ខេត្តកំពង់ឆ្នាំង ៖ ប៉ូលិសក្រុងកំពង់ឆ្នាំងបានចាប់ឃាត់ខ្លួនជនសង្ស័យចំនួន២នាក់ ដោយចោទប្រកាន់ពីបទមានបំណងលួចយកម៉ូតូពីកន្លែងផ្ញើនៅក្នុងពិធីប្រគំតន្ត្រីមួយដែលបានប្រារព្ធធ្វើឡើងកាលពីយប់ថ្ងៃទី៤ កុម្ភៈ នៅពហុកីឡដ្ឋានចាស់ ស្ថិតក្នុងភូមិធម្មយុត្ត សង្កាត់ប្អេរ ក្រុងកំពង់ឆ្នាំង។ ជនសង្ស័យទាំងពីរនាក់ នេះម្នាក់ឈ្មោះចាន់ ដារ៉ា អាយុ៣២ឆ្នាំ និងម្នាក់ទៀតឈ្មោះអូក ម៉ាប់ អាយុ១៩ឆ្នាំ ទាំងពីរនាក់មានទីលំនៅក្នុងសង្កាត់គីឡូម៉ែត្រលេខ៦ ខណ្ឌឫស្សីកែវ រាជធានីភ្នំពេញ ។
បើតាមលោកហ៊ុល វាសនា អធិការរងប៉ូលិសក្រុងកំពង់ឆ្នាំងឱ្យដឹងថា មូលហេតុដែលសមត្ថកិច្ចចាប់ជនសង្ស័យមកធ្វើសកម្មភាពបន្លំយកម៉ូតូថ្មីតាមកន្លែងផ្ញើម៉ូតូនេះបាន គឺដំបូងឡើយគេសង្ស័យលើម៉ូតូមួយគ្រឿងម៉ាកអាយខន ព្រោះនៅយប់នោះមានជនដៃដល់ម្នាក់ជិះម៉ូតូម៉ាកអាយខន ទៅកាប់ជនរងគ្រោះ បណ្តាលឱ្យរងរបួសធ្ងន់ ហើយប៉ូលិសក៏ពួនស្ទាក់ចាប់ម៉ូតូគួរឱ្យសង្ស័យ។ លុះពេលចាប់បានមិនពាក់ព័ន្ធនឹងរឿងកាប់ចាក់ទេ តែយើងឆែកឃើញមានប័ណ្ណផ្ញើម៉ូតូ និងប៊ិចហ្វឺត ព្រមទាំងរបស់មួយចំនួនទៀតគួរសង្ស័យ ក៏ដកហូតនាំមកកាន់អធិការដ្ឋានដោយដកហូតទូរស័ព្ទ១គ្រឿងផង។ បន្ទាប់ពីចាប់មនុស្ស និងដកហូតសម្ភារគួរសង្ស័យមក ក៏មានបក្សពួកម្នាក់ទៀតទូរស័ព្ទមកកាន់ទូរស័ព្ទដែលប៉ូលិសដកហូតហើយក៏បានបញ្ឆោតឱ្យមកជួប និងចាប់បានម្នាក់ទៀត ។
ក្រោយការចាប់ឃាត់ ប៉ូលិសដកហូតបានម៉ូតូចាស់ៗ២គ្រឿង គឺសង់កូរ៉េមួយគ្រឿង និងអាយខនមួយគ្រឿង ក្រៅពីនេះវត្ថុតាងមានប័ណ្ណផ្ញើម៉ូតូ១ដុំ ហ្វឺតសរសេរ៦ដើម, ប្រដាប់កិបក្រដាស១ ទុយោបូមសាំង១ កូនសោម៉ូតូ៥ ទួរណឺវីស១ ដី.ស និងទឹកលាងហ្វឺត១ដប។
ជនសង្ស័យទាំងពីរនាក់បានសារភាពថា ខ្លួនពិតជាមានបំណងមកដូរយកម៉ូតូចេញពីកន្លែងផ្ញើមែន ហើយម៉ូតូដែលពួកគេយកមក៣គ្រឿង បានផ្ញើនៅកន្លែងផ្ញើម៉ូតូ១គ្រឿង ដោយដាក់នៅជិតម៉ូតូស៊េរី២០១០ ប៉ុន្តែមិនទាន់បានប្តូរផង ក៏ត្រូវប៉ូលិសចាប់បានតែម្តង៕
ចែករំលែកព័តមាននេះ