ខេត្តឧត្តរមានជ័យ ៖ អ្នកឆ្លើយឆ្លងព័ត៌មានកោះសន្តិភាពប្រចាំខេត្តឧត្តរមានជ័យ លោកឱម សារឿន បានទទួលការប្តឹងប្តល់ពីសំណាក់មន្ត្រីប៉ូលិសលោកកែ សំណេង ជាអធិការរងទទួលបន្ទុកព្រហ្មទណ្ឌកម្រិតធ្ងន់ ស្រុកអន្លង់វែង ទាក់ទិនទៅនឹងអត្ថបទព័ត៌មានមួយដែលបានចេញផ្សាយកាលពីថ្ងៃទី១៧ មករា ឆ្នាំ២០១២ កន្លងមកនេះ ដោយចោទប្រកាន់ថា អត្ថបទនោះបានបរិហារកេរ្តិ៍ និងផ្សាយព័ត៌មានមិនពិត ។ ទាក់ទិនទៅនឹងអត្ថបទព័ត៌មានស្តីពីការចាប់កូនកម្លោះដាក់ពន្ធនាគារដែលបានចេញផ្សាយលេខ៧៤៦៩ ថ្ងៃទី១៧ មករា កន្លងមកនេះ ។ អ្វីដែលមានការចាប់អារម្មណ៍នោះ គឺក្រោយការចេញផ្សាយមិនមានប្រតិកម្មណាមួយទាមទារឱ្យមានការកែតម្រូវស្របទៅតាមច្បាប់ស្តីពីរបបសារព័ត៌មាននោះទេ បែរជាមានបណ្តឹងទៅតុលាការ ។ ទោះបីជាបែបណានោះជាសិទ្ធិរបស់អ្នកប្តឹង ហើយរំពឹងថា តុលាការនឹងចាត់ការរឿងក្តីនេះស្របតាមច្បាប់ស្តីពីរបបសារព័ត៌មាន ។
ទាក់ទងព័ត៌មានដែលបានចុះផ្សាយនោះកោះសន្តិភាពគ្រាន់តែបានដកស្រង់សម្តីកូនកំលោះបំភ្លឺថា នៅពេលសមត្ថកិច្ចធ្វើការឃាត់ខ្លួននោះយោងទៅតាមពាក្យបណ្តឹងខាងអ្នកអាណាព្យាបាលខាងកូនប្រុសស្រីបានដាក់ពាក្យប្តឹងទៅលោកឧបនាយករដ្ឋមន្ត្រីក្រសួងមហាផ្ទៃ និងបណ្តឹងទៅលោកអភិបាលស្រុក ។ បណ្តឹងនេះអ្នកអាណាព្យាបាលបានចោទថា វិវាទគ្មានតម្លាភាពត្រឹមត្រូវតាមផ្លូវច្បាប់ និងពុំមានភាពយុត្តិធម៌ក្នុងការចាប់កូនកំលោះដាក់ពន្ធនាគារ ។
ក្នុងការផ្សាយនោះកោះសន្តិភាពពុំទាន់បានលើកមកនិយាយពីការគំរាមទារប្រាក់រាប់ពាន់ដុល្លារពីម្ចាស់ដើមការនៅឡើយទេ សូមលោកអធិការរងកុំតាំងខ្លួនឯងជាមនុស្សស្អាតស្អំឱ្យសោះ ដែលកោះសន្តិភាព និងហែកបន្តទៀតនៅថ្ងៃក្រោយនូវអំពើអាក្រក់ច្រើនទៀត។
ខាងក្រោមនេះគឺជាការថតចម្លងពាក្យបណ្តឹងរបស់អ្នកអាណាព្យាបាលកូនកំលោះដែលបានដាក់ជូនលោកឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃដែលកោះសន្តិភាពបានដកស្រង់មកផ្សាយជាព័ត៌មានកន្លងមកនេះ ។ បណ្តឹងមួយទៀតក៏មានការដាក់ជូនដល់លោកអភិបាលស្រុកអន្លង់វែងផងដែរ ៕
ចែករំលែកព័តមាននេះ