ខេត្តពោធិ៍សាត់ ៖ រថយន្តកូរ៉ូឡាមួយគ្រឿងបានបើកគេចក្មេងទៅបុកអ្នកជិះម៉ូតូ២នាក់ ដែលកំពុងធ្វើដំណើរស្របទិសគ្នាបណ្តាលឱ្យរបួសធ្ងន់ទាំង២នាក់ ក្នុងនោះម្នាក់បានស្លាប់ក្រោយពីដឹកទៅដល់មន្ទីរពេទ្យ។ គ្រោះថ្នាក់ចរាចរណ៍នេះបានកើតឡើងលើកំណាត់ផ្លូវជាតិលេខ៥ ត្រង់ចំណុចភូមិប៉ប៉ិត ឃុំអន្លង់ត្នោត ស្រុកក្រគរ កាលពីវេលាម៉ោង៤និង៤០នាទីល្ងាចថ្ងៃទី២ កុម្ភៈ ២០១២ ។
នគរបាលប៉ុស្តិ៍រដ្ឋបាលអន្លង់ត្នោត ឱ្យដឹងថា នៅវេលាល្ងាចនោះបុរសពីរនាក់បានជិះម៉ូតូឌុបគ្នាលើផ្លូវជាតិលេខ៥ ក្នុងទិសដៅពីកើតទៅលិចទៅដល់ចំណុចកើតហេតុមានផ្ទះប្រជាពលរដ្ឋមួយជាប់នឹងមាត់ថ្នល់គេកំពុងធ្វើបុណ្យ ។ ដោយឃើញមានរោងបុណ្យ និងមនុស្សដើរក្បែររោងនោះអ្នកបើកម៉ូតូក៏ជិះងាកទៅខាងឆ្វេងដៃ ស្រាប់តែមានរថយន្តកូរ៉ូឡាមួយគ្រឿងបើកយ៉ាងលឿនពីក្រោយគេចក្មេងកន្លែងរោងបុណ្យ ក៏ជ្រុលចង្កូតបុកអ្នកជិះម៉ូតូទាំងពីរប៉ើងដូចគេបោះកណ្តាប់ស្រូវធ្លាក់ស្រែបណ្តាលឱ្យរបួសយ៉ាងធ្ងន់ធ្ងរ លុះពេលបញ្ជូនទៅព្យាបាលនៅមន្ទីរពេទ្យខេត្តបាត់ដំបង បានប៉ុន្មានម៉ោងជនរងគ្រោះម្នាក់ក៏ស្លាប់ដោយសាររបួសធ្ងន់ពេក ។ ជនរងគ្រោះដែលស្លាប់ឈ្មោះកុយ សារ៉េន ភេទប្រុស អាយុ៤៨ឆ្នាំ ជាអ្នកបើកបរម៉ូតូ និងអ្នករួមដំណើរឈ្មោះម៉ោយ អាង ភេទប្រុស អាយុ៤៥ឆ្នាំ របួសធ្ងន់ ។ ទាំងពីរនាក់មានទីលំនៅភូមិ-ឃុំកើតហេតុខាងលើ ។
ក្រោយកើតហេតុអ្នកបើកបររថយន្តបានគេចខ្លួនបាត់បន្សល់ទុករថយន្តនៅកន្លែងកើតហេតុត្រូវនគរបាលយកទៅរក្សាទុកនៅអធិការដ្ឋានស្រុកក្រគរ ដើម្បីដោះស្រាយ៕
ចែករំលែកព័តមាននេះ