ខេត្តបាត់ដំបង ៖ នាព្រឹកថ្ងៃទី៨ កុម្ភៈ ២០១២ នៅសាលប្រជុំសាលាខេត្ត មានប្រារព្ធពិធីបិទសន្និបាតបូកសរុបលទ្ធផលការងារលើគ្រប់វិស័យប្រចាំឆ្នាំ និងលើកទិសដៅសម្រាប់ការងារឆ្នាំ២០១២ រយៈពេល១ថ្ងៃកន្លះ ចាប់ពីថ្ងៃទី២ , ៣ ឆ្នាំ២០១២ ក្រោមអធិបតីភាពលោកស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ដោយអញ្ជើញចូលរួមពីសមាជិក សមាជិកា ព្រឹទ្ធសភា រដ្ឋសភា រាជរដ្ឋាភិបាល អភិបាល អភិបាលរងខេត្ត ក្រុមប្រឹក្សាខេត្ត ប្រធាន អនុប្រធាន មន្ទីរ ស្ថាប័ននានាជុំវិញខេត្ត កងកម្លាំងប្រដាប់អាវុធទាំងបីប្រភេទ អស់លោកមេឃុំ ក្រុមប្រឹក្សាឃុំ ទូទាំងខេត្តយ៉ាងច្រើនកុះករ ។
លោកប្រាជ្ញ ចន្ទ អភិបាលខេត្តបានថ្លែងក្នុងឱកាសបើកសន្និបាតដោយបានឆ្លុះបញ្ចាំង និងធ្វើការសន្និដ្ឋានជារួមនូវលទ្ធផលការងារ និងសមិទ្ធផលនៃការរីកចម្រើនលើគ្រប់វិស័យរបស់ខេត្តក្នុងឆ្នាំ២០១១កន្លងមកនេះ គឺផ្តើមចេញពីការរួមចំណែកក្នុងការអនុវត្តយុទ្ធសាស្ត្រចតុកោណដំណាក់កាលទី២ និងកម្មវិធីកំណែទម្រង់របស់រាជរដ្ឋាភិបាលកម្ពុជាក្រោមមគ្គុទេសក៍ដឹកនាំដ៏ត្រឹមត្រូវ និងប្រកបដោយគតិបណ្ឌិតឈ្លាសវៃរបស់សម្តេចអគ្គមហាសេនាបតីតេជោ ហ៊ុន សែន ជាប្រមុខ។ លោកប្រាជ្ញ ចន្ទ បានសំណូមពរដល់អង្គសន្និបាតទាំងមូលត្រូវរួមគ្នាពិនិត្យពិគ្រោះពិភាក្សាផ្លាស់ប្តូរដកស្រង់នូវបទពិសោធន៍ដែលត្រូវបំពេញអនុវត្ត និងដោះស្រាយនូវបញ្ហាប្រឈមជាច្រើនទៀត ហើយក៏ត្រូវលើកឡើងនូវចំណុចខ្លាំង និងចំណុចខ្វះខាតដែលស្តែងចេញពីការងារអនុវត្តជាក់ស្តែង និងរួមគំនិត រួមគ្នាធ្វើដើម្បីរិះរកវិធីសាស្ត្រដើម្បីកំណត់នូវទិសដៅសកម្មភាពសម្រាប់បន្តអនុវត្តក្នុងឆ្នាំ២០១២នេះឱ្យកាន់តែទទួលបាននូវលទ្ធផលល្អប្រសើរថែមទៀតក្នុងការចូលរួមអនុវត្តដោយជោគជ័យ និងដើម្បីឱ្យសមស្របតាមគោលការណ៍នៃការអភិវឌ្ឍតាមបែបប្រជាធិបតេយ្យ ។
លោកស ខេង មានប្រសាសន៍កោតសរសើរដល់អាជ្ញាធរ និងកងកម្លាំងសមត្ថកិច្ចគ្រប់លំដាប់ថ្នាក់ក្នុងខេត្តដែលបានឆ្លើយតបភ្លាមៗនូវសភាពការណ៍នានាដែលបានកើតឡើង និងត្រូវបង្កើនការយកចិត្តទុកដាក់លើការងារពង្រឹងសមត្ថភាពមន្ត្រីរាជការជុំវិញខេត្តឱ្យបានយល់ដឹងអំពីច្បាប់លិខិតបទដ្ឋានទាំងឡាយដែលពាក់ព័ន្ធនឹងរដ្ឋបាលថ្នាក់ក្រោមជាតិដើម្បីជំរុញការធ្វើកំណែទម្រង់រដ្ឋបាលសាធារណៈនៅថ្នាក់ក្រោមជាតិឱ្យស្របទៅតាមគោលនយោបាយវិមជ្ឈការ និងវិសហមជ្ឈការរបស់រាជរដ្ឋាភិបាល ។ ខិតខំបន្តអនុវត្តនូវគោលនយោបាយភូមិ-ឃុំមានសុវត្ថិភាពឱ្យបានកាន់តែប្រសើរឡើងថែមទៀត ។ លោកឧបនាយករដ្ឋមន្ត្រីបានបន្តទៀតថា រដ្ឋបាលគ្រប់លំដាប់ថ្នាក់ និងកងកម្លាំងប្រដាប់អាវុធគ្រប់ប្រភេទត្រូវត្រៀមលក្ខណៈពង្រឹងសន្តិសុខ សណ្តាប់ធ្នាប់សាធារណៈ ស្ថិរភាពនយោបាយឱ្យបានម៉ត់ចត់ដើម្បីធានា និងបម្រើឱ្យការងារបោះឆ្នោតជ្រើសរើសក្រុមប្រឹក្សាឃុំ-សង្កាត់ ក្នុងឆ្នាំ២០១២នេះឱ្យទទួលបានលទ្ធផលជោគជ័យ ។
ពង្រឹងការអនុវត្តច្បាប់ចរាចរណ៍ផ្លូវគោក និងបន្តយកចិត្តទុកដាក់លើការលើកកម្ពស់ការយល់ដឹងរបស់ប្រជាពលរដ្ឋឱ្យកាន់តែល្អប្រសើរឡើងក្នុងការបំពេញបន្ថែមជីវភាពរស់នៅរបស់ពួកគាត់តាមរយៈការលើកស្ទួយវិស័យកសិកម្ម ទេសចរណ៍ ការពង្រឹងបន្ថែមប្រព័ន្ធធារាសាស្ត្រ ប្រព័ន្ធផ្លូវគមនាគមន៍ និងការងារអភិវឌ្ឍផ្សេងៗទៀត ។
ក្នុងឱកាសនោះដែរ លោកស ខេង ក៏បានបំពាក់ស័ក្តិដល់អភិបាលស្រុកគ្រប់ស្រុក និងបំពាក់គ្រឿងឥស្សរិយយសដល់អភិបាលរងខេត្ត ប្រធានការិយាល័យ សាលាខេត្ត និងប្រធានមន្ទីរទាំងអស់ក្នុងខេត្តផងដែរ ៕
ចែករំលែកព័តមាននេះ