រាជធានីភ្នំពេញ ៖ ការប្រកួតបាល់ទាត់ដណ្តើមពានរង្វាន់សម្តេចតេជោ ហ៊ុន សែន ឆ្នាំ២០១២ លើកទី៦ វគ្គជម្រុះវិលជុំតាមពូលនៅលើទីលានស្តាតចាស់កាលពីថ្ងៃសៅរ៍ ទី៥ កុម្ភៈ កន្លងមកនេះ សម្រាប់ពូល A និង B បានបញ្ចប់អស់ហើយ ។ ពូល A មានក្រុមចំនួន២ ដែលត្រូវឡើងទៅប្រកួតវគ្គជម្រុះ៨ក្រុមចុងក្រោយទៀតនោះ មានក្រុមណាហ្គាខប និងក្រុមឆ្លាមសមុទ្រ រីឯពូល B វិញមានក្រុមក្រសួងការពារជាតិ និងក្រុមគីរីវង់សុខសែនជ័យ ។
ក្រុមណាហ្គាខប បានយកឈ្នះ ក្រុមខេត្តបាត់ដំបង រហូតដល់ទៅ ១០-០ ឯណោះ ។ ពេលនេះក្រុមណាហ្គាខប ស្ថិតនៅចំណាត់ថ្នាក់លេខ១ ក្នុងពូល ។ ចំណែកឯក្រុមឆ្លាមសមុទ្រស្ថិតនៅចំណាត់ថ្នាក់លេខ២ ក្នុងពូល ខណៈដែលក្រុមនេះបានយកឈ្នះលើក្រុមប៉ៃលិន ៥-០ ។ ដោយឡែកសម្រាប់ពូល B ក្រុមក្រសួងការពារជាតិ ស្ថិតនៅចំណាត់ថ្នាក់លេខ១ក្នុងពូល បន្ទាប់ពីបានប្រកួតឈ្នះក្រុមខេត្តកំពត ៤-០ ។ នៅតង់ទី១ ក្រុមក្រសួងការពារជាតិមានឱកាសរកបាន២គ្រាប់ គឺកីឡាករឈិន ឈឿន ពាក់អាវលេខ១៧ រកបាន១គ្រាប់មុននៅនាទីទី៩ បន្ទាប់មកកីឡាករអ៊ុង តារា ពាក់អាវលេខ៩ រកបាន១គ្រាប់បន្ថែមទៀតនៅនាទីទី៣៣ ។
ក្រុមក្រសួងការពារជាតិ មិនសូវលេងសម្រុកពេកនោះទេ ខណៈក្រុមខេត្តកំពត បាត់បង់ស្ថានភាពប្រកួតស្ទើរតែទាំងស្រុងទៅហើយនោះ ។ ក្រុមក្រសួងការពារជាតិ រកបាន២គ្រាប់បន្ថែមទៀត នៅតង់ទី២ គឺកីឡាករទូច សុខហេង ពាក់អាវលេខ២០ មានឱកាសរកបាន១គ្រាប់នៅនាទីទី៨៨ និងកីឡាករអៀង ពិសិដ្ឋ ពាក់អាវលេខ១៤ រកបានគ្រាប់បាល់ចុងក្រោយនៅនាទីទី៩០ ។
ក្រុមគិរីវង់សុខសែនជ័យ ដែលមានជំនឿចិត្ត១០០ភាគរយក្នុងការយកឈ្នះលើក្រុមសាកលវិទ្យាល័យអាស៊ីអឺរ៉ុប លើកនេះនោះ បានជួបការលំបាកយ៉ាងខ្លាំងនៅតង់ទី១ ។ ទោះបីជាពេជ្រ សីហា ខ្សែប្រយុទ្ធរបស់ក្រុមគិរីវង់សុខសែនជ័យ មានឱកាសរកបាន១គ្រាប់យ៉ាងលំបាកនៅតង់ទី១ នាទីទី១ ក៏ដោយ ។ ប៉ុន្តែចូលដល់តង់ទី២ ក្រុមគីរីវង់សុខសែនជ័យ បានធ្វើឱ្យក្រុមសាកលវិទ្យាល័យអាស៊ីអឺរ៉ុប ស្ថិតនៅក្នុងស្ថានភាពមិនសូវល្អឡើយ ជាពិសេសការស៊ុតបាល់បញ្ចូលទីរកបាន៣គ្រាប់បន្ថែមទៀតនោះ ។ កីឡាករពេជ្រ សីហា រកបាន២គ្រាប់បន្ថែមទៀត គឺនៅនាទីទី៦៤ និងនាទីទី៧៥ ខណៈកីឡាករឯក សុភាព ពាក់អាវលេខ១៣ បន្ថែម១គ្រាប់ចុងក្រោយនៅនាទីទី៩០ ៕
ចែករំលែកព័តមាននេះ