ក្រុងប៉ោយប៉ែត ៖ ភ្លើងស្នេហ៍ ពិតជាមិនធម្មតាមែន កាលណាវាពុះកញ្ជ្រោលឡើងប្រាកដជាមិនអាចទប់កំហឹងបានឡើយ និងធ្វើឱ្យមានបញ្ហាគ្រប់វិនាទី ។ ជាក់ស្តែងបុរសជាប្តីដើមបានចាក់ប្តីចុងមួយកាំបិតជាប់ពោះមិនអាចដករួចព្រោះតែភ្លើងប្រចណ្ឌ កាលពីវេលាម៉ោង១០យប់ថ្ងៃទី៣ កុម្ភៈ ២០១២ នៅភូមិប៉ោយប៉ែត សង្កាត់ប៉ោយប៉ែត ក្រុងប៉ោយប៉ែត ។
ជនរងគ្រោះជាប្តីចុងឈ្មោះហ៊ាន សាវុធ អាយុ២៤ឆ្នាំ ជាកម្មករ មានទីលំនៅក្នុងភូមិកើតហេតុខាងលើ ត្រូវជនដៃដល់ជាប្តីដើមឈ្មោះកែវ វុទ្ធី អាយុ២៨ឆ្នាំ ចាក់ឱ្យរបួសត្រង់ពោះខាងឆ្វេង នឹងកូនកាំបិតជាប់ពោះតែម្តង ។ តាមប្រភពពីអ្នកស្រុកនិយាយថា ហេតុការណ៍នេះកើតឡើងដោយសារភ្លើងប្រចណ្ឌ គឺប្តីដើមមិនអស់អាល័យ ព្រោះស្ត្រីជាប្រពន្ធលួចយកប្តីចុងមួយទៀត រហូតមានផ្ទៃពោះ៧ខែទៀតផង។ ប្រភពបន្តទៀតថា មុនហេតុការណ៍កើតគេបានឮសំឡេងប្តីចុង និងប្តីដើមឈ្លោះគ្នាមុខផ្ទះម្តាយឪពុកនាងជាប្រពន្ធ ដោយបបួលវាយ និងចាក់គ្នា ហើយមួយសន្ទុះក្រោយមកក៏ផ្ទុះអំពើហិង្សាតែម្តង បណ្តាលឱ្យប្តីចុងដេកដួលនឹងដីភ្ញាក់ផ្អើលដល់អ្នកស្រុក ។ តាមការឱ្យដឹងពីឈ្មោះវឿន វី អាយុ២៩ឆ្នាំ ត្រូវជាប្រពន្ធជនរងគ្រោះបានអះអាងថា នាងនិងប្តីដើមឈ្មោះកែវ វុទ្ធី បានលែងលះគ្នាជិត៣ឆ្នាំហើយ ទើបនាងយកប្តីក្រោយទៀត ។ ទោះបីជាបែបណាជនដៃដល់ និងបក្សពួកម្នាក់ទៀតឈ្មោះឌី វុធ ត្រូវបានកម្លាំងកងរាជអាវុធហត្ថក្រុងប៉ោយប៉ែត ចាប់ខ្លួនបានកាលពីវេលាម៉ោង៨យប់ថ្ងៃទី៤ កុម្ភៈ ២០១២ បន្ទាប់ពីបង្កហិង្សាបាន១ថ្ងៃនៅក្នុងភូមិកើតហេតុខាងលើ។
កែវ វុទ្ធី ជាប្តីដើម បានប្រាប់នគរបាលថា ខ្លួននៅស្រឡាញ់ប្រពន្ធ ហើយប្រាប់ទៀតថា ពីមុនខ្លួន និងស្ត្រីជាប្រពន្ធនៅធ្វើការ ឯស្រុកថៃ ហើយខ្លួនឱ្យប្រពន្ធមកស្រុកខ្មែរ មុនរយៈពេល១០ខែ គិតត្រឹមថ្ងៃកើតហេតុ ។ លុះខ្លួនត្រឡប់មកដល់ប៉ោយប៉ែតវិញ បែរជាឃើញប្រពន្ធមានប្តីថ្មី រហូតមានផ្ទៃ ពោះទៀតផង ទើបទ្រាំមិនបាន ព្រោះពេលសួរនាំប្តីចុងគេបបួលកាប់ចាក់ ទើបខ្លួនចាក់មុនមួយកាំបិតតែម្តង ៕
ចែករំលែកព័តមាននេះ