រាជធានីភ្នំពេញ ៖ គូស្នេហ៍វ័យក្មេង១គូដែលកំពុងអង្គុយនិយាយសាសងគ្នាពេលយប់ងងិត នៅកន្លែងស្ងាត់ត្រូវបានក្រុមចោរប្លន់ធ្វើសកម្មភាពកាប់ប្រហារបណ្តាលឱ្យយុវជនស្លាប់បាត់បង់ជីវិតភ្លាមៗនៅនឹងកន្លែង ។ ឯនាងជាសង្សារក៏រងរបួសយ៉ាងធ្ងន់ធ្ងរផងដែរ ត្រូវបានគេបញ្ជូនទៅសង្គ្រោះនៅមន្ទីរពហុព្យាបាល និងសម្ភពចោមចៅ ។ ចំណែកក្រុមចោរដ៏សាហាវនោះបានយកម៉ូតូរបស់ពួកគេមួយគ្រឿងម៉ាកហុងដា ធុន C125 ស៊េរីឆ្នាំ២០១០គេចខ្លួនទៅបាត់ដោយសុវត្ថិភាព ។ នេះជាហេតុការណ៍ថ្មីមួយទៀតនៃសកម្មភាពប្លន់យកម៉ូតូគូស្នេហ៍ បន្ទាប់ពីក្រុមចោរមួយសំបុកត្រូវបានបំបែកដោយចាប់ខ្លួនចោរស្រី ប្រុស២នាក់ និងរត់គេចខ្លួន៣នាក់ ។
ហេតុការណ៍ដដែលៗនេះបានកើតឡើងកាលពីវេលាម៉ោង៨ និង១៥នាទីយប់ថ្ងៃទី២ កុម្ភៈ ឆ្នាំ២០១២ នៅចំណុចខាងជើងព្រះវិហារអ៊ិស្លាមកម្ពុជា-គូវ៉េត ស្ថិតក្នុងភូមិត្រពាំងទា សង្កាត់ត្រពាំងក្រសាំង ខណ្ឌពោធិ៍សែនជ័យ រាជ ធានីភ្នំពេញ ។ គូស្នេហ៍ដែលស្លាប់ និងរបួស ដោយសារក្រុមចោរកាប់ប្លន់នោះខាងប្រុសឈ្មោះឌុល ភូមិម៉ារ៉ា អាយុ២៤ឆ្នាំ ជាកម្មកររោងចក្រកាត់ដេរ មានស្រុកកំណើតភូមិកម្មករ ឃុំសំឡាញ ស្រុកអង្គរជ័យ ខេត្តកំពត សព្វថ្ងៃស្នាក់នៅផ្ទះជួលម្តុំផ្សារឯករាជ្យ២ ភូមិព្រៃព្រីង ខាងជើង សង្កាត់ចោមចៅ ខណ្ឌពោធិ៍សែនជ័យ ស្លាប់នៅនឹងកន្លែង ។ ចំណែកឯនាងជាសង្សារឈ្មោះស៊ី តាត អាយុ១៩ឆ្នាំ មុខរបរកម្មការិនីរោងចក្រកាត់ដេរ មានស្រុកកំណើតភូមិចំបក់ បញ្ញា ឃុំបន្ទាយស្ទោង ស្រុកស្ទោង ខេត្តកំពង់ធំ និងស្នាក់នៅផ្ទះជួល ភូមិព្រៃព្រីងខាងជើង សង្កាត់ចោមចៅ រងរបួសក្បាលយ៉ាងធ្ងន់ធ្ងរ ដេរជាង១០ថ្នេរ ។ ដោយឡែកក្រុមចោរប្លន់មានគ្នា២នាក់ ថ្មើរជើងប្រដាប់ដោយកាំបិតបានសំងំលាក់ខ្លួនរង់ចាំធ្វើសកម្មភាពប្លន់នៅត្រង់ចំណុចខាងលើ ។ ពេលឃើញគូស្នេហ៍វ័យក្មេងទៅអង្គុយកៀកកើយគ្នានៅទីនោះ ពួកចោរក៏បានកាប់ប្រហារប្លន់យកម៉ូតូ១គ្រឿងម៉ាកហុងដា ធុនសេ១២៥ សេ៊រីឆ្នាំ២០១០ ពណ៌ខ្មៅ ពាក់ស្លាកលេខភ្នំពេញ 1Q 7541 ទៅបាត់ដោយសុវត្ថិភាព ។
តាមប្រភពព័ត៌មានបានឱ្យដឹងថា សកម្មភាពប្លន់ខាងលើមិនត្រូវបានគេដឹងនោះទេ ព្រោះទីនោះស្ងាត់ខ្លាំងណាស់ ក្រៅពីគូស្នេហ៍ប្តូរផ្តាច់ខាងលើ មិនមាននរណាហ៊ានទៅអង្គុយលេងឡើយ ។ អ្វីដែលបង្កឱ្យមានការភ្ញាក់ផ្អើល និងដឹងថា ពួកគេត្រូវចោរកាប់ប្លន់ម៉ូតូនោះ គឺនៅក្រោយពេលក្រុមចោរយកម៉ូតូចាកចេញទៅបាត់នាងជាសង្សារដែលរបួសមិនស្លាប់ បានខំប្រឹងទូរស័ព្ទទាំងត្រដរប្រាប់បងប្អូនឱ្យជួយ។ បន្ទាប់ពីនិយាយបានតែពីរ បីម៉ាត់ប៉ុណ្ណោះ នាងក៏សន្លប់និយាយលែងកើតតែម្តង ។ ប្រភពដដែលបានបន្តទៀតថា នៅមុនពេលកើតហេតុខាងលើ គូស្នេហ៍វ័យក្មេង១គូនេះ បានជិះម៉ូតូឌុបគ្នាទៅកាន់ចំណុចខាងលើ ។ ពេលទៅដល់ពួកគេបានអង្គុយនិយាយសាសងគ្នាយ៉ាងផ្អែមល្ហែមដោយទុកម៉ូតូនៅក្បែរខ្លួន ។ ពេលនោះ ក្រុមចោរដែលកំពុងសំងំលាក់ខ្លួននៅក្បែរនោះបានចេញមកធ្វើសកម្មភាពកាប់ប្រហារប្លន់បណ្តាលឱ្យយុវជនឌុល ភូមិម៉ារ៉ា ស្លាប់ភ្លាមៗនៅនឹងកន្លែង និងនាងជាសង្សាររបួសធ្ងន់ ហើយក្រុមចោរបានជិះម៉ូតូទៅបាត់ស្រមោល ។
ប្រភពដដែលបានបន្តទៀតថា ក្រោយពេលចោរទៅបាត់នាងជាសង្សារបានទូរស័ព្ទទៅប្រាប់បងប្អូនរបស់នាងឱ្យជួយដោយប្រាប់ថា នាងត្រូវចោរកាប់ប្លន់យកម៉ូតូ ហើយនិយាយបានតែពីរ បីម៉ាត់ប៉ុណ្ណោះ នាងក៏សន្លប់និយាយលែងកើត ។ បន្ទាប់ពីទទួលបានដំណឹងនេះភ្លាម បងប្អូនមានការរន្ធត់ចិត្តខ្លាំងណាស់ ក៏បានចេញទៅរក ។ ពេលទៅដល់បានប្រទះឃើញនាងកំពុងដេកទ្រោបលើសាកសពយុវជនជាសង្សារហើយនាងសន្លប់អត់ដឹងខ្លួនឡើយ ។ ប្រភពដដែលបានរៀបរាប់បន្តទៀតថា ខណៈនោះគេបានហៅរថយន្តពេទ្យដឹកនាងទៅកាន់
មន្ទីរពហុព្យាបាល និងសម្ភពចោមចៅ ដើម្បីសង្គ្រោះបន្ទាន់ ក្រុមគ្រូពេទ្យបានដេររបួសជាង១០ថ្នេរ ។ ម្យ៉ាងទៀតក្រោយពេលគ្រូពេទ្យព្យាបាលរួច នាងបានដឹងខ្លួនឡើងវិញ ប៉ុន្តែពេលសមត្ថកិច្ចសួរនាំនាងហាក់មានការខ្មាស់អៀនមិនចង់និយាយស្តីអ្វីនោះឡើយ ។
សមត្ថកិច្ចនិយាយថា នេះមិនមែនជាលើកទី១នោះទេ ដែលគូស្នេហ៍ត្រូវក្រុមចោរវាយ ឬកាប់ប្លន់យកម៉ូតូពេលកំពុងអង្គុយសាសងគ្នាកន្លែងស្ងាត់ពេលយប់បែបនេះដែលកន្លងមកបានកើតមានជាបន្តបន្ទាប់មកហើយ ។ មិនតែប៉ុណ្ណោះ កាលពីពេលថ្មីៗនេះ ប៉ូលិសខណ្ឌពោធិ៍សែនជ័យ ធ្លាប់បានបង្ក្រាបចាប់ខ្លួនក្រុមចោរបាន២នាក់រួចមកហើយ ក្រោយពេលពួកវាប្រើកាំបិតដេញចាក់ប្លន់យកម៉ូតូពីគូស្នេហ៍បែបនេះ ។ ពេលនោះពួកចោរមានគ្នាចំនួន៥នាក់ ក្នុងនោះស្រីម្នាក់ផង ប៉ុន្តែប៉ូលិសចាប់ខ្លួនបានតែ២នាក់ប៉ុណ្ណោះ ឯ៣នាក់ទៀតរត់គេចខ្លួន រួចហើយគេសង្ស័យថា ពួករត់រួចនោះហើយដែលធ្វើសកម្មភាពប្លន់ជាថ្មីទៀតនេះ ។
សមត្ថកិច្ចបានសំណូមពរដល់យុវវ័យទាំងអស់គួរតែចេះខ្លាចផង កុំនាំគ្នាជិះម៉ូតូទំនើបៗទៅសាសងគ្នានៅកន្លែងស្ងាត់បែបនេះទៀត ព្រោះវាគ្មានសុវត្ថិភាពនោះទេ ត្រូវចេះប្រុងប្រយ័ត្នដោយខ្លួនឯងផង ផ្ទះសំណាក់មានច្រើនណាស់ មិនគួរទៅរកន្លែងបែបនេះទេ ។ ជាពិសេសបើស្រឡាញ់គ្នាគួរតែចូលស្តីដណ្តឹងរៀបការតាមប្រពៃណីតែម្តងទៅ ទើបរក្សាជីវិតបាន
ក្នុងព្រឹត្តិការណ៍ដាច់ដោយឡែកមួយទៀត មានសណ្ឋានប្រហាក់ប្រហែលគ្នា ក៏បានកើតឡើងនៅក្នុងខណ្ឌសែនសុខ ផងដែរ គ្រាន់តែមួយពព្រិចភ្នែកតែប៉ុណ្ណោះភាពនិរាសព្រាត់ប្រាស់បានកើតឡើងចំពោះគូស្នេហ៍១គូទៀត ដោយសារក្រុមជនអន្ធពាលបានវាយសម្លាប់ប្រុសស្នេហ៍ និងបានវាយស្រីស្នេហ៍ឱ្យរងរបួសយ៉ាងដំណំ ប៉ោងមុខ ព្រមទាំងបានចាប់រំលោភយ៉ាងព្រៃផ្សៃផងដែរ ខណៈដែលពួកគេនាំគ្នាទៅអង្គុយសាសងនៅទីស្ងាត់កំបាំងក្នុងដីវាលមួយកន្លែង ស្ថិតនៅតាមបណ្ដោយផ្លូវ៩២ ភូមិបន្លាស្អិត សង្កាត់ឃ្មួញ ខណ្ឌសែនសុខ ។ នារីជាស្រីស្នេហ៍រងគ្រោះកំពុងព្យាបាលនៅមណ្ឌលសុខភាពឃ្មួញដោយក្តីសោកសង្រេងពេកក្រៃ ក្រោយពីដឹងថា ប្រុសស្នេហ៍របស់នាងត្រូវបានពួកក្រុមជនអន្ធពាលវាយនឹងដំបងស្លាប់ក្នុងថ្លុកឈាមក្បែរម៉ូតូ ។
ហេតុការណ៍ដ៏គួរឱ្យរន្ធត់ និងសាហាវព្រៃផ្សៃនេះបានកើតឡើងនៅវេលាម៉ោង៩យប់ថ្ងៃទី២ កុម្ភៈ ឆ្នាំ២០១២ ដែលសមត្ថកិច្ចបានសនិ្នដ្ឋានជាដំបូងថា អាចជាស្នេហាត្រីកោណ និងពុំមែនជារឿងករណីប្លន់យកទ្រព្យសម្បត្ដិនោះទេ ព្រោះម៉ូតូជនរងគ្រោះមិនត្រូវបានយកទៅទេ ។ ហេតុការណ៍ខាងលើនេះ ប៉ូលិសនិងអាជ្ញាធរដែនដីពុំបានដឹងភ្លាមៗនោះទេ គឺបានដឹងនៅវេលាព្រឹកឡើងម៉ោង៧ថ្ងៃទី៣ កុម្ភៈ ទើបដឹងដោយសារអ្នកភូមិឃើញជនរងគ្រោះដេកស្លាប់នៅក្បែម៉ូតូរបស់ខ្លួន ហើយមករាយការណ៍ដល់សមត្ថកិច្ច។
បុរសជាគូស្នេហ៍ដែលបានបាត់បង់ជីវិតខាងលើមានឈ្មោះលឿន សុលាភ អាយុ៣២ឆ្នាំ មុខរបរជាសន្ដិសុខសណ្ដាប់ធ្នាប់នៅក្នុងសង្កាត់ភ្នំពេញថ្មី ខណ្ឌសែនសុខ និងមានទីលំនៅភូមិរោងចក្រ សង្កាត់ភ្នំពេញថ្មីនេះដែរ ។ ចំណែកឯស្រី្តជាគូស្នេហ៍កំពុងសម្រាកព្យាបាលនៅមណ្ឌលសុខភាពឃ្មួញឈ្មោះគង់ សុវន អាយុ២៥ឆ្នាំ ជា កម្មការិនីរោងចក្រស្នាក់នៅផ្ទះជួលភូមិចុងថ្នល់ខាងលិចសង្កាត់ទឹកថ្លា ខណ្ឌសែនសុខ ។
ទាក់ទិននឹងករណីមនុស្សឃាតខាងលើ ស្ដ្រីរងគ្រោះជាសង្សាបានឱ្យដឹងថា នៅវេលាម៉ោង៩យប់ នាងនិងសង្សារបានជិះម៉ូតូម៉ាកហុងដា ធុនសេ១២៥ ទៅឈប់នៅកន្លែងកើតហេតុអង្គុយសាសងគ្នាបានមួយសន្ទុះ ស្រាប់តែមានជន២នាក់ជិះម៉ូតូ១គ្រឿងមកឈប់ក្បែរ ហើយពួកគេបានប្រើកណ្ដាប់ដៃ និងជើងស្ទុះទៅវាយទាត់ធាក់ទាំងកំរោលទៅលើបុរសជាសង្សាររបស់នាងរហូតដល់ដេកដួលលើធរណី ។ ឃើញដូច្នេះនាងរន្ធត់ចិត្ត ជាពន់ពេកបានចូលឃាត់ និងអង្វរកដល់ជនទាំងនោះ សូមកុំធ្វើបាបសង្សាររបស់នាង តែជនទាំងនោះគ្មានធម៌មេត្តាក្នុងខ្លួនទេ បានវាយមកលើរូបនាងទៀតរហូតដល់សន្លប់ ហើយអ្វីៗតទៅ ទៀតនោះ នាងក៏លែងដឹងអ្វីទាំងអស់ ។ លុះព្រលឹមស្រាងៗ ព្រឹកថ្ងៃទី៣ កុម្ភៈ នាងបានដឹងខ្លួនឡើង ទើបដឹងថា ពេញលើផ្ទៃមុខ ហើយស្ថិតក្នុងរាងកាយអាក្រាតខាងក្រោម និងឈឺប្រដាប់ភេទ ពោលគឺពួកអន្ធពាលបានវាយមកលើរូបនាងរហូតដល់សន្លប់បាត់ស្មារតី ហើយបានរំលោភនាងជាក្រោយ ។
ប្រភពព័ត៌មានពីមិត្ដភក្ដិស្ដ្រីរងគ្រោះបានបង្ហើបឱ្យដឹងថា ការសម្លាប់បុរសជាគូស្នេហ៍នេះគឺជាស្នេហាត្រីកោណ ព្រោះភាគីខាងស្រីធ្លាប់មានទំនាក់ទំនងជាមួយបុរសផ្សេងផងដែរ ហើយជាញយដងនាងតែងតែត្រូវបានប្រុសស្នេហ៍របស់នាងដែលរងគ្រោះខាងលើដឹកមកអង្គុយសាងសងគ្នា ក្រោយពីនាងចេញពីធ្វើការរោងចក្រ ធ្វើឱ្យជនអន្ធពាលដែលធ្លាប់ពាក់ព័ន្ធតាមប្រមាញ់វាយសម្លាប់តែម្ដង ។ ទោះបីជាបែបណា នេះជាការសន្និដ្ឋានរបស់មិត្តភក្តិនារីរងគ្រោះប៉ុណ្ណោះ ។
សមត្ថកិច្ចបានធ្វើកោសល្យវិច័យទៅលើជនរងគ្រោះបានបង្ហើបឱ្យដឹងថា ជនអន្ធពាលដែលមិនទាន់ស្គាល់មុខបានប្រើកណ្ដាប់ដៃ និងជើងវាយទាត់ធាក់ទៅលើជនរងគ្រោះ បណ្ដាលឱ្យស្លាប់ក្នុងស្ថានភាពមានស្នាមជាំនៅគុម្ពត្រចៀកទាំងសងខាង និងផ្ទៃមុខមានសភាពហើមពោរ ហើយជាំនិងបាក់ចង្ការ ។
ចំពោះករណីសម្លាប់គូស្នេហ៍ថ្មីនេះ តាមភាគីស្ដ្រីរងគ្រោះនិយាយថា បានស្គាល់មុខពួកជនអន្ធពាលនេះផងដែរ ៕
ចែករំលែកព័តមាននេះ