រាជធានីភ្នំពេញ ៖ ក្នុងការបើកឆាកប្រកួតថ្ងៃដំបូងនៃវគ្គប្រកួតជម្រុះបាល់ទាត់ពានរង្វាន់សម្តេចតេជោហ៊ុន សែន ឆ្នាំ២០១២ នៅទីលានពហុកីឡដ្ឋានជាតិ ក្រុមឆ្លាមសមុទ្រឈ្នះក្រុមខេត្តបាត់ដំបង ៥-២ ឯក្រុមណាហ្គាខបឈ្នះក្រុមខេត្តប៉ៃលិន ៩-០ ។ ក្រុមឆ្លាមសមុទ្រ មានឱកាសយកស្មើ២-២ នៅតង់ទី១ជាមួយក្រុមខេត្តបាត់ដំបង ។ ប្រកួតបាន១៧នាទីដំបូង កីឡាករពៅ សំណាង របស់ក្រុមឆ្លាមសមុទ្រពាក់អាវលេខ១៥ រកបាន១គ្រាប់នាំមុខមុន ប៉ុន្តែត្រូវក្រុមខេត្តបាត់ដំបងតាមសងវិញនៅនាទីទី២៧ ដោយកីឡាករម៉ាត់ ស៊ីម ពាក់អាវលេខ២២។
ក្រុមឆ្លាមសមុទ្រ នៅតែជាអ្នករកបានគ្រាប់បាល់នាំមុខជានិច្ច គឺនៅនាទីទី៣១ កីឡាករនុត ស៊ីនួន ពាក់អាវលេខ៩ ជាអ្នករកបានគ្រាប់បាល់១គ្រាប់បន្ថែមទៀត ប៉ុន្តែត្រូវកីឡាករលី វុត្ថា របស់ក្រុមខេត្តបាត់ដំបង ពាក់អាវលេខ៩ តាមសងបាន១គ្រាប់វិញនៅនាទីទី៤៤ ជិតបញ្ចប់តង់ទី១ទៅហើយ ។ ចូលដល់តង់ទី២ ក្រុមឆ្លាមសមុទ្រធ្វើឱ្យក្រុមខេត្តបាត់ដំបងបាត់បង់ឱកាសស្ទើរតែទាំងស្រុង ព្រោះថាក្រុមឆ្លាមសមុទ្រមានឱកាសរកបានគ្រាប់បាល់នាំមុខចំនួន៣គ្រាប់បន្ថែមទៀត ។ នុត ស៊ីនួន រកបាន១គ្រាប់បន្ថែមទៀតនៅនាទីទី៥៨ ឯកីឡាកររស់ សំអឿន ពាក់អាវលេខ១១រកបាន២គ្រាប់ម្នាក់ឯងនៅនាទីទី៧៦និងទី៨១។
ចំណែកក្រុមណាហ្គាខបបំបាក់ក្រុមខេត្តប៉ៃលិន៩-០ ។ ក្រុមណាហ្គាខប គឺជាក្រុមខ្លាំង ហើយការយកឈ្នះក្រុមខេត្តប៉ៃលិនលើកនេះមិនមែនជារឿងលំបាកប៉ុន្មានឡើយ ។ ដោយឡែក នៅលើទីលានស្តាតចាស់វិញ ក្រុមបាល់ទាត់ក្រសួងការពារជាតិ បានយកឈ្នះក្រុមថ្មី អាស៊ីអឺរ៉ុប ៥-០ ។ ចំណែកក្រុមគិរីវង់សុខសែនជ័យ បានយកឈ្នះក្រុមខេត្តកំពត ៣-២ ៕
ចែករំលែកព័តមាននេះ