ទីភ្នាក់ងារព័ត៌មានបរទេសផ្សាយឱ្យដឹងថា ទស្សនាវដ្តី «ហ្វប់» (Forbes) បានបង្ហាញឈ្មោះបុគ្គលដែលមានទ្រព្យសម្បត្តិស្តុកស្តម្ភបំផុតក្នុងប្រទេសអូស្ត្រាលីដោយបញ្ជាក់ថា លោកស្រីជីណា រ៉ៃហាត សេដ្ឋីនីអូស្ត្រាលីអាចក្លាយជាស្ត្រីមានទ្រព្យសម្បត្តិច្រើនបំផុតនៅលើពិភពលោក ក្នុងពេលឆាប់ៗនេះ បន្ទាប់ពីលោកស្រីបានសន្សំទ្រព្យពីការវិនិយោគទុនក្នុងអណ្តូងរ៉ែ បានដល់ទៅ១៨.០០០លានដុល្លារ ។
សេដ្ឋីនីមេម៉ាយអាយុ៥៧ឆ្នាំរូបនេះ មានទ្រព្យកើន ឡើងជិតទ្វេដង ក្រោយពីកាលពីខែកន្លងមក លោកស្រីបានចុះហត្ថលេខាលើកិច្ចព្រមព្រៀង ឱ្យក្រុមហ៊ុន «ប៉ូស្គូ» ជាក្រុមហ៊ុនដែកថែបដ៏ធំរបស់កូរ៉េខាងត្បូងដល់ទៅ១៥% នៅក្នុងគម្រោងការអណ្តូងរ៉ែដែក «រ៉យ ហ៊ីល» ក្នុងតំបន់ពីលបារ៉ា ភាគខាងលិចប្រទេស ។ កិច្ចព្រមព្រៀងខាងលើ ដែលមានតម្លៃ១០.០០០លានដុល្លារ អាចជួយបង្កើនទ្រព្យរបស់លោកស្រីរ៉ៃ ហាត យ៉ាងឆាប់រហ័ស និងក្នុងរយៈពេលពី២ ទៅ៣ឆ្នាំខាងមុខ លោកស្រីមានគម្រោងនឹងពង្រីកគម្រោងការរ៉ែដែក និងអភិវឌ្ឍន៍អណ្តូងរ៉ែធ្យូងថ្មចំនួន២កន្លែងទៀត។
ប្រសិនបើភាគហ៊ុននៅតែបន្តកើនឡើងលោកស្រីរ៉ៃហាត អាចផ្តួលលោកស្រីគ្រីស្ទី វ៉ល សុន អតីតភរិយាលោកចន វ៉លតុន ដែលមានទ្រព្យសម្បត្តិ២៤.៥០០លានដុល្លារក៏ថាបាន ។ តាមទិន្នន័យរបស់ទស្សនាវដ្តីបានបញ្ជាក់ថា បច្ចុប្បន្នលោកស្រីរ៉ៃហាត ក៏ក្លាយជាស្ត្រីមានស្តុកស្តម្ភបំផុតនៅក្នុងភូមិភាគអាស៊ីប៉ាស៊ីហ្វិក ។ លោកស្រីរ៉ៃហាត ជាកូនរបស់លោកលែងហេនខុក អ្នកស្រាវជ្រាវ និងរុករករ៉ែជនជាតិ អូស្ត្រាលី ដែលប្រទះឃើញប្រភពរ៉ែដែកដ៏ធំ កាលពីទសវត្សឆ្នាំ១៩៥០ ហើយដែលបច្ចុប្បន្នកំពុងក្លាយជាប្រភពការនាំចេញដ៏ធំបំផុតរបស់អូស្ត្រាលី ។ លើសពីនេះ សេដ្ឋីនីដែលមានរហស្សនាមថា «ម្ចាស់ក្សត្រីពីលបារ៉ា» កំពុងចូលកាន់ភាគហ៊ុនក្នុងក្រុមហ៊ុនសារព័ត៌មានខ្នាតធំរបស់អូស្ត្រាលី ដោយមានទាំងកាសែត និងស្ថានីយវិទ្យុ ៕
ចែករំលែកព័តមាននេះ