រាជធានីភ្នំពេញ ៖ ជនសង្ស័យម្នាក់ត្រូវម្ចាស់ម៉ូតូប្តឹងប៉ូលិសប៉ុស្តិ៍ទួលសង្កែឱ្យចាប់ខ្លួនកាលពីវេលាម៉ោង៦ និង១៥នាទីព្រឹកថ្ងៃទី៣ កុម្ភៈ ពីបទលួចម៉ូតូម៉ាកឌ្រីមC125 ស៊េរីឆ្នាំ២០០៨ ។ សមត្ថកិច្ចដកហូតបានម៉ូតូម៉ាកស្គូពី មួយគ្រឿង ដែលជនសង្ស័យជិះធ្វើសកម្មភាព ប៉ុន្តែម៉ូតូជនរងគ្រោះត្រូវបក្សពួកគេម្នាក់ទៀតជិះគេចខ្លួនបាត់ ។
ជនសង្ស័យដែលចាប់ខ្លួនឈ្មោះថេត នី អាយុ៣៤ឆ្នាំ មានទីលំនៅក្នុងភូមិត្រពាំងឈូក ឃុំមេ.សជ្រៃ ស្រុកស្ទឹងត្រង់ ខេត្តកំពង់ចាម ។ ចំណែកបក្សពួកម្នាក់ទៀតរត់រួចឈ្មោះទៀង តុល អាយុ៣៨ឆ្នាំ ។ ម្ចាស់ម៉ូតូឈ្មោះទ្រី សីលា ភេទប្រុស អាយុ៣០ឆ្នាំ ជាមន្ត្រីប៉ូលិសក្រសួងមហាផ្ទៃមានទីលំនៅក្នុងភូមិទួលគោក សង្កាត់ទួលសង្កែឱ្យដឹងថា នៅព្រឹកថ្ងៃទី៣ កុម្ភៈ គាត់ទុកម៉ូតូម៉ាកឌ្រីមមុខផ្ទះ ស្រាប់តែត្រូវក្រុមចោរលួចយកទៅបាត់ ។ ពេលលោកចេញក្រៅ សួរនាំអ្នកជិតខាងត្រូវគេប្រាប់ថា មានជន២នាក់ជិះម៉ូតូម៉ាកស្គូពីមកឈប់មុខផ្ទះលោក ហើយជនម្នាក់ចូលលួចយកម៉ូតូ ។ ភ្លាមនោះលោកជិះម៉ូតូឌុបតាម ហើយឃើញជនម្នាក់ជិះម៉ូតូស្គូពីចូលទៅម្តុំបឹងកក់ រួចឆ្ពោះទៅឈប់នៅផ្ទះជួលក្នុងសង្កាត់ទួលសង្កែ ។ លោកបានរាយការណ៍ប្រាប់សមត្ថកិច្ចឱ្យចាប់ខ្លួនជននោះ ព្រមទាំង ដកហូតម៉ូតូម៉ាកស្គូពី មួយគ្រឿង ។ ចំណែកម៉ូតូរបស់លោកត្រូវចោរជិះគេចខ្លួនបាត់ ។
ជនសង្ស័យសារភាពថា គេលួចម៉ូតូនោះដោយមានបក្សពួក២នាក់ ហើយម្នាក់ទៀតជិះម៉ូតូរបស់ជនរងគ្រោះគេចខ្លួនបាត់ ។
តាមប្រភពព័ត៌មានឱ្យដឹងថា ឈ្មោះទៀង តុល ដែលគេចបាត់នោះត្រូវតុលាការកាត់ទោសឱ្យជាប់គុក៨ខែ តែទោសត្រូវអនុវត្តក្នុងពន្ធនាគារកំណត់៤ខែ ឯទោសស្រាលត្រូវព្យួរ ស្ថិតក្នុងការសាកល្បងរយៈពេល១ឆ្នាំ ពីបទលួចម៉ូតូនៅសង្កាត់អូរប្ញស្សី១ ខណ្ឌ៧មករា កាលពីថ្ងៃទី២៦ មិថុនា ឆ្នាំ២០១១ ។ ម៉ូតូដែលគេលួចនោះ គឺម៉ូតូម៉ាកស្គូពីដែលសមត្ថកិច្ចដកហូតពេលជិះធ្វើសកម្មភាពនោះ ៕
ចែករំលែកព័តមាននេះ