រាជធានីភ្នំពេញ ៖ ក្នុងសន្និសីទសារព័ត៌មានមួយកាលពីព្រឹកថ្ងៃទី៦ កុម្ភៈ បង្ហាញមុខក្រុមជនសង្ស័យប្លន់ប្រដាប់អាវុធ លោកវរសេនីយ៍ទោជួន ណារិន្ទ ប្រធានការិយាល័យនគរបាលព្រហ្មទណ្ឌកម្រិតធ្ងន់រាជធានីភ្នំពេញ ថ្លែងថា ក្រុមចោរប្លន់ប្រដាប់អាវុធកាចសាហាវឃោរឃៅបាញ់សម្លាប់ជនរងគ្រោះកន្លងមក គឺសមាសភាពភាគច្រើនជាទណ្ឌិតចេញពីពន្ធនាគារនិងសិស្ស និស្សិតអត់ការងារធ្វើហើយសេពគ្រឿងញៀន ។ ចំណែកការបង្ក្រាបចោរប្លន់ប្រដាប់អាវុធ១ក្រុមនេះ គឺមានការដឹកនាំបញ្ជាពីលោកឧត្តមសេនីយ៍ត្រីទូច ណារ៉ុថ ស្នងការ និងលោកឧត្តមសេនីយ៍ត្រីប៉ុល ភិធេយ្យ ស្នងការរងដែលជាប្រធានការិយាល័យកណ្តាលនគរបាលយុត្តិធម៌នៃស្នងការដ្ឋាននគរបាលរាជធានីភ្នំពេញ និងមានការសម្របសម្រួលពីលោកសុខ រឿន ព្រះរាជអាជ្ញារងអមសាលាដំបូងរាជធានីភ្នំពេញ ។
លោកជួន ណារិន្ទ បន្តថា ដោយមានគណៈស្នងការដឹកនាំ និងបានការឯកភាពពីគណៈបញ្ជាការឯកភាពរាជធានីភ្នំពេញនេះហើយ ទើបសមត្ថកិច្ចការិយាល័យជំនាញរបស់លោកស្រាវជ្រាវក្តាប់មុខសញ្ញា និងតាមប្រមាញ់ចាប់ខ្លួនក្រុមជនសង្ស័យប្លន់ប្រដាប់អាវុធ ១ក្រុមនេះ បាន៣នាក់ និងដកហូតអាវុធបាន៣ដើមផង ។ ជនទាំង៣នាក់នេះមាន១-ឈ្មោះគង់ សុវណ្ណារ៉ា ភេទប្រុស អាយុ២៨ឆ្នាំ ស្នាក់នៅផ្ទះលេខ៥០ មហាវិថីព្រះនរោត្តម សង្កាត់ទន្លេបាសាក់ ខណ្ឌចំការមន ២-ឈ្មោះពុំុ រ៉ៃយ៉ា ភេទប្រុសអាយុ២៤ឆ្នាំ ស្នាក់នៅផ្ទះគ្មានលេខ ផ្លូវលេខ២៧១ សង្កាត់ទំនប់ទឹក ខណ្ឌចំការមន ៣-ឈ្មោះផាន់ សេរីវុធ ភេទប្រុស អាយុ២៩ឆ្នាំ ស្នាក់នៅផ្ទះលេខ៩៤ ផ្លូវលេខ៦៣ សង្កាត់បឹងរាំង ខណ្ឌដូនពេញ ។ ក្នុងចំណោមបក្សពួកទាំង៣នាក់នេះ ឈ្មោះគង់ សុវណ្ណារ៉ា ទើបចេញពីពន្ធនាការត្រពាំងផ្លុង ជាប់ចោទពីបទប្លន់ប្រដាប់អាវុធ ឈ្មោះផាន់ សេរីវុធ ទើបចេញពីពន្ធនាគារព្រៃស ជាប់ចោទពីបទប្លន់ប្រដាប់អាវុធ និងល្បីល្បាញជាងគេ គឺប្លន់បាញ់សម្លាប់ជនរងគ្រោះផងនៅខណ្ឌដូនពេញ ចំណែកឈ្មោះពុំ រ៉ៃយ៉ា ក៏ជាមុខសញ្ញាចាស់ ហើយជាសិស្សធ្លាប់បោះបង់សាលា និងប្រើប្រាស់គ្រឿងញៀន ។
ជនសង្ស័យទាំង៣នាក់ បានសារភាពថា ពួកគេធ្លាប់ធ្វើសកម្មភាពចំនួន៦លើកគឺលើកទី១-ប្លន់នៅខាងក្រោយវិទ្យាល័យផ្សារដើមថ្កូវមិនចាំថ្ងៃក្នុងខែឧសភា ២០១១ វេលាម៉ោង២រសៀលប្លន់នារី២នាក់កំពុងដើរដោះយកខ្សែដៃ ខ្សែ.កទាំងអស់ ។ លើកទី២-មិនចាំថ្ងៃក្នុងខែសីហា ឆ្នាំ២០១១ វេលាម៉ោងប្រហែល៣រសៀល ប្លន់នារីម្នាក់កំពុងអង្គុយមុខផ្ទះលក់តុ ទូ ដោះយកគ្រឿងអង្ការនៅក្នុងខណ្ឌចំការមន រាជធានីភ្នំពេញ ។ លើកទី៣-មិនចាំថ្ងៃក្នុងខែកញ្ញា ឆ្នាំ២០១១ វេលាម៉ោង៤រសៀលប្លន់ បុរសម្នាក់អង្គុយមុខផុ្ទះយកខ្សែដៃ១ខ្សែ ។ លើកទី៤ វេលាម៉ោង២រសៀលក្នុង ខែតុលា ឆ្នាំ២០១១ ប្លន់នារីម្នាក់ដោះយកខ្សែ.កនៅម្តុំផ្សារបឹងកេងកង ខណ្ឌចំការមន ។ លើកទី៥-មិនចាំថ្ងៃក្នុងខែតុលា ឆ្នាំ២០១១ វេលាម៉ោង១រសៀល ប្លន់នៅជិតប៉ុស្តិ៍នគរបាលរដ្ឋបាលសង្កាត់ចតុមុខ ខណ្ឌដូនពេញ ។ លើកទី៦-ខែវិច្ឆិកា ឆ្នាំ២០១១ វេលាម៉ោង៦ល្ងាច ប្លន់នារីម្នាក់កំពុងដើរដោះយកខ្សែដៃ និងចិញ្ចៀននៅជាប់របងវិទ្យាល័យព្រះស៊ីសុវត្ថិ ខណ្ឌដូនពេញ ។
ក្រៅពីនេះ នៅមានករណីប្លន់ម៉ូតូហុងដាស្គូពី ពណ៌ខ្មៅលាយលឿងខ្ចី១គ្រេឿង នៅជាប់អង្គភាពប្រឆាំងអំពើពុករលួយ ក្នុងខណ្ឌដូនពេញ ហើយបន្ទាប់មកទៀតក៏មានករណីលួចគាស់ផ្ទះប្រដាប់ដោយអាវុធ១ករណីដែរ កាលពីយប់ថ្ងៃទី៤ មករា ឆ្នាំ២០១២ នៅផ្ទះលេខ១៩ ផ្លូវលេខ៤២៦ សង្កាត់ទួលស្វាយព្រៃទី២ ខណ្ឌចំការមន យកទ្រព្យសម្បត្តិអស់ជាច្រើន ។ លោកជួន ណារិន្ទ បន្តថា ក្រៅពីករណីប្លន់ និងលួចប្រដាប់ដោយអាវុធ ក្រុមនេះនៅមានបាញ់សម្លាប់មនុស្សកាលពីថ្ងៃទី៨ មករា ឆ្នាំ២០១២ វេលាម៉ោង១០ និង១០នាទីយប់នៅមុខខ្លោងទ្វារសាកលវិទ្យាល័យបៀលប្រាយ វិថីសុធារស សង្កាត់ទន្លេបាសាក់ ខណ្ឌចំការមនផងដែរ ។ នេះគ្រាន់តែជាចម្លើយតាមការឱ្យដឹងរបស់ជនសង្ស័យប៉ុណ្ណោះ តែពួកគេនៅមានការលាក់លៀមច្រើនជាងនេះទៀត ។
ជាចុងក្រោយ លោកជួន ណារិន្ទ បានអំពាវនាវដល់ជនរងគ្រោះ ឬប្រជាពលរដ្ឋដែលទទួលរងនូវអំពើលួចដោយហិង្សា ប្លន់ប្រដាប់អាវុធ ឬករណីឃាតកម្មណាមួយដែលសមត្ថកិច្ចមិនទទួលបានព័ត៌មានភ្លាមៗ សូមឆាប់ទូរស័ព្ទរាយការណ៍មកសមត្ថកិច្ច តាមរយៈលេខ ០១២ ៩៩៩ ៩៩៩ និង ០១៧ ៩៧១ ៦៦៦ ដើម្បីផ្តល់ព័ត៌មានដល់កម្លាំងជំនាញចុះទៅអន្តរាគមន៍ជាបន្ទាន់ ។ ជាមួយនេះ ក៏សំណូមពរឱ្យឆាប់ជួយរាយការណ៍មុខសញ្ញា ឬសមាសភាពណាមិនល្អងាយស្រួលសមត្ថកិច្ចចាត់ការបន្ទាន់ ក្នុងនោះសមត្ថកិច្ចក៏នឹងរក្សាការសម្ងាត់ជូនដល់អ្នករាយការណ៍មិនឱ្យគ្រោះថ្នាក់ដោយប្រការណាមួយឡើយ ។
ក្រោយពីធ្វើសន្និសីទសារព័ត៌មានជនសង្ស័យទាំង៣នាក់រួមនឹងអាវុធខ្លី៣ដើម ត្រូវបានកសាងសំណុំរឿងបញ្ជូនទៅកាន់សាលាដំបូងរាជធានីភ្នំពេញ ដើម្បីចាត់ការតាមនីតិវិធី ៕
ចែករំលែកព័តមាននេះ