កាសែតអាមេរិកវ៉ាស៊ីនតោនប៉ុស្តិ៍រាយការណ៍កាលពីថ្ងៃទី២ កុម្ភៈ ថា រដ្ឋមន្ត្រីការពារប្រទេសអាមេរិក លោក LEON PANETTA ថ្លែងថា អ៊ីស្រាអែលនឹងអាចវាយប្រហារអ៊ីរ៉ង់នារដូវផ្ការីកខាងមុខនេះ។ យោងតាមកាសែតនេះ លោក PANETTA យល់ថា មានលទ្ធភាពខ្ពស់ដែលអ៊ីស្រាអែលវាយប្រហារអ៊ីរ៉ង់ក្នុងខែមេសា ឧសភា ឬមិថុនាខាងមុខនេះ មុនពេលអ៊ីរ៉ង់ចាប់ផ្តើមផលិតគ្រាប់បែកនុយក្លេអ៊ែរមួយគ្រាប់។
យោងតាមលោក DAVID IGNATIUS អ្នកកាន់ឯកសាររបស់កាសែតវ៉ាស៊ីនតោនប៉ុស្តិ៍ថា ប្រធានាធិបតីអាមេរិក លោកបារ៉ាក់ អូបាម៉ា និងលោក PANETTA ធ្លាយឱ្យដឹងថា សហរដ្ឋអាមេរិកនឹងប្រឆាំងចំពោះការវាយប្រហារមួយបែបនេះ ដោយយល់ថា នឹងប៉ះពាល់ដល់កម្មវិធីដាក់ទណ្ឌកម្មសេដ្ឋកិច្ចដែលកំពុងទទួលបានជោគជ័យក្នុងកម្រិតអន្តរជាតិ ព្រមទាំងបណ្តាការខិតខំប្រឹងប្រែងពុំមែនយោធាដើម្បីរារាំងអ៊ីរ៉ង់មិនអាចឆ្លងកាត់ដំណាក់កាលទទួលបានអាវុធនុយក្លេអ៊ែរ។ ក៏ប៉ុន្តែសេតវិមាននៅពុំទាន់សម្រេចនៅឡើយពីប្រតិកម្មរបស់សហរដ្ឋអាមេរិកក្នុងករណីមានការវាយប្រហារពីសំណាក់អ៊ីស្រាអែល។
បណ្តាអ្នកទទួលខុសត្រូវអាមេរិកយល់ថា នាយករដ្ឋមន្ត្រីអ៊ីស្រាអែល លោកបេនចាមីន ណេតាន់យ៉ាហ៊ូ ក៏នៅពុំទាន់ធ្វើការសម្រេចចិត្តចុងក្រោយលើរឿងវាយប្រហារជាយថាហេតុប្រឆាំងអ៊ីរ៉ង់នៅឡើយ ៕
ចែករំលែកព័តមាននេះ