រាជធានីភ្នំពេញ ៖ លទ្ធផលនៃការប្រកួតប្រដាល់នៅលើស្វៀនស្ថានីយទូរទស្សន៍ប៉ុស្តិ៍លេខ៣ជាលក្ខណៈអន្តរជាតិ កាលពីរសៀលថ្ងៃទី៤កុម្ភៈ កន្លងមកនេះ កីឡាករZHANG CHUNYU ជនជាតិចិន បានយកស្មើជាមួយឡុង សុវណ្ណឌឿន មកពីក្លឹបសាលវ័ន្តកីឡា ឯPONG THONG JETSADA កីឡាករថៃ យកឈ្នះផុន ផាន់ណា មកពីក្លឹបអប្សរាគុនខ្មែរ ដោយពិន្ទុ ។ ជើងខ្លាំងZHANG CHUNYU មានស្នៀតប្រយុទ្ធល្អ ជាពិសេសស្នៀតកណ្តាប់ដៃរបស់គេ អាចវាយចេញបានរហ័សនិងចំទិសដៅដៅល្អ ទៀតផង ។
សុវណ្ណឌឿន ព្យាយាមបញ្ចេញស្នៀតជើងទាត់ចេញយ៉ាងរហ័ស តែរាល់លើកត្រូវZHANG CHUNYU ទាត់សងវិញ ភ្លាមៗតែម្តង ។ សុវណ្ណឌឿន បានរុលចូលសាជាថ្មីនៅទឹកទី៣និងទី៤ តែស្នៀតកណ្តាប់ដៃ របស់ ZHANG CHUNYU ក៏អស្ចារ្យណាស់ដែរ បានវាយបកសងវិញយ៉ាងរហ័សបណ្តាលឱ្យចូលមុខសុវណ្ណឌឿន ពេញៗតែម្តង ។ ក្នុងការប្រកួត៥ទឹកពេញ ទាំងកម្លាំងស៊ុហ្វនិងល្បិចប្រយុទ្ធគឺប្រហាក់ប្រហែលគ្នា ។ នៅទឹកទី៥ ការវាយចេញរបស់ ZHANG CHUNYU បានល្អជាង ប៉ុន្តែការកាត់ក្តីឱ្យស្មើរបស់អាជ្ញាកណ្តាលគឺជារឿងត្រឹមត្រូវបំផុត ។
PONG THONG JETSADA បន្ទាប់ពីបានយកឈ្នះកីឡាករជើងខ្លាំងកម្ពុជា២រូប រួចមកហើយនោះ លើកនេះគេបានផ្តួលផុន ផាន់ណា ម្នាក់ទៀតហើយ ។ នៅទឹកទី១ និងទី២ ផាន់ណា ហាក់ដូចជាមានការកោតញញើត JETSADA ខ្លាំងណាស់ ដូច្នេះគេមិនហ៊ានចូលកៀក ផ្តេសផ្តាសឡើយ ព្រោះខ្លាចស្នៀតកណ្តាប់ដៃ របស់JETSADA ដែលអាចវាយចេញបានលឿន ហើយរហ័សទៀតផង ។
JETSADA ធ្លាប់បញ្ជូនស្នៀតកណ្តាប់ដៃវាយផ្តួលពេជ្រ សីហា មកពីក្លឹបកងយោធពលខេមរភូមិន្ទ ឱ្យចាញ់ដោយពិន្ទុរួចម្តងមកហើយ។ នៅទឹកទី៤និងទី៥ JETSADA មិនសូវវាយសម្រុកទេ ប៉ុន្តែផុន ផាន់ណា ក៏មិនហ៊ានចូលកៀកដែរ គឺគេព្យាយាមទាត់ចេញពីចម្ងាយម្តងម្កាលដើម្បីទប់ស្កាត់ស្ថានភាពឱ្យបានល្អតែប៉ុណ្ណោះ ។ អ្នកទស្សនាភាគច្រើននិយាយថា លើកនេះផុន ផាន់ណា មានឱកាសយកស្មើ JETSADA គឺជារឿងមិនធម្មតាឡើយ ។
កន ចន្ថា មកពីក្លឹបអាជ្ញាធរជាតិអាវុធគីមីបានយកឈ្នះអ៊ឹង បូរិន មកពីក្លឹបគជសារកីឡា។ អាំង សំអាត មកពីក្លឹបតាព្រហ្មមានជ័យ យកឈ្នះខុន ស៊ីចាន់ មកពីក្លឹបកងពលធំអន្តរាគមន៍ លេខ៣ព្រះវិហារ ដោយពិន្ទុ ។ ចាន់ វិបុល មកពីក្លឹបក្រសួងមហាផ្ទៃ ប្រកួតជាលក្ខណៈសាកលអាជីពយកឈ្នះវី សាវុធ មកពីក្លឹបឥន្ទ្រីកីឡា ដោយពិន្ទុ៕
ចែករំលែកព័តមាននេះ