រាជធានីភ្នំពេញ ៖ក្លឹបអ្នកកាសែតកម្ពុជា (ក.អ.ក)បានសម្តែងការព្រួយបារម្ភយ៉ាងខ្លាំងក្នុងសេចក្តីថ្លែងការណ៍ចុះថ្ងៃទី៦ កុម្ភៈ អំពីស្ថានភាពសេរីភាពសារព័ត៌មាននៅក្នុងប្រទេសកម្ពុជា បន្ទាប់ពីទទួលព័ត៌មានថា លោកឱម សារឿន អ្នកយកព័ត៌មានឱ្យកាសែតកោះសន្តិភាពប្រចាំខេត្តឧត្តរមានជ័យ បានត្រូវប្តឹងពីបទផ្សព្វផ្សាយព័ត៌មានមិនពិត ហើយសាលាដំបូងខេត្តឧត្តរមានជ័យបានចេញដីកាឲ្យលោកចូលបំភ្លឺនៅថ្ងៃទី៩ កុម្ភៈ ឆ្នាំ ២០១២ ។ លោកឱម សារឿន ត្រូវបានប្តឹងដោយអធិការរងនគរបាលស្រុកអន្លង់វែង នៃស្នងការដ្ឋាននគរបាលខេត្តឧត្តរមានជ័យ ក្រោយពេលដែលកាសែតកោះសន្តិភាពបានចេញផ្សាយអត្ថបទមួយកាលពីថ្ងៃអង្គារទី១៧ មករា ឆ្នាំ ២០១២ ក្រោមចំណងជើងថា «រឿងរ៉ាវចាប់កូនកំលោះដាក់ពន្ធនាគារខកខានក្រេបចន្ទទឹកឃ្មុំ» ។
ក្លឹបអ្នកកាសែតកម្ពុជា យល់ឃើញថា អត្ថបទដែលលោកឱម សារឿន សរសេរផ្សាយក្នុងកាសែតកោះសន្តិភាព គឺគ្មានចំណុចណាមួយដែលត្រូវប្តឹង និងចោទប្រកាន់ពីបទផ្សាយព័ត៌មានមិនពិតនោះឡើយ ព្រោះសំណេររបស់លោកឱម សារឿន ធ្វើឡើងត្រឹមត្រូវតាមវិជ្ជាជីវៈ ដោយសរសេរតាមព័ត៌មានជាក់ស្តែង ព្រមទាំងដកស្រង់បទសម្ភាសន៍ជាមួយភាគីពាក់ព័ន្ធរួមទាំងសាក្សីផងដែរ ។
ក្លឹបអ្នកកាសែតកម្ពុជា ដែលមានសមាជិកជាអ្នកសារព័ត៌មានជាង៣០០នាក់ សូមអំពាវនាវដោយទទូចដល់សាលាដំបូងខេត្តឧត្តរមានជ័យ យកច្បាប់ស្តីពីរបបសារព័ត៌មានមកអនុវត្ត ចំពោះរឿងក្តីនេះ និងប្រើប្រាស់សុភវិនិច្ឆ័យ ដើម្បីធានាថា សេរីភាពសារព័ត៌មាននៅកម្ពុជាមិនត្រូវបានបំពាន ហើយលោកឱម សារឿន ទទួលបាននូវភាពយុត្តិធម៌ ។ ក្លឹបអ្នកកាសែតកម្ពុជានឹងបន្តការតាមដានករណីបណ្តឹងនេះ ដោយយកចិត្តទុកដាក់ ដើម្បីធានាថារាល់បណ្តឹងចំពោះអ្នកកាសែតត្រូវបានដោះស្រាយដោយយុត្តិធម៌ ។
ក្លឹបអ្នកកាសែតកម្ពុជា គឺជាអង្គការឯករាជ្យមានបេសកកម្មបម្រើផលប្រយោជន៍ និងការពារអ្នកកាសែត ព្រមទាំងលើកកម្ពស់សេរីភាពសារព័ត៌មាន និងពង្រឹងវិជ្ជាជីវៈសារព័ត៌មាន នៅក្នុងប្រទេសកម្ពុជា ៕
ចែករំលែកព័តមាននេះ