ខេត្តស្ទឹងត្រែង ៖ អាជ្ញាធរជាតិប្រយុទ្ធប្រឆាំងគ្រឿងញៀន សហការជាមួយអាជ្ញាធរខេត្ដបានធ្វើការផ្សព្វផ្សាយផលប៉ះពាល់ និងគ្រោះថ្នាក់នៃគ្រឿងញៀនដល់អាជ្ញាធរឃុំប៉ូលិសប៉ុស្ដិ៍រដ្ឋបាល និងមន្ដ្រីពាក់ពន្ធ័នៅក្នុងខេត្ដ ។
ក្នុងកិច្ចប្រជុំផ្សព្វផ្សាយនៅខេត្ដស្ទឹងត្រែងនាព្រឹកថ្ងៃទី៣ កុម្ភៈ លោកឧត្ដមសេនីយ៍ទោ នាក់ យុទ្ធា ប្រធាននាយកដ្ឋាននីតិកម្ម អប់រំ និងស្ដារនីតិសម្បទានៃអាជ្ញាធរជាតិប្រយុទ្ធប្រឆាំងគ្រឿងញៀន បានបញ្ជាក់ថា មន្ត្រីបុស្ដិ៍រដ្ឋបាលឃុំ-សង្កាត់ ត្រូវយល់ជ្រួតជ្រាបពីច្បាប់ស្ដីពីការត្រួតពិនិត្យគ្រឿងញៀនដែលរដ្ឋសភាបានអនុម័តកាលពីថ្ងៃទី២៥ តុលា២០១១ មាន១២៥មាត្រា ៩ជំពូក និង២៤ផ្នែក ។ ច្បាប់នេះ គ្រប់មន្ដ្រីពាក់ព័ន្ធទាំងអស់ត្រូវយកទៅផ្សព្វផ្សាយបន្ដដល់ប្រជាពលរដ្ឋនៅតាមមូលដ្ឋាន ដើម្បីឱ្យកិច្ចប្រតិបត្ដិការបង្ក្រាបគ្រឿងញៀនអនុវត្ដទៅមានប្រសិទ្ធភាព។
លោកឡូយ សុផាត អភិបាលខេត្ដបានដាក់វិធានការឱ្យសមត្ថកិច្ចនិងអាជ្ញាធរពាក់ពន្ធ័ទាំងអស់ ជាពិសេសថ្នាក់ដឹកនាំឃុំ-សង្កាត់ ដែលមានមូលដ្ឋាននៅជាប់ព្រំប្រទល់ប្រទេសឡាវ មិនត្រូវនាំគ្នាអង្គុយបក់ផ្សែងទៀតទេ ត្រូវនាំគ្នាពន្លត់ភ្លើងតែម្ដង ដូចនេះយើងត្រូវយកច្បាប់នេះទៅផ្សព្វផ្សាយឱ្យប្រជាពលរដ្ឋយល់ដឹងទាំងអស់គ្នា ។ លោកអភិបាលខេត្ដ បានជំរុញឱ្យសមត្ថកិច្ចទាំងអស់ត្រូវពង្រឹងសមត្ថភាពខ្លួនឯងឱ្យបានគ្រប់គ្រាន់ សហការគ្នាបង្ក្រាបការជួញដូរ និងការប្រើប្រាស់គ្រឿងញៀនឱ្យបានសកម្ម ធ្វើឱ្យភូមិឃុំមានសុវត្ថិភាព ។
លោកឡូយ សុផាត ក៏បានណែនាំឱ្យមន្ដ្រីពាក់ព័ន្ធទាំងអស់ពេលចេញពីកិច្ចប្រជុំ់ផ្សព្វផ្សាយនេះទៅត្រូវនាំយកនូវចំណេះដឹងទៅអនុវត្ដឱ្យមានប្រសិទ្ធភាព ហើយធ្វើការផ្សព្វផ្សាយឱ្យបានស៊ីជម្រៅដល់ស្រទាប់ប្រជាពលរដ្ឋ ពីព្រោះប្រជាពលរដ្ឋជាកម្លាំងមួយមិនអាចខ្វះបានក្នុងការអនុវត្ដការងារនៅតាមមូលដ្ឋាន ពិសេសភូមិ-ឃុំដែលមានភូមិសាស្ដ្រនៅជាប់ព្រំប្រទល់ប្រទេសឡាវ ៕
ចែករំលែកព័តមាននេះ