ខេត្តស្ទឹងត្រែង ៖ ស្រ្តីមេម៉ាយម្នាក់ត្រូវគេដុតខ្លោចខ្មៅរលពាក់កណ្តាលខ្លួនស្លាប់យ៉ាងខ្លោចផ្សាក្នុងភ្នក់ចំបើងគួរឲ្យរន្ធត់ និងអាណោធអាធ័មបំផុត ដែលសង្ស័យថា ត្រូវគេចាប់រំលោភរួចសម្លាប់បំបិទភស្តុតាង។ សពត្រូវគេប្រទះឃើញកាលពីវេលាម៉ោង៣និង៣០នាទីរសៀលថ្ងៃទី៥ កុម្ភៈ ២០១២ ស្ថិតក្នុងភូមិស្រែក្រសាំង ឃុំស្រែងក្រសាំង ស្រុកសៀមបូក។
ប្រភពពីអ្នកភូមិស្រែក្រសាំងបាននិយាយថា ស្រ្តីម្នាក់នេះមិនដែលមានបញ្ហាជាមួយអ្នកភូមិណាម្នាក់ទេកន្លងមក។ មុនថ្ងៃកើតហេតុ១ថ្ងៃ មានកម្មវិធីរាំរែកអង្គាសបច្ច័យកសាងវត្តស្រែក្រសាំង។ ស្រ្តីរងគ្រោះក៏បានទៅលេងកម្សាន្តក្នុងកម្មវិធីនោះដែរ តែក្រោមមកទៀតគេបានឃើញស្រ្តីរងគ្រោះទៅទិញពងទាកូនយកទៅផ្ទះ។
ស្ត្រីរងគ្រោះឈ្មោះវ៉ាង កង អាយុ៣១ឆ្នាំ រស់នៅភូមិ-ឃុំកើតហេតុខាងលើ ។ ស្ត្រីឈ្មោះវ៉ាង កុល ត្រូវជាបងបានឱ្យដឹងថា នៅម៉ោង១០យប់ពេលចេញពីរាំត្រឡប់ទៅផ្ទះស្រ្តីរងគ្រោះបានដើរទៅទិញពងទាកូនផ្ញើម្តាយ តែស្រាប់តែទៅបាត់រហូត លុះព្រឹកឡើងបានដើររកតាមរយៈអ្នកស្គាល់គ្នាក្នុងភូមិតែគ្មានដំណឹង។ រហូតមកដល់វេលាម៉ោង៣រសៀល ក៏ប្រទះឃើញស្លាប់នៅកណ្តាលវាលស្រែក្នុងភ្នក់ចំបើងទៅវិញ។ នៅកន្លែងកើតហេតុបានឃើញពងទាកូនស្ងោរ និងឃើញមានស្នាមអូសចេញពីខ្ទម១ចម្ងាយ១០០ម៉ែត្រពីកន្លែងកើតហេតុ ។
ទោះបីបែបណាមិនទាន់មានការបញ្ជាក់ពីសមត្ថកិច្ចអំពីតម្រុយនៃការស្លាប់របស់ស្រ្តីរងគ្រោះនេះនៅឡើយទេ តែមន្ត្រីនគរបាលព្រហ្មទណ្ឌកម្រិតធ្ងន់នៃស្នងការដ្ឋានខេតកំពុងស្រាវជ្រាវយ៉ាងសកម្មក្នុងករណីឃាតកម្មនេះ៕
ចែករំលែកព័តមាននេះ