ខេត្តសៀមរាប ៖ ក្រុមមន្ដ្រីអាជា្ញធរខេត្ដបានអះអាងសាជាថ្មីថា លំនៅឋានមិនរៀបរយរបស់ប្រជាពលរដ្ឋប្រមាណជាងមួយពាន់ប្រាំរយគ្រួសារដែលសង់នៅលើដីចំណីស្ទឹងប្រវត្ដិសាស្ដ្រសៀមរាប នឹងត្រូវជម្លៀសឱ្យទៅរស់នៅឯសង្កាត់សំបួរ ជាយក្រុងទេសចរណ៍មួយនេះ នៅអំឡុងចុងខែកុម្ភៈ ឆ្នាំ២០១២នេះ ។ ការធ្វើបែបនេះដើម្បីយកមាត់ស្ទឹងរៀបចំធ្វើផ្លូវ.សួនច្បារ និងពង្រីកពោះស្ទឹងឱ្យជ្រៅ ធំទូលាយជាងមុនសម្រាប់បញ្ចៀសជំនន់ទឹកភ្លៀងដែលធ្លាក់មកពីតំបន់ប៉ែកខាងលើៗ ។
ទោះបីជាយ៉ាងណារហូតមកទល់ពេលនេះពុំមានប្រភពបង្ហាញពីចំនួនទឹកប្រាក់ដែលត្រៀមនឹងចំណាយទៅលើផែនការជម្លៀសប្រជាពលរដ្ឋនិងផែនការពង្រីកស្ទឹងសៀមរាបនោះនៅឡើយទេ គ្រាន់តែដឹងថាគម្រោងការនេះនឹងត្រូវអនុវត្ដជាដំណាក់កាលៗ គឺជំណាក់កាលទី១ នឹងចាប់ផ្ដើមនៅចុងខែកុម្ភៈនេះ ត្រឹមស្ពាននាគទៅដល់ស្ពានផ្លូវវាងក្រុង ។ ដំណាក់កាលទី២ ចាប់ផ្ដើមពីស្ពានវាងក្រុងទៅភូមិចុងស្រុកសង្កាត់សៀមរាប និងដំណាក់កាលទី៣ ចាប់ពីស្ពាននាគដល់ស្ពានរ៉ោករ៉ាកក្នុងសង្កាត់ស្លក្រាម ។
អភិបាលរងក្រុងសៀមរាបលោកអឿន ពៅ បានថ្លែងប្រាប់កាលពីព្រឹកថ្ងៃទី៥ កុម្ភៈថា សំណង់មិនរៀបរយសង់នៅលើដីចំណីស្ទឹងដែលគ្រោងនឹងធ្វើការជម្លៀសចេញនោះ មានចំនួនរហូតដល់ជាង១.៥០០គ្រួសារ ដោយដំណាក់កាលលើកទី១ នឹងត្រូវចាប់ផ្ដើមនៅចុងខែកុម្ភៈ ឆ្នាំ២០១២ ខាងមុខត្រឹមស្ពាននាគទៅដល់ស្ពានផ្លូវវាងក្រុង ។
លោកបានបញ្ជាក់ថា ប្រជាពលរដ្ឋដែលត្រូវជម្លៀសចេញទាំងនោះ នឹងតម្រូវឱ្យទៅរស់នៅក្នុងកន្លែងប្រមូលផ្ដុំមួយក្នុងសង្កាត់សំបួរ ប៉ែកខាងលិចឆៀងខាងត្បូងក្រុងសៀមរាប ដែលអាជ្ញាធរបានរៀបចំជាគោលនយោបាយជូន គឺមួយគ្រួសារបានទទួលចំណែកដីស្មើៗគ្នា ទំហំ៧ម៉ែត្រគុណ១៥ម៉ែត្រ សម្រាប់សង់លំនៅឋានថ្មី បូករួមទាំងថវិកាខ្ពស់បំផុត៤ពាន់ដុល្លារអាមេរិកទៅតាមទំហំផ្ទះរបស់ពួកគាត់ ។
ទាក់ទិននឹងគម្រោងការកែលម្អស្ទឹងប្រវត្ដិសាស្ដ្រសៀមរាបដូចគ្នានេះដែរ អភិបាលរងខេត្ដសៀមរាបលោកប៊ុន ថាឫទ្ធិ បានបញ្ជាក់ថា គម្រោងការជម្លៀសប្រជាពលរដ្ឋពីលើដីចំណីស្ទឹង និងធ្វើការស្ដារស្ទឹងឡើងវិញនោះ រដ្ឋាភិបាលមានកញ្ចប់ថវិការួចហើយ ចាំតែអនុវត្ដប៉ុណ្ណោះ សម្រាប់យកដីទាំងនោះមកស្ថាបនាផ្លូវចាក់កៅស៊ូ និងសួនច្បារ ដែលជាផ្នែកមួយនៃកិច្ចប្រឹងប្រែងអនុវត្ដ«កម្មវិធីទីក្រុងស្អាតរមណីយដ្ឋានស្អាត»ក្នុងការទាក់ទាញអារម្មណ៍ភ្ញៀវទេសចរ ដែលកំពុងតែមានសក្ដានុពលនាពេល បច្ចុប្បន្ននេះ ជាពិសេសធ្វើការស្ដារនិងពង្រីកពោះស្ទឹងឡើងវិញ ដើម្បីបញ្ចៀសបាននូវជំនន់លិចលង់ដោយសារទឹកធ្លាក់មកពីតំបន់ប៉ែកខាងលើៗនៃក្រុងនេះ ។
ស្ទឹងប្រវត្ដិសាស្ដ្រសៀមរាបមានប្រភពចេញពីភ្នំគូលែនហូរកាត់លិង្គមួយពាន់ដែលព្រះរាជាសម័យមុនបានកសាងទ្បើងក្នុងការច្រោះទឹកធម្មតាទៅជាអម្រឹតតាមជំនឿសាសនា ហូរឆ្លងកាត់ស្រុកចំនួនពីររួមមានស្រុកបន្ទាយស្រីនឹងស្រុកអង្គរធំនិងពុះទីក្រុងទេសចរណ៍សៀមរាបជាពីរ គឺខាងកើតនិងខាងលិចមុននឹងហូរចាក់ទៅក្នុងទន្លេសាប ។
ពីដើមឡើយស្ទឹងនេះមានទឹកថ្លាឆ្វង់មើលឃើញបាតដី ប៉ុន្ដែបច្ចុប្បន្នត្រូវបានបំពុលយ៉ាងចាស់ដៃពីសំណាក់សំណង់រាប់ពាន់ខ្នងខាងលើបូករួមទាំងការបង្ហូរទឹកសំអុយពីសណ្ឋាគារ ភោជណីយដ្ឋាន ផ្សារលក់ដូរមួយចំនួន ជាពិសេសសកម្មភាពបូមខ្សាច់នៅផ្នែកខាងលើៗផងដែរបានធ្វើឱ្យទឹកស្ទឹងប្រែក្លាយពីថ្លាមកល្អក់ដូចទឹកបាយ និងមានសំរាមអណ្ដែតត្រៀបត្រាពេញផ្ទៃទឹកមើលទៅគួរឱ្យរអើមមិនចង់ទៅក្បែរ និងបង្កើតជាហានីភ័យជាច្រើនដល់ក្រុងទេសចរណ៍ប្រវត្ដិសាស្ដ្រមួយនេះផង ។
កាលពីអំឡុងឆ្នាំ២០១១ កន្លងទៅក្រុងទេសចរណ៍សៀមរាប បានរងនូវការវាយប្រហារផ្ទួនៗ ពីជំនន់ទឹកស្ទឹងរហូតដល់ទៅ៣ដងដែលបណ្ដាលឱ្យមានការប៉ះពាល់ និងខូចខាតយ៉ាងធ្ងន់ធ្ងរដល់ ហេដ្ឋារចនាសម្ពន្ធ័សង្គម និងគំរាមកំហែងយ៉ាងខ្លាំងក្លាដល់ប្រាង្គប្រាសាទបុរាណមួយចំនួនផងដែរ ។ មូលហេតុចម្បងនៃគ្រោះទឹកជំនន់ពន្លិចក្រុងសៀមរាបដ៏មានសក្ដានុពលនេះ ត្រូវបានគេវាយតម្លៃថា បណ្ដាលមកពីស្ទឹងសៀមរាបដែលមានភារកិច្ចដ៏សំខាន់ក្នុងការនាំទឹកពីតំបន់ភាគខាងលើៗចុះទៅក្នុងបឹងទន្លេសាប ត្រូវបានរំខានដោយសារសំណង់រាប់ពាន់ខ្នងធ្វើឱ្យកន្លែងខ្លះរួមតូចស្ទើរតែលោតឆ្លងកាត់បាន ។
ថ្វីបើយ៉ាងនេះក៏ដោយស្ដ្រីម្នាក់សូមមិនបញ្ចេញឈ្មោះដែលមានផ្ទះនៅលើដីចំណីស្ទឹងសៀមរាបនោះ បាននិយាយថា គាត់មករស់នៅទីនេះតាំងពីឆ្នាំ១៩៧៩ម៉្លេះ ហើយពេលនេះគាត់បានទទួលព័ត៌មានថា អាជ្ញាធរនឹងបណ្ដេញពួកគាត់ចេញធ្វើឱ្យគាត់មានការព្រួយបារម្ភយ៉ាងខ្លាំងព្រោះមិនចង់ទៅរស់នៅឆ្ងាយពីក្រុងគ្មានកន្លែងរកស៊ីនោះទេ ណាមួយឆ្ងាយពីសាលាកូនរៀនទៀតផង ។
ក្រុមមន្ដ្រីសង្គមស៊ីវិលដែលធ្វើការតាមដានទៅលើប្រជាពលរដ្ឋ ដែលរស់តាមបណ្ដោយមាត់ស្ទឹងនោះបានសម្ដែងនូវការគាំទ្រចំពោះអាជា្ញធរខេត្ដក្នុងការអភិវឌ្ឍទីក្រុងសៀមរាបមួយនេះឱ្យមានសោភ័ណភាពកាន់តែប្រសើរ ដើម្បីបម្រើឱ្យវិស័យទេសចរណ៍ ។ ទន្ទឹមគ្នានោះពួកគេបានទទូចដល់អាជ្ញាធរសូមកុំឱ្យបណ្តេញប្រជាពលរដ្ឋដោយហិង្សាដូចមានករណីកើតឡើងកន្លងទៅ ព្រោះប្រជាពលរដ្ឋទាំងនោះសុទ្ធជាខ្មែរដូចគា្ន ត្រូវតែដោះស្រាយដោយសន្ដិវិធី ។
លោកសួស ណារិន មន្ដ្រីស៊ើបអង្កេតរបស់សមាគមការពារសិទ្ធិមនុស្ស«អាដហុក»ប្រចាំ ខេត្ដសៀមរាប បានថ្លែងកាលពីរសៀលថ្ងៃអាទិត្យនេះថា ខាងសង្គមស៊ីវិលយល់ឃើញថាការរស់នៅលើដីចំណីស្ទឹងនេះពិតជាបានបំពុលបរិស្ថានអីុចឹងមែន ប៉ុន្ដែកាតព្វកិច្ចរដ្ឋក្នុងការឱ្យប្រជាពលរដ្ឋចាកចេញពីតំបន់នោះ គួរមានគោលដៅដោះស្រាយគោលនយោបាយឱ្យបានជាក់លាក់ មានរៀបចំហេដ្ឋារចនាសម្ព័ន្ធសង្គម រួមមាន ផ្លូវថ្នល់ សាលារៀន មណ្ឌលសុខភាពបានរួចរាល់មុននឹងឱ្យពួកគាត់ទៅរស់នៅតំបន់ថ្មីនោះ ទើបប្រសើរ ។
លោកបានបន្ថែមថា ក្នុងនាមសង្គមស៊ីវិលសូមជំរុញដល់អាជា្ញធររៀបចំគម្រោងការជម្លៀសនោះឱ្យបានឆាប់រហ័សមុនរដូវភ្លៀងដើម្បីឱ្យប្រជាពលរដ្ឋទាំងអស់នោះ មានសិទ្ធិតាំងទីលំនៅថ្មីឱ្យបានសមរម្យចៀសវាងបណ្ដេញចំពេលខែភ្លៀងធ្លាក់ ដែលនាំឱ្យមានការលំបាក ធ្ងន់ធ្ងរ ៕
ចែករំលែកព័តមាននេះ