ខេត្តបន្ទាយមានជ័យ ៖ កុមារាម្នាក់មានអាយុទើបតែ ១ឆ្នាំ៨ខែ ខណៈឪពុកម្ដាយទុក ឱ្យនៅលេងមុខផ្ទះតែម្នាក់ឯង បានលង់ទឹកស្រះមុខផ្ទះស្លាប់ ។ ហេតុការណ៍នេះបានកើតឡើងនៅភូមិឈ្នូរ ឃុំឈ្នួរមានជ័យស្រុក ព្រះនេត្រព្រះហើយសពក្មេងប្រុសត្រូវឃើញបានប្រទះនៅវេលាម៉ោង ៦និង១៥នាទីព្រឹក ថ្ងៃទី៤ កុម្ភៈ ឆ្នាំ២០១២ ។
លោកវរសេនីយ៍ត្រី កែវ ប៊ុនយឿន អធិការនគរបាលស្រុកព្រះនេត្រ បានឱ្យដឹងថា បើតាមឪពុកឈ្មោះ សួន សុភារិន អាយុ២៣ឆ្នាំ និងម្ដាយឈ្មោះ ស៊ិន ចាន់ថន អាយុ២១ឆ្នាំ និយាយថា កូនប្រុសគាត់ដែលស្លាប់នេះឈ្មោះ រុន វិញ អាយុ១ឆ្នាំ៨ខែ ។ មុនពេលកើតហេតុគាត់ពួកទាំង២នាក់បានទុកកូនឱ្យលេងនៅហើយជាប់រវល់ធ្វើការងារនៅលើផ្ទះ លុះពេលចប់កិច្ចការចុះមកមើលកូនស្រាប់តែបាត់មិនឃើញ ហើយពេលដើរទៅជិតមុខផ្ទះស្រះក៏ឃើញកូនរបស់គាត់ស្លាប់អណ្ដែតក្នុងទឹកដែលមានជម្រៅជាង ២ម៉ែត្រ ។
លោកអធិការនគរបាលស្រុកបានបន្ដថា ការស្លាប់របស់កុមារារងគ្រោះគឺជាការធ្វេសប្រហែស របស់ឪពុកម្ដាយដែលខ្វះការយកចិត្តទុកដាក់មើលកូនឱ្យបានដិតដល់ ។ សពកុមារារងគ្រោះត្រូវបានរៀបចំចាត់ចែងធ្វើបុណ្យទៅតាមប្រពៃណី ៕
ចែករំលែកព័តមាននេះ