចោរបានធ្វើសកម្មភាពភ្ជង់កាំភ្លើងគំរាមបាញ់សម្លាប់ប្លន់យកបានខ្សែ.ក១ខ្សែទៀតទម្ងន់៥ជីពីស្ត្រីចំណាស់ម្នាក់ឈ្មោះប៉ែន វណ្ណា អាយុ៥៥ឆ្នាំ ជាកសិករ មានទីលំនៅភូមិព្រៃផ្តៅ ឃុំព្រៃផ្តៅ ស្រុកព្រៃកប្បាស ខេត្តតាកែវ ។
ដោយឡែកម្ចាស់ផ្ទះឈ្មោះឈាង ស្រៀវ ភេទប្រុស អាយុ៤៥ឆ្នាំ អត់មានបាត់បង់ទ្រព្យសម្បត្តិអ្វីទេ ឯអ្នកបាត់បង់ម៉ូតូ និងខ្សែ.កខាងលើ គឺជាសាច់ញាតិដែលទៅលេង និងយកម៉ូតូទៅផ្ញើប៉ុណ្ណោះ ។ តាមប្រភពព័ត៌មានបានឱ្យដឹងថា នេះគឺជាសកម្មភាពប្លន់យកទ្រព្យសម្បត្តិនៅក្នុងផ្ទះទាំងថ្ងៃ ដោយនៅមុនពេលកើតហេតុម្ចាស់ផ្ទះរួមជាមួយសាច់ញាតិខ្លះនៅក្នុងបរិវេណផ្ទះផ្នែកខាងមុខ ឯខ្លះទៀតនៅក្នុងផ្ទះ ហើយម៉ូតូដែលទុកនៅទីនោះមានចំនួន៤គ្រឿង គឺមានទាំងម៉ូតូម៉ាកស្គូពីផងដែរ ។ ខណៈនោះម្ចាស់ផ្ទះអត់បានចាក់សោទ្វាររបងទេ ស្រាប់តែឃើញក្រុមចោរប្លន់ដើរចូល ហើយពួកនេះបានដកកាំភ្លើងខ្លីភ្ជង់ប្លន់យកម៉ូតូ និងគំរាមបាញ់សម្លាប់បើអ្នកណាស្រែកនោះ ។
ប្រភពដដែលបានបន្តថា នៅពេលក្រុម ចោរកំពុងអូសម៉ូតូនៅខាងមុខផ្ទះស្ត្រីចំណាស់ម្នាក់ដែលកំពុងមើលទូរទស្សន៍ក្នុងផ្ទះបានចេញមកមើលដោយមានពាក់ខ្សែ.កផង ស្រែកប្រាប់ចោរថា ក្មួយឯងច្រឡំម៉ូតូហើយ គឺម៉ូតូកូនក្មួយរបស់ខ្ញុំទេ ។ ដោយឡែកក្រុមចោរមិនបានស្តាប់នោះទេ ឃើញស្ត្រីរូបនោះពាក់ខ្សែ.កពួកចោរបានទុកម៉ូតូដែលប្លន់បាននោះមួយកន្លែងសិន រួចដើរសំដៅទៅភ្ជង់គំរាមបាញ់សម្លាប់ប្លន់យកខ្សែ.កពីស្ត្រីរូបនោះទៀត ទើបយកម៉ូតូជិះម្នាក់១គ្រឿងគេចខ្លួនចូលរាជធានីភ្នំពេញបាត់ដោយសុវត្ថិភាព ។
ប្រភពដដែលបានបន្តទៀតថា នៅក្នុងហេតុការណ៍ប្លន់ប្រដាប់អាវុធនេះ ក្រុមចោរអត់បានផ្ទុះអាវុធសូម្បីតែ១គ្រាប់ឡើយ ព្រោះជនរងគ្រោះអត់ហ៊ានតដៃ ឬរឹងទទឹងជាមួយពួកចោរ។ ម្យ៉ាងទៀត ម្ចាស់ផ្ទះខាងលើអត់មានបាត់បង់ទ្រព្យសម្បត្តិនោះទេ ដោយម៉ូតូរបស់គាត់២ គ្រឿងដែលទុកនៅជាមួយម៉ូតូ C125 នោះមិនត្រូវបានចោរយកទៅទេ ។ ចោរប្លន់មានគ្នា២នាក់ ម្ល៉ោះហើយវាយកម៉ូតូម្នាក់មួយគ្រឿងប៉ុណ្ណោះ ។
នេះជាភាពព្រហើនមួយរបស់ក្រុមចោរដែលបានធ្វើសកម្មភាពចូលប្លន់ដល់លំនៅឋានទាំងថ្ងៃបែបនេះ មិនខ្លាចញញើត សមត្ថកិច្ចបន្តិចណា ឡើយ ។ ពេលនេះសមត្ថកិច្ចប៉ូលិស និងប៉េអឹមកំពុងធ្វើការស្រាវជ្រាវយ៉ាងដុតដៃដុតជើងបំផុតដើម្បីវែកមុខក្រុមចោរប្លន់ ៕
ចែករំលែកព័តមាននេះ