ខេត្តកំពង់ចាម ៖ គ្រោះថ្នាក់ចរាចរណ៍ដ៏រន្ធត់មួយបានកើតឡើងនៅវេលា៨និង៤៥នាទីយប់ថ្ងៃទី៦ កុម្ភៈ ២០១២ ស្ថិតនៅលើកំណាត់ផ្លូវជាតិលេខ៧ នៅភូមិជើងខាល ឃុំមង់រៀវ ស្រុកត្បូងឃ្មុំ រវាងរថយន្តកាមរីពណ៌ខ្មៅស៊េរី១៩៩៥ ជាមួយនឹងរថយន្តម៉ាកហ៊ីយ៉ាន់ដាយប្រភេទយីឌុបដឹកអេតចាយដែលចតស្ងៀមជាហេតុ បណ្តាលឲ្យមនុស្សចំនួន៥នាក់បានស្លាប់បាត់បង់អាយុជីវិតភ្លាមៗកៀបជាប់ក្នុងរថយន្ត ក្នុងនោះមានជនជាតិកូរ៉េ៣នាក់ និងរបួសជាទម្ងន់ម្នាក់ត្រូវបានគេបញ្ជូនទៅសង្គ្រោះនៅប្រទេសវៀតណាម និងស្លាប់ពេលព្យាបាល។
តាមការឱ្យដឹងពីលោកអនុសេនីយ៍ឯក សូ សារ៉ាត អធិការរងនគរបាលស្រុកត្បូងឃ្មុំ ទទួលផែនសណ្តាប់ធ្នាប់បានប្រាប់កោះសន្តិភាពឲ្យដឹងថា អ្នកដែលស្លាប់នៅក្នុងហេតុការណ៏នេះមាន ១-ឈ្មោះកាង ឆុងហ៊ុន ភេទប្រុស អាយុ៣៣ឆ្នាំ ជាជនជាតិកូរ៉េ ធ្វើការនៅក្រុមហ៊ុន CNKU ដែលមានទីតាំងនៅភូមិជើងឡង សង្កាត់សួង ក្រុងសួង ២-ឈ្មោះជ័រ ស៊ីយ៉ុន ភេទប្រុស អាយុ ៤៥ឆ្នាំ ជនជាតិកូរ៉េ ៣-ឈ្មោះគីម ជុងហ៊ូ ភេទប្រុស អាយុ២៧ឆ្នាំ ជនជាតិកូរ៉េ ៤-ឈ្មោះវ៉ា ចំរើន ភេទប្រុស អាយុ២៧ឆ្នាំ ជនជាតិខ្មែរ រស់នៅភូមិតាមាង ឃុំកោះរកា ស្រុកកំពង់សៀម ៥-ឈ្មោះញេះ ចន ភេទប្រុស អាយុ៣៦ឆ្នាំ រស់នៅភូមិអង្កែវ ឃុំអញ្ចើម ស្រុកត្បូងឃ្មុំ និងអ្នករបួសជាទម្ងន់មិនសង្ឃឹមថា រស់ឈ្មោះវិន កុង ភេទប្រុស អាយុ៥២ឆ្នាំ ជនជាតិវៀតណាម ។
លោកអនុសេនីយ៍ឯក សូ សារ៉ាត អធិការរងនគរបាលស្រុកត្បូងឃ្មុំ បានបន្តថា នៅពេលមុនកើតហេតុរថយន្តហ៊ីយ៉ានដាយបានដឹកអេតចាយចេញពីកន្លែងស្តុកទិញអេតចាយលេខ «៧៧» ដែលមានទីតាំងនៅមុខហាងសម្រស់ម្អមស្រែ ក្នុងភូមិជើងខាល ឃុំមង់រៀវ ស្រុកត្បូងឃ្មុំ ដោយបើកចេញមកឈប់នៅអែបនឹងចញ្ចើមថ្នល់ជាតិបានតែបន្តិច ដើម្បីចេញដំណើរទៅកាន់គោលដៅនៅប៉ោយប៉ែត ខេត្តបន្ទាយមានជ័យ ។ មិនទាន់នឹងបានទៅផង ត្រូវបានរថយន្តកាមរី១គ្រឿង ដែលបើកបរដោយជនជាតិកូរ៉េបើកចេញមកទិសខាងកើតឆ្ពោះមកលិចបានមកបុករថយន្តអេតចាយពីខាងក្រោយដែលចតស្ងៀមយ៉ាងពេញទំហឹងលាន់ដូចរន្ទះ ជាហេតុបណ្តាលឲ្យរថយន្តរងការខូចខាតយ៉ាងដំណំស្លាប់មនុស្សចំនួន៥នាក់ភ្លាមៗ និងរងរបួសជាទម្ងន់ម្នាក់ត្រូវបានបញ្ជូនៅសង្គ្រោះនៅប្រទេសវៀតណាម តែដោយស្ថានភាពរបួសមានលក្ខណៈធ្ងន់ធ្ងរពេកក៏បានទទួលមរណភាពដែរ។
តាមព្រូរថយន្តដឹកអេតចាយឈ្មោះថុន រ៉ា ភេទប្រុស អាយុ២០ឆ្នាំ រស់នៅភូមិស្លា ឃុំស្រស់ ស្រុកគង់ពិសី ខេត្តកំពង់ស្ពឺ បានប្រាប់ឲ្យដឹងថា រថយន្តរបស់គេបានដឹកដែកអេតចាយចេញ ពីក្រុមហ៊ុន «៧៧» នៅយប់ថ្ងៃទី៦ កុម្ភៈ ដោយបើកចេញមកឈប់នៅអែបនឹងចញ្ចើមថ្នល់ក្បាលរថយន្តបែរទៅទិសខាងលិច ។ គ្រាន់តែឈប់បានបន្តិចប៉ុណ្ណោះ ក៏ស្រាប់តែមានរថយន្តកាមរី១គ្រឿង បើកមកដល់បុកពីខាងក្រោយយ៉ាងពេញទំហឹងលាន់ដូចរន្ទះ ជាហេតុបណ្តាលឲ្យស្លាប់មនុស្សចំនួន៥នាក់ភ្លាមៗកៀបជាប់នៅក្នុងរថយន្ត និងនៅដង្ហើមតិចៗម្នាក់ ។ មួយសន្ទុះធំក្រោយមកត្រូវបានកំលាំងសម្ថកិច្ចនគរបាលចរាចរស្រុកបានមកដល់បញ្ជូនអ្នករងគ្រោះទៅសង្គ្រោះនៅមន្ទីរពេទ្យ ។
លោកអធិការរងនគរបាលស្រុកត្បូងឃ្មុំទទួលផែនសណ្តាប់ធ្នាប់បានបញ្ជាក់ថា ចំពោះវត្ថុតាងរថយន្តទាំង២គ្រឿងត្រូវបាននាំមករក្សាទុកនៅអធិការដ្ឋាននគរបាលស្រុកត្បូងឃ្មុំ ដើម្បីដោះស្រាយតាមច្បាប់ ។ ចំណែកសពជនជាតិកូរ៉េទាំង៣នាក់ ត្រូវបានតម្កល់ទុកនៅមន្ទីរពេទ្យរស្ស៊ី រាជធានីភ្នំពេញ ដើម្បីរង់ចាំក្រុមគ្រួសារមកទទួលយក ៕
ចែករំលែកព័តមាននេះ