ក្រុងប៉ោយប៉ែត ៖ សប្បុរសជន៣រូបមកពីខេត្តសៀមរាប បាននាំយកអំណោយរួមមានស័ង្កសីចំនួន៤០សន្លឹក ទឹកត្រី ទឹកស៊ីអ៊ីវ និងគ្រឿងបរិភោគមួយចំនួនទៀតផ្តល់ជូនដល់ក្រុមអភិរក្សផលនេសាទនៅសហគមន៍ដង្កៀបក្តាមមានជ័យដែលមានទីតាំង ស្ថិតក្នុងឃុំប្រាសាទ ស្រុកព្រះនេត្រព្រះ ខេត្តបន្ទាយមានជ័យ កាលពីព្រឹកថ្ងៃទី៥ កុម្ភៈ ២០១២ ។
ចូលរួមក្នុងពិធីចែកអំណោយនេះ គេឃើញមានលោកឱម ចន្ថា នាយករដ្ឋបាលសាលាខេត្តតំណាងដ៏ខ្ពង់ខ្ពស់របស់លោកអ៊ុង អឿន អភិបាលនៃគណៈអភិបាលខេត្ត លោកយឹម យឿន នាយករដ្ឋបាលសាលាស្រុកព្រះនេត្រព្រះ លោកឈិត សុថៀង នាយរងផ្នែករដ្ឋបាលជលផលស្រុកព្រះនេត្រព្រះ ព្រមទាំងអ្នកភូមិចូលរួមជាច្រើននាក់ទៀត។ ម្ចាស់អំណោយទាំង៣រូបខាងលើរួមមាន ១-លោកតួ ឆាត់ណា អាយុ៣៩ឆ្នាំ ២-លោកតួ ដារា អាយុ៣៦ឆ្នាំ និង៣-លោកតួ ឆាត់ទ្រី អាយុ៣២ឆ្នាំ អ្នកទាំង៣ជាបងប្អូនបង្កើតនឹងគ្នា និងជាម្ចាស់សិប្បកម្ម «ចម្លាក់បន្ទាយស្រីរចនា២» មានទីលំនៅភូមិទ្រាំង ឃុំស្លក្រាម ស្រុកសៀមរាប ខេត្តសៀមរាប ។
លោកឱម ចន្ថា ជួសមុខអាជ្ញាធរបានសម្តែងនូវក្តីរីករាយជាខ្លាំងចំពោះសប្បុរសជនទាំង៣រូបខាងលើដែលបានគាំទ្រ និងចែករំលែកធនធានផ្ទាល់ខ្លួន ដើម្បីចូលរួមក្នុងការអភិរក្សមច្ឆជាតិឱ្យមានការរីកចម្រើនឡើងវិញ៕
ចែករំលែកព័តមាននេះ