រាជធានីភ្នំពេញ ៖ ក្រុមហ៊ុនបណ្តាញទូរស័ព្ទចល័ត Beeline បានប្រារព្ធពិធីសម្ពោធ ដើម្បីណែនាំជូនសាធារណជនកម្ពុជា និងពិភពលោកនូវ Beeline Arena កាលពីថ្ងៃទី៤ កុម្ភៈ ២០១២ ដោយមានការអញ្ជើញចូលរួមជាអធិបតីភាពពីសំណាក់លោកសុខ ចិន្តា សោភា រដ្ឋមន្ត្រីប្រតិភូអមនាយករដ្ឋមន្ត្រី និងជាអគ្គលេខាធិការនៃក្រុមប្រឹក្សាអភិវឌ្ឍន៍កម្ពុជា និងភ្ញៀវកិត្តិយសចូលរួមទាំងអស់ប្រហែល១.៥០០នាក់ ដើម្បីអបអរសាទរចំពោះផលដ៏សំខាន់នេះ ។
B eeline Arena ត្រូវបានសាងសង់ឡើងស្របតាមស្តង់ដាអន្តរជាតិ មិនគ្រាន់តែដើម្បីកីឡាប៉ុណ្ណោះទេ ថែមទាំងជាវេទិកាសម្រាប់បម្រើការកម្សាន្ត និងព្រឹត្តិការណ៍សាធារណៈនានាផងដែរ។ សំណង់អគារដ៏លេចធ្លោនេះនឹងក្លាយជានិមិត្តរូបកម្ពុជា និងនិមិត្តរូបតំណាងជាតិក្នុងពេលដ៏ខ្លីផងដែរ ។ លោកហ្គាអ៊ែល កំប៉ង់ អគ្គនាយកក្រុមហ៊ុនសូតែលកូ បានមានប្រសាសន៍ថា “Beeline Arena នឹងជួយគាំទ្រដល់ការរៀបចំព្រឹត្តិការណ៍កីឡាអន្តរជាតិ និងជួយលើកតម្កើងការទទួលស្គាល់ និងការចូលរួមរបស់កីឡាករអត្តពលកម្មកម្ពុជា និងសហព័ន្ធកីឡានៅក្នុងការប្រកួតអន្តរជាតិនានា ។ ឧទាហរណ៍ Beeline Arena អាចជួយកម្ពុជាធ្វើជាម្ចាស់ផ្ទះរៀបចំការប្រកួតកីឡាតឺន្នីសដណ្តើមពានរង្វាន់ Davis Cup ផងដែរ ។
លោកបានបន្តទៀតថា “Beeline Arena គឺអាចជាឆាកសម្តែងដ៏ស័ក្តិសមសម្រាប់តារាសិល្បៈពិភពលោក និងការសម្តែងមហោស្រពនៅកម្ពុជា ។ ខ្ញុំសូមចូលរួមលើកទឹកចិត្តដល់ដៃគូពាណិជ្ជកម្មរបស់យើងក៏ដូចជាសហគ្រិនផ្សេងៗទៀតក្នុងការអភិវឌ្ឍន៍កម្ពុជា ដើម្បីទាញយកអត្ថប្រយោជន៍ពីមជ្ឈមណ្ឌលកីឡាខ្នាតធំដ៏វិសេសនេះក្នុងការរៀបចំព្រឹត្តិការណ៍នានាក្នុងគោលបំណងផ្សព្វផ្សាយ និងលើកកម្ពស់សកម្មភាពរបស់ខ្លួនដើម្បីប្រយោជន៍ប្រជាជនកម្ពុជា» ។
ក្នុងនាមជាអ្នកឧបត្ថម្ភដល់ Beeline Arena ក្រុមហ៊ុនបណ្តាញទូរស័ព្ទចល័ត Beeline បានត្រៀមខ្លួនរួចជាស្រេចក្នុងការចូលរួមជួយធ្វើអ្វីៗចាំបាច់ ដើម្បីជួយឱ្យការរៀបចំព្រឹត្តិការណ៍នានាទទួលបានជោគជ័យ និងជួយកសាងកេរ្តិ៍ឈ្មោះមជ្ឈមណ្ឌលនេះក្នុងនាមជាទីកន្លែងលំដាប់ខ្ពស់មួយសម្រាប់ព្រឹត្តិការណ៍សំខាន់ៗ។
Beeline Arena គឺជាកម្មសិទ្ធិរបស់ក្រុមហ៊ុន Banzai ដែលជាអ្នកផ្តួចផ្តើមគំនិតដ៏អស្ចារ្យនេះ ហើយក្រោយមកបានរួមគ្នាជាមួយក្រុមហ៊ុនទូរស័ព្ទ Beeline ដើម្បីប្រែក្លាយការផ្តួចផ្តើមគំនិតនេះឱ្យលេចចេញជារូបរាងក្លាយជាការពិត។ Beeline បានក្លាយជាអ្នកនាំមុខគេប្រកបដោយភាពច្នៃប្រឌិតនៅក្នុងទីផ្សារទូរគមនាគមន៍កម្ពុជាតាំងពីចាប់ផ្តើមប្រតិបត្តិការរបស់ខ្លួននៅក្នុងឆ្នាំ២០០៩ ។ Beeline Arena នឹងក្លាយជាស្តង់ដាថ្មីមួយក្នុងនាមជាទីកន្លែងសម្រាប់ប្រារព្ធព្រឹត្តិការណ៍សំខាន់ៗនានា ដែលអាចទទួលអ្នកចូលរួមទស្សនាបានចំនួន១.៥០០នាក់៕
ចែករំលែកព័តមាននេះ