ប្រភពការទូតលោកខាងលិចនៅទីស្នាក់ការ អ.ស.ប រាយការណ៍ថា រុស្ស៊ីប្រកាសថា ខ្លួននឹងប្រើវេតូប្រសិនបើគម្រោងដំណោះស្រាយស្តីពីស៊ីរីគាំទ្រដោយពួកលោកខាងលិច និងសម្ព័ន្ធអារ៉ាប់ត្រូវដាក់នាថ្ងៃទី៣ កុម្ភៈ ឱ្យក្រុមប្រឹក្សាសន្តិសុខ អ.ស.ប អនុម័ត។ ឯកអគ្គរដ្ឋទូតរុស្ស៊ីប្រចាំ អ.ស.ប លោកវីតាលីឈួរ គីន ឱ្យដឹងពីជំហរនេះក្នុងឱកាសនៃកិច្ចប្រជុំសម្ងាត់មួយរបស់ក្រុមប្រឹក្សាសន្តិសុខ ខណៈដែលសមាជិកជាច្រើនរបស់ក្រុមប្រឹក្សានេះ និយាយថា មានការរីកចម្រើននានាក្នុងពេលពិភាក្សា។
ក្រុងមូស្គូប្រឆាំងជាពិសេសចំពោះខមួយនៃគម្រោងដំណោះស្រាយនោះដែលគូសបញ្ជាក់ថា ក្រុមប្រឹក្សាសន្តិសុខ គាំទ្រទាំងស្រុងចំពោះផែនការអារ៉ាប់ចាកចេញពីវិបត្តិ ដែលគ្រោងឱ្យប្រធានាធិបតីស៊ីរី លោកបាចាអាល់អាសាដ ចាកចេញពីអំណាច។ រុស្ស៊ីយល់ថា ក្រុមប្រឹក្សាសន្តិសុខ ពុំបានទាមទារឱ្យមានការផ្លាស់ប្តូររបបនៅស៊ីរីឡើយ ។
ពួកអ្នកការទូតលោកខាងលិចជាច្រើនចង់ឱ្យសម្រេចបានកិច្ចព្រមព្រៀងមួយលើគម្រោងដំណោះស្រាយដើម្បីដាក់ឱ្យ ក្រុមប្រឹក្សាសន្តិសុខអនុម័តនាថ្ងៃទី៣ កុម្ភៈ ឬយ៉ាងយូរនាថ្ងៃទី៦ កុម្ភៈ ។ រុស្ស៊ីទាមទារផងដែរឱ្យដកចេញពីគម្រោងដំណោះស្រាយនេះនូវរាល់អន្តរាគមន៍យោធានៅស៊ីរីដែលយកតាមគំរូដូចដែលគេធ្លាប់បានធ្វើកាលពីឆ្នាំទៅមិញនៅលីប៊ី ៕
ចែករំលែកព័តមាននេះ