រាជធានីភ្នំពេញ ៖ បុរសម្នាក់ដែលគេស្គាល់ថា ជាមន្ត្រីកងរាជអាវុធហត្ថ ព្រោះតែរឿងប្រចណ្ឌប្រពន្ធក៏មានការព្យាយាមបើករថយន្តដេញតាមពីក្រោយ ខណៈស្ត្រីជាភរិយាកំពុងបើករថយន្តម៉ាកឡង់រ៉វែ រីឯខ្លួនឯងបើករថយន្តកូរ៉ូឡា ពណ៌ស្លែ តាមបុកនិងកៀរឱ្យឈប់ដើម្បីសួរនាំធ្វើឱ្យផ្អើលអ្នកធ្វើដំណើរនិងស្ទះចរាចរណ៍នៅខាងលិចស្តុបផ្សារដីហុយតាមបណ្តោយផ្លូវសហព័ន្ធរុស្ស៊ីស្ថិតក្នុងភូមិស្លែងរលើង សង្កាត់ទឹកថ្លា ខណ្ឌសែនសុខ នៅវេលាម៉ោង១០និង៥០នាទីថ្ងៃទី៣ កុម្ភៈ ឆ្នាំ២០១២។
ទោះបីជាយ៉ាងណា សមត្ថកិច្ចបាននាំខ្លួនបុរសជាប្តីជាមួយរថយន្តកូរ៉ូឡាទៅកាន់អធិការដ្ឋានខណ្ឌសែនសុខ ដោយសមត្ថកិច្ចសំអាងថា សកម្មភាពបែបនេះបានធ្វើឱ្បប៉ះពាល់ដល់សណ្តាប់ធ្នាប់លើផ្លូវសាធារណៈ ប៉ុន្តែចំណែកស្ត្រីជាប្រពន្ធបានបញ្ជាឱ្យអ្នកបើករថយន្តបើកចេញទៅបាត់ទៅ ប៉ុន្តែក្រោយមកក៏ត្រូវបានសមត្ថកិច្ចកោះហៅឱ្យមកធ្វើការដោះស្រាយគ្នា ។ មន្ត្រីប៉ូលិសបានប្រាប់ឱ្យដឹងថា នេះជារឿងរ៉ាវប្តីប្រពន្ធទេ ។
នៅកន្លែងកើតហេតុ បុរសជាប្ដីដោយដៃមានហូរឈាមដោយសាររបួសបានព្យាយាមមិនឱ្យអ្នកកាសែតថតរូបនិងមិនប្រាប់ពីមូលហេតុដល់អ្នកកាសែតនោះទេ ប៉ុន្ដែប្រភពព័ត៌មានពីមន្ដ្រីប៉ូលិសដែលបានចុះទៅធ្វើអន្ដរាគមន៍ដល់កន្លែងកើតហេតុបានឱ្យដឹងថា ទង្វើរបស់បុរសជាប្ដីខាងលើ ព្រោះតែប្រចណ្ឌប្រពន្ធដែលកំពុងជិះរថយន្ដជាមួយបុរសផ្សេងក៏កើតជាការក្ដៅក្រហាយតាមរករឿងបើករថយន្តដេញបុកបែបនេះ។ ប៉ុន្ដែប្រភពព័ត៌មានពីមន្ដ្រីកងរាជអាវុធហត្ថដែលស្និទ្ធនឹងស្ដ្រីជាប្រពន្ធបានបង្ហើបឱ្យកោះសន្ដិភាពដឹងថា ប្ដីប្រពន្ធ១គូនេះមាន ទំនាស់ឈ្លោះទាស់ទែងគ្នា ហើយបានប្ដឹងលែងលះនិងចែកទ្រព្យសម្បត្ដិគ្នានៅសាលាដំបូងរាជធានី តែតុលាការមិនទាន់ចាត់ការបែបណានៅឡើយទេ ។ បុរសជាប្តីមានអាយុប្រមាណ៣០ផ្លាយឆ្នាំ ជាមន្ដ្រីកងរាជអាវុធហត្ថពាក់ស័ក្ដិ៣ បម្រើការងារនៅស្រុកអង្គស្នួល ខេត្ដកណ្ដាល រីឯប្រពន្ធមានអាយុ៣៣ឆ្នាំមានមុខរបរលក់ដែកនៅសង្កាត់ចោមចៅ ខណ្ឌពោធិ៍សែនជ័យ។ប្រភពពីភាគីខាងប្រពន្ធបានឱ្យដឹងដថាមូលហេតុនៃការប្តឹងលែងលះគ្នានេះដោយសារប្រពន្ធរងការធ្វើបាបពីប្ដីពេកធ្វើឱ្យស៊ូទ្រាំពុំបាន ហើយនៅយប់ថ្ងៃទី២ កុម្ភៈ ប្ដីនេះបានដឹកប្រពន្ធតាមរថយន្ដលើផ្លូវជាតិលេខ៤ហើយមានការជជែកឈ្លោះទាស់ទែងគ្នានៅលើរថយន្ដ ស្រាប់តែទៅដល់ម្ដុំពេជ្រនិលក៏បានដកកាំភ្លើងភ្ជង់គំរាមរកបាញ់សម្លាប់ប្រពន្ធធ្វើឱ្យប្រពន្ធភ័យខ្លាចក៏បើករថយន្ដត្រឡប់មកវិញ។
ប្រភពទៀតថា ដោយភ័យខ្លាចនិងការគំរាមរបស់ប្ដី ប្រពន្ធបានបើករថយន្ដម៉ាកឡង់រ៉ូវែទៅពឹងមន្ដ្រីកងរាជអាវុធហត្ថរាជធានីម្នាក់នៅព្រឹកថ្ងៃទី៣ កុម្ភៈ សុំឱ្យមន្ដ្រីកងរាជអាវុធហត្ថ២នាក់ជួយការពារសន្ដិសុខនិងបើករថយន្ដជូន ព្រោះខ្លាចប្ដីតាមធ្វើបាប ។ ប៉ុន្ដែនៅមុនពេលកើតហេតុខាងលើមន្ដ្រីកងរាជអាវុធហត្ថបានបើករថយន្ដឡង់រ៉ូវែនោះដឹកស្ដ្រីជាប្រពន្ធតាមបណ្ដោយផ្លូវសហព័ន្ធ រុស្ស៊ីពីលិចទៅកើត ស្រាប់តែរថយន្ដកូរ៉ូឡាបានបើកមកកៀររថយន្ដឡង់រ៉ូវែនេះនៅចំណុចមុខក្រុមហ៊ុនអ៊ែតវូដ ។ ប៉ុន្ដែអ្នកបើកបររថយន្ដឡង់រ៉ូវែមិនចាប់អារម្មណ៍ដោយស្មានថា គេបើកមកប៉ះរថយន្ដតិចតួចក៏បើកបន្ដទៅមុខទៀតស្រាប់តែមកដល់ចំណុចខាងលិចស្ដុបផ្សារដីហុយត្រូវរថយន្ដកូរ៉ូឡានេះឈប់កាកពីមុខ ហើយឃើញបុរសម្នាក់ចុះពីរថយន្ដក្នុងទឹកមុខមាំដើរមកចង្អុលនិងជេរប្រមាថទៅលើប្រពន្ធនិងបានទាញ ទ្វារបើកដើម្បីឱ្យប្រពន្ឋចុះពីរថយន្តតែត្រូវជាប់សោមិនអាចបើកបានធ្វើឱ្យបុរសជាប្ដីឈរនិយាយនៅក្បែរមាត់ទ្វារថយន្ដដោយឱ្យប្រពន្ធបើកទ្វារចុះមកនិយាយគ្នាតែប្រពន្ធនៅតែមិនបើកទ្វាចុះដោយឱ្យអ្នកបើកបររថយន្ដបង្ហើបកញ្ជក់ដើម្បីនិយាយជាមួយព្រោះខ្លាចប្ដីប្រើអំពើហិង្សា។ស្រាប់តែប្ដីឃើញដូច្នេះបានចាប់ទាញកញ្ចក់រថយន្ដបណ្ដាលឱ្យបែកមុតដៃខ្លួនឯងតែម្ដង។ ឃើញបែបនេះប្រពន្ធបានបើកទ្វារម្ខាងទៀតចុះពីរថយន្ដហើយប្ដីក៏ស្ទុះមករកប្រពន្ធ ឯប្រពន្ឋរត់ជុំវិញរថយន្ដលោតឡើងជិះរថយន្ដវិញ រួចបញ្ជាឱ្យតៃកុងបើករថយន្ដចេញទៅ ។
ភាពផ្អើលឆោឡោបានកើតឡើងធ្វើឱ្យសមត្ថកិច្ចចុះទៅដល់កន្លែងកើតហេតុហើយធ្វើការសួរនាំបុរសជាប្ដីនិងបាននាំរថយន្ដនិងបុរសរូបនោះទៅអធិការដ្ឋានខណ្ឌភ្លាមៗដែរ។ ដោយមានការធានាតាមរយៈមេធាវីបុរសជាប្ដី ក្រោយពីសមត្ថកិច្ចធ្វើការសួរនាំអស់រយៈពេលប្រមាណជាង១ម៉ោងក៏ឱ្យត្រឡប់ទៅផ្ទះវិញដោយទុកបញ្ហានេះឱ្យតុលាការជាអ្នកសម្រេច ៕
ចែករំលែកព័តមាននេះ