រាជធានីភ្នំពេញ ៖ ទំនាស់តិចតួចរវាងអ្នករស់នៅផ្ទះជាប់គ្នាដែលមិនអាចផ្សះផ្សាគ្នាបានទីបញ្ជាប់បង្កជាអំពើហិង្សាកាលវេលាពីម៉ោង១១និង៣០នាទីយប់ថ្ងៃទី៣ កុម្ភៈ នៅភូមិទួលរកាសង្កាត់ចាក់អង្រែក្រោម ខណ្ឌមានជ័យ ។
ម្ចាស់លំនៅឋានដែលមានទំនាស់ខាងលើនេះឈ្មោះឈង បូរិន ភេទប្រុស អាយុ៤៣ឆ្នាំឋានន្តរស័ក្តិនាយរងនគរបាលប៉ុស្ដិ៍ចាក់អង្រែលើ ។ ចំណែកភាគីម្ខាងទៀតឈ្មោះ ស្រី រតនៈហៅម៉ៅ ភេទប្រុស អាយុ៣០ឆាំ្ន បម្រើការងារនៅក្រុមហ៊ុន STR និងជាមន្រ្ដីយោធា ។
តាមប្រភពព័ត៌មានទាក់ទិននឹងហេតុការណ៍ហិង្សារវាងប៉ូលិសនិងយោធាខាងលើនេះបានឱ្យដឹងថា នៅយប់កើតហេតុលោកម៉ៅ បានធ្វើកម្មវិធីផឹកស៊ីច្រៀងរាំ បង្កការរំខានដល់ការរស់នៅរបស់អ្នកជិតខាងដែលមានទីលំនៅជាប់គ្នា ។ ខណៈនោះដោយស្ថានភាពយប់ជ្រៅទៅភរិយាលោក ឈង បូរិន បានទូរស័ព្ទ ហៅប្ដីដែលជាប់បំពេញការងារការពារសន្ដិសុខនៅក្នុងភូមិសាស្រ្ដសង្កាត់ចាកអង្រែលើឱ្យមកផ្ទះដើម្បីជួយមើលកូនដែលមានជំងឺហើយដេកមិនបានដោយសារអ្នកជិតខាងផឹកស៊ីឡូឡាបំពងសំឡេងរំខានដល់ការដេកពួន ។ ភ្លាមនោះលោក ឈង បូរិន បានជិះម៉ូតូឆ្ពោះទៅលំនៅឋាន ។ នៅពេល ទៅដល់ផ្ទះក៏ត្រូវភាគីលោក ម៉ៅដែលផឹកស៊ីស្រវឹងជោកគ្រប់ៗគ្នានោះបានជេរប្រមាថនិង ស្ទុះមកវាយលោកឈង បូរិន និងភរិយារួូមជាមួយបំផ្លាញទ្រព្យសម្បតិ្តមួយចំនួនបណ្ដាលឱ្យខូចខាត់និងរងរបួស ។
ស្របពេលជាមួយគ្នានោះនគរបាលប៉ុស្ដិ៍ចាក់អង្រែក្រោមពីរនាក់បានចុះទៅជួយអន្ដរាគមន៍ហើយបានដកកាំភ្លើងបាញ់ឡើងលើចំនួនពីរគ្រាប់ដើម្បីជាសញ្ញាឱ្យភាគីទាំងសងខាងបញ្ឈប់អំពើហិង្សាដាក់គ្នា ។
ចំពោះករណីខាងលើនេះភាគីលោកឈង បូរិនបានប្តឹងចោទប្រកាន់លើលោកស្រី រតនៈ ហៅម៉ៅពីបទជេរប្រមាថនិងប៉ុនប៉ងមនុស្សឃាតមកលើគ្រួសារលោក ។ ចំណែកឯភាគីលោកស្រី រតនៈពុំអាចទំនាក់ទំនងសុំការបំភ្លឺបានទេ ។
គួរបញ្ជាក់ថា ការទំនាស់ហិង្សាខាងលើនេះបានកើតចេញពីទំនាស់តិចតួចរវាងអ្នករស់នៅជិតខាងគ្នាហើយមិនអាចផ្សះផ្សាគ្នាបានក៏ពូនផ្ដុំផ្សំជាហិង្សាដាក់គ្នា។ការរស់នៅជិតខាងដែលគ្មានការយោគយល់គ្នាទេពិតជាជួបបញ្ហាប្រឈមមុខដាក់គ្នានិងឈានដល់ការប្រើហិង្សាមិនខាន់ ៕
ចែករំលែកព័តមាននេះ