ក្រុងប៉ោយប៉ែត ៖ មន្ត្រីជំនាញគយ និងរដ្ឋាករច្រកទ្វារអន្តរជាតិប៉ោយប៉ែតសហការជាមួយមន្ត្រីនគរបាលអន្តោប្រវេសន៍ចុះបង្រ្កាបរថយន្តដឹកហ្គាសគេចពន្ធនាំចូលពីប្រទេសថៃខុសច្បាប់ចំនួន៨គ្រឿងសុទ្ធតែម៉ាកកាមរី ហើយការដឹកគេចពន្ធនេះ គឺពួកគេបូមហ្គាសដាក់ក្នុងរ៉េសឺវ័រ បន្លំភ្នែកសមត្ថកិច្ចថា រថយន្តទាំងនេះប្រើហ្គាសតែធាតុពិតពួកគេយកទៅបូមលក់ឱ្យឈ្មួញហ្គាសនៅតាមដេប៉ូ ។
តាមការបំភ្លឺពីលោកលឹម វណ្ណនី មន្ត្រីគយឈរជើងនៅមាត់ច្រកទ្វារអន្តរជាតិប៉ោយប៉ែតបានឱ្យដឹងថា ការចុះបង្ក្រាបរថយន្តរបស់ក្រុមឈ្មួញរកស៊ីដឹកហ្គាសគេចពន្ធខុសច្បាប់នេះ គឺយោងតាមបទបញ្ជារបស់ថ្នាក់ដឹកនាំយ៉ាងតឹងរឹុងបំផុតឱ្យមន្ត្រីជំនាញគយទាំងអស់ដែលឈរជើងប្រចាំច្រកទ្វារអន្តរជាតិប៉ោយប៉ែតខិតខំយកចិត្តទុកដាក់ធ្វើយ៉ាងណាជួយទប់ស្កាត់នូវរាល់បទល្មើសគេចពន្ធខុសច្បាប់នេះឱ្យខាងតែបាន ដើម្បីកុំឱ្យបាត់ចំណូលថវិការដ្ឋតទៅទៀត ។
លោកបន្តថា ក្នុងរយៈពេលពីរថ្ងៃចាប់ពីវេលាម៉ោង៦និង៣០នាទីល្ងាចថ្ងៃទី៤ រហូតដល់ល្ងាចថ្ងៃទី៥ កុម្ភៈ ២០១២ ក្រុមមន្ត្រីជំនាញគយរបស់លោកបានឃាត់ចាប់រថយន្តម៉ាកកាមរីដឹកហ្គាសគេចពន្ធខុសច្បាប់ចូលមកពីប្រទេសថៃតាមច្រកទ្វារអន្តជាតិប៉ោយប៉ែត សរុបមានចំនួន៨គ្រឿងដែលរថយន្តទាំងអស់នេះសុទ្ធតែជាមុខសញ្ញាប្រព្រឹត្តល្មើសខុសច្បាប់ ហើយនៅក្នុងរថយន្តខ្លះមានកែច្នៃធុងហ្គាស (ដាក់ក្នុងរ៉េសឺវ័រ)បញ្ចូលគ្នាតែមួយដាក់ក្នុងរថយន្តពីរទៅបីធុងផងដែរ ។ បន្ទាប់មកត្រូវបានមន្ត្រីជំនាញរបស់លោកឃាត់ចាប់បញ្ជូនយកមករក្សាទុកនៅទីស្នាក់ការគយ និងរដ្ឋាករច្រកទ្វារអន្តរជាតិប៉ោយប៉ែត ដើម្បីចាត់ការតាមច្បាប់ ៕
ចែករំលែកព័តមាននេះ