រាជធានីភ្នំពេញ ៖ រថយន្តកាមរីឆ្លាមពណ៌ ស្ករ មួយគ្រឿង ដែលម្ចាស់ស្រវឹង ទើបចេញពីផឹកបានបើកបោះពួយបុកម៉ូតូកង់៣ (តុកៗ) បណ្តាលឱ្យអ្នកជិះលើរ៉ឺម៉កម៉ូតូរងរបួសស្រាល៦នាក់ ហើយរថយន្តបានផ្ទុះកង់ក្រឡាប់ផ្ងារកង់ទៅលើតុកៅអីអ្នកលក់បង្អែមតាមដងផ្លូវធ្វើឱ្យអ្នកបើកបររងរបួសស្រាលផងដែរ ។ ទោះបីជាយ៉ាងណា ពុំបង្កឱ្យមនុស្សរងរបួសដល់អាយុជីវិតឡើយ ។
គ្រោះថ្នាក់ចរាចរណ៍នេះបានកើតឡើងកាលពីវេលាម៉ោង៧និង៤០នាទីយប់ថ្ងៃទី៥ កុម្ភៈ នៅតាមផ្លូវជាតិលេខ៥ មុខប៉ុស្តិ៍នគរបាលសង្កាត់ទួលសង្កែឈៀងខាងជើងក្នុងសង្កាត់ទួលសង្កែ ខណ្ឌឫស្សីកែវ រាជធានីភ្នំពេញ។ បន្ទាប់ពីបង្កគ្រោះថ្នាក់អ្នកបើកបររថយន្តបានលូនចេញតាមកញ្ចក់ ហើយត្រូវប៉ូលិសប៉ុស្តិ៍ទួលសង្កែ ឃាត់ខ្លួនភ្លាមៗ ។
តាមសាក្សីនៅកន្លែងកើតហេតុបានឱ្យដឹងថា នៅមុនពេលកើតហេតុរថយន្តម៉ាកកាមរីឆ្លាម ពណ៌ស្ករខាងលើ បានធ្វើដំណើរតាមផ្លូវលេខ៥ ក្នុងទិសដៅមកពីជើងទៅត្បូងចូលរាជធានីភ្នំពេញ ។ នៅពេលធ្វើដំណើរមកដល់កន្លែងកើតហេតុ ស្រាប់តែរថយន្តបុកម៉ូតូកង់៣ ដែលធ្វើដំណើរស្របគ្នាកំពុងបង្អន់ល្បឿនចំកង់ក្រោយឆ្វេង ហើយរុញម៉ូតូចូលខាង បណ្តាលឱ្យមនុស្សជិះចំនួន៦នាក់ ទាំងអ្នកបើកបរខ្ទាតចេញរដូករណែលរងរបួសស្រាល ហើយម៉ូតូកង់៣បានទៅប៉ះអ្នកហូបបង្អែមម្នាក់ទៀត ប៉ុន្តែមិនរងរបួសអ្វីទេ ។ បន្ទាប់ពីបើកបុកម៉ូតូកង់៣ រថយន្តបានផ្ទុះកង់មុខខាងស្តាំលាន់ឮកក្រើក ហើយក្រឡាប់ផ្ញារកង់ទៅបោកលើតុកៅអីអ្នកលក់បង្អែមតាមចិញ្ចើមផ្លូវ ៕
ចែករំលែកព័តមាននេះ