ខេត្តកណ្តាល ៖ គណៈកម្មាធិការប្រជាជនកម្ពុជា ឃុំក្រាំងម្កាក់ ស្រុកអង្គស្នួល បានរៀបចំសន្និបាតប្រចាំឆ្នាំរបស់ខ្លួន នាព្រឹកថ្ងៃទី៤ កុម្ភៈ នៅទីស្នាក់ការគណបក្សប្រជាជនកម្ពុជាដោយមានការចូលរួមពី លោករស់ វណ្ណា ទីប្រឹក្សាផ្ទាល់សម្តេចអគ្គមហាធម្មពោធិសាល ជា ស៊ីម, អនុប្រធានទី១ គណៈអចិន្ត្រៃយ៍គណៈពង្រឹងមូលដ្ឋានស្រុកអង្គស្នួល និងជាប្រធានក្រុមការងារថ្នាក់កណ្តាលចុះជួយមូលដ្ឋានឃុំចំនួន២គឺឃុំបែកចាន និងឃុំក្រាំងម្កាក់, លោកអ៊ូ សំអួន អនុប្រធានគណៈកម្មាធិការបក្សខេត្ត និងលោកឆាយ ត្រលន់ អនុប្រធានក្រុមការងារ ព្រមទាំងលោក លោកស្រីជាក្រុមការងារចុះជួយមូលដ្ឋានថ្នាក់កណ្តាល និងថ្នាក់ខេត្ត ស្រុក និងសមាជិកបក្សមកពីបណ្តាភូមិទាំង១៥ក្នុងឃុំប្រមាណជិត៥០០នាក់។
អង្គសន្និបាតបានដំណើរការរយៈពេល១ព្រឹក ដោយតាមដានស្តាប់នូវខ្លឹមសារព្រាងរបាយការណ៍បូកសរុបវាយតម្លៃលទ្ធផលនៃការអនុវត្តគោលនយោបាយរបស់បក្សសម្រាប់ការអភិវឌ្ឍន៍ឃុំឆ្នាំ២០០៧ដល់ឆ្នាំ២០១២ និងទិសដៅអនុវត្តន៍បន្តពីឆ្នាំ២០១២ ដល់ឆ្នាំ២០១៧។ ជាមួយគ្នានេះដែរ ដំណើរការនៃអង្គសន្និបាតក៏មានធ្វើបទអន្តរាគមន៍ពីសំណាក់តំណាងចលនាយុវជន តំណាងចលនាស្រ្តី, តំណាងប្រជាការពារ និងតំណាងចលនានិវត្តន៍ជន និងមនុស្សចាស់, តំណាងសមាជិកបក្សភូមិ និងតំណាងក្រុមបក្សដែលតំណាងទាំងអស់យល់ព្រម និងឯកភាពទៅតាមរបាយការណ៍បូកសរុបវាយតម្លៃលទ្ធផលនៃការអនុវត្តគោលនយោបាយរបស់បក្សរយៈពេលកន្លងទៅ និងខ្លឹមសារព្រាងកម្មវិធីនយោបាយរបស់បក្សសម្រាប់ការអភិវឌ្ឍន៍ឃុំបន្តពីឆ្នាំ២០១២ដល់ឆ្នាំ២០១៧។
ក្នុងឱកាសនោះដែរ គណៈអធិបតីក៏បានចែកជូនអំណោយអនុស្សាវរីយ៍ដល់សមាជិកបក្សដែលបានចូលរួមជិត៥០០នាក់ ក្នុងម្នាក់ៗអាវ១ មួក១ និងសារុង១ផងដែរ៕
ចែករំលែកព័តមាននេះ