រាជធានីភ្នំពេញ ៖ អ្នកនិពន្ធទំនុកច្រៀង ប្រចាំផលិតកម្ម KH បានមានប្រតិកម្មយ៉ាងខ្លាំង ចំពោះអ្នកដឹកនាំផលិតកម្មសាន់ដេ ដោយលោក ចោទថាបានយកស្នាដៃនិពន្ធទំនុកច្រៀងរបស់ លោកឱ្យទៅអ្នកចម្រៀងអ៊ីវ៉ាច្រៀងដោយមិនបានសុំការអនុញ្ញាត និងរំលោភលើច្បាប់ស្តីពីកម្មសិទ្ធិបញ្ញា។
គួរបញ្ជាក់ថា បទចម្រៀងរបស់តារាចម្រៀងអុីវ៉ា ច្រៀងនៅផលិតកម្មសាន់ដេ ហើយបង្កឱ្យមានទំនាស់នោះគឺបទ«ស្ងាត់ៗសុំបែក» ដែលជាបទល្បីបំផុតសម្រាប់តារាចម្រៀង អុីវ៉ា និងធ្វើឱ្យតារាចម្រៀងរូបនេះទទួលបាននូវភាពល្បីល្បាញក្នុងពិភពសិល្បៈផងដែរ។
លោក សរ ធារ៉ា អតីតអ្នកនិពន្ធទំនុកច្រៀងឱ្យផលិតកម្មហង្សមាស និងបច្ចុប្បន្នជាអ្នកនិពន្ធទំនុកច្រៀងប្រចាំផលិតកម្ម KH បានប្រាប់ កោះសន្តិភាពថា ផលិតកម្មសាន់ដេ បានយក ស្នាដៃទំនុកច្រៀងទាំងស្រុងរបស់លោកដែល បាននិពន្ធនិងច្រៀងដោយខ្លួនឯងកាលពីឆ្នាំ ១៩៩៨ ទៅឱ្យតារាចម្រៀងស្រីអ៊ីវ៉ាច្រៀងដោយមិនសុំការអនុញ្ញាតនិងមិនគោរពសិទ្ធិរបស់លោកដែលជាអ្នកនិពន្ធ។
លោកសរ ធារ៉ា បានបញ្ជាក់បន្ថែមថា ម្ចាស់ផលិតកម្មសាន់ដេ មិនគ្រាន់តែមិនទទួលស្គាល់នូវការពិតប៉ុណ្ណោះទេ តែថែមទាំងប្រើពាក្យប្រមាថមើលងាយរូបលោកថែមទៀតផង។ លោកបន្តថា ផលិតកម្មសាន់ដេ បានយកបទរបស់លោកទាំងស្រុងទៅឲ្យអុីវ៉ាច្រៀងដោយដាក់ចំណងជើងថា «ស្ងាត់ៗសុំបែក»។ ប៉ុន្តែផលិតកម្មសាន់ដេបានប្រើស្ទីលប្តូរពីបទដែលច្រៀងដោយអ្នកចម្រៀងប្រុស ហើយក្លែងទៅជាបទស្រីច្រៀងទៅវិញ ។ មិនតែប៉ុណ្ណោះគេថែមទាំងយកបទនេះទៅចាក់ផ្សាយតាមបណ្តាញទូរទស្សន៍ខ្សែកាប ក្នុងកម្មវិធីភាពយន្ត ទៀត ។
លោកសរ ធារ៉ា បានសម្តែងនូវការហួសចិត្តចំពោះទង្វើបែបនេះ ដែលអាចធ្វើទៅរួចសម្រាប់ផលិតកម្មសាន់ដេ ។ លោកបញ្ជាក់ថា បទចម្រៀងនេះលោកបានយកតាមលំនាំមេឡូឌីថៃ នៅឆ្នាំ១៩៩៨ ហើយមកនិពន្ធទំនុកច្រៀងដោយខ្លួនឯង ច្រៀងខ្លួនឯង និងដើរលក់ដោយខ្លួនឯង ។ លោកសរ ធារ៉ា មិនបាននិយាយដល់ការប្តឹងប្តល់តាមផ្លូវច្បាប់នោះទេ ប៉ុន្តែលោកចង់ឲ្យផលិតកម្មសាន់ដេ មានការសម្របសម្រួលឬ ជួបគ្នាដើម្បីពិភាក្សាអំពីបញ្ហានោះព្រោះជាអ្នកប្រកបមុខរបរដូចគ្នា ។
ចំណែកលោកឡាយ សុខចំរើន អ្នកគ្រប់គ្រងផលិតកម្មសាន់ដេ បានឆ្លើយតបថា ប្រសិនបើលោកសរ ធារ៉ា មានឯកសារគ្រប់គ្រាន់ថាជាម្ចាស់បទចម្រៀងនោះគួរតែផ្តល់ឲ្យលោកបានដឹងផង កុំប្រើការផ្សព្វផ្សាយតាមកាសែតអី។ ប៉ុន្តែលោកសរ ធារ៉ា បានអះអាងថា លោកបានផ្ញើឯកសារតាមសំណូមពរផលិតកម្មសាន់ដេ ២-៣ដង រួចទៅហើយ តែមិនទទួលបានផលវិជ្ជមាននោះឡើយ ៕
ចែករំលែកព័តមាននេះ