រាជធានីភ្នំពេញ ៖ យុវជនម្នាក់បានរងរបួសត្រង់ក្បាលធ្ងន់ធ្ងរ ហើយត្រូវបានរថយន្តសាមុយដឹកទៅសង្គ្រោះ និងព្យាបាលភ្លាមៗនៅគ្លីនិកឯកជនមួយ ក្រោយពីយុវជននេះបើកម៉ូតូបញ្ច្រាសទិស ហើយទៅបុកម៉ូតូដូចគ្នាដែលកំពុងធ្វើដំណើរពេញទំហឹង កាលពីវេលាម៉ោង៥និង៣០នាទីល្ងាចថ្ងៃទី៦ កុម្ភៈ ឆ្នាំ២០១២ នៅតាមបណ្តោយផ្លូវលេខ១៨២ សង្កាត់ទឹកល្អក់ទី២ ខណ្ឌទួលគោក ។
ប្រភពព័ត៌មាននៅកន្លែងកើតហេតុបានឱ្យដឹងថា មុនពេលកើតហេតុគេឃើញយុវជនរងគ្រោះខាងលើជិះម៉ូតូម៉ាកគុបជ្រុង៩០ ពណ៌ទឹកប៊ិច តាមបណ្តោយផ្លូវលេខ១៨២ ពីជើងទៅត្បូង បញ្ច្រាសទិស ហើយល្បឿនលឿនផង ក៏ជ្រុលទៅបុកម៉ុតូហុងដាឌ្រីមសេ១២៥ ពណ៌ខ្មៅ បើកបរដោយយុវជនម្នាក់ ពេញទំហឹងចំពីមុខបណ្តាលឱ្យយុវជនបើកម៉ូតូគុបដួលបោកក្បាលនៅនឹងថ្នល់រងរបួសធ្ងន់ ។ ចំណែកឯយុវជនជិះម៉ូតូហុងដា C125 មិនរងគ្រោះថ្នាក់ធ្ងន់ធ្ងរនោះទេ គ្រាន់តែរបួសបន្តិចបន្តួចតែប៉ុណ្ណោះ។
ក្រោយកើតហេតុនគរបាលចរាចរខណ្ឌទួលគោក បានចុះមកវាស់វែងរួចយកម៉ូតូទាំងពីរគ្រឿងទៅរក្សាទុកនៅអធិការដ្ឋានខណ្ឌទួលគោក រង់ចាំការដោះស្រាយតាមនីតិវិធី ៕
ចែករំលែកព័តមាននេះ