*កីឡាករជនជាតិប្រេស៊ីល ចំណាយប្រាក់ប្រហែល៥០០ដុល្លារផ្តល់ទៅលើអ្នកដែលអាចប្រទះឃើញធ្មេញរបស់គេដែលខ្ទាតចេញក្នុងពេលប្រកួត
ទីភ្នាក់ងារព័ត៌មានបរទេសកាលពីថ្ងៃទី១ កុម្ភៈ ផ្សាយឱ្យដឹងថា កីឡាករម៉ាសេលីនញ៉ូ ប៉ារ៉ាយបា អតីតខ្សែប្រយុទ្ធក្រុមជម្រើសជាតិប្រេស៊ីល បច្ចុប្បន្នកំពុងលេងឱ្យក្លឹប Rocife នៅក្នុងស្រុកកំណើតរបស់ខ្លួនប្រកាសផ្តល់៥០០ដុល្លារ ដល់នរណាម្នាក់ដែលរកឃើញធ្មេញរបស់ខ្លួន ក្រោយពីការប្រកួតក្នុងក្របខណ្ឌបាល់ទាត់ «ខាំពីអូណាតូ ពើណាមប៊ូហ្គាណូ» ជួបជាមួយក្លឹប Naotigo កាលពីសប្តាហ៍មុន ។ នៅក្នុងការប្រកួតកីឡាករអាយុ៣៦ឆ្នាំ រូបនេះបានប៉ះទង្គិចជាមួយកីឡាករគូប្រជែង បណ្តាលឱ្យរបូតធ្មេញចេញពីមាត់របស់គេ ។
ក្រោយពេលចប់ការប្រកួតកីឡាករម៉ាសេលីនញ៉ូ បានឱ្យសមត្ថកិច្ចក្នុងក្លឹបជួយរកធ្មេញរបស់គេ ប៉ុន្តែរកមិនឃើញរហូតកន្លងផុតជាច្រើនថ្ងៃ ។ ចុងក្រោយនេះគេប្រកាសចំណាយប្រាក់៥០០ដុល្លារ ដល់អ្នករកធ្មេញរបស់គេឃើញ ព្រោះយល់ថា ប្រសិនបើទៅដាក់ធ្មេញសិប្បនិមិត្តថ្មីអាចចំណាយប្រាក់ច្រើនជាងនេះដល់ទៅ៤ដង ។ កីឡាករម៉ាសេលីនញ៉ូ ជាកីឡាករសំណាងអាក្រក់ទាក់ទិននឹងធ្មេញ ព្រោះចំនួន២លើកហើយក្នុងអំឡុងពេល២ឆ្នាំកន្លងមក ដែលគេត្រូវបាក់ធ្មេញនៅក្នុងទីលានប្រកួត ។
*រូបភាពនៃការលោតហក់គប់បាល់បញ្ចូលទីរបស់កីឡាករបាល់បោះ ក្នុងក្រុម Miami ថា ជារូបភាពចម្លែក
លោកឡឺប្រុន ជេម កីឡាករបាល់បោះដ៏ល្បីឈ្មោះរបស់ក្រុមបាល់បោះ Miami ត្រូវគេថតរូបភាពបានខណៈពេលកំពុងបោះបាល់ដាក់ក្នុងទីក្នុងការប្រកួតបាល់បោះ NBA សហរដ្ឋអាមេរិក ដោយក្រុមរបស់គេបើកទ្វារទទួលភ្ញៀវក្រុម Chicago ។ អ្វីដែលធ្វើឱ្យមានចំណាប់អារម្មណ៍ក្នុងការប្រកួតនោះ គឺកីឡាករឡឺប្រុន ជេម បានបង្ហាញសកម្មភាពគួរឱ្យគយគន់ប្រៀបដូចជាមនុស្សកំពុងហោះហើរ។
*ដេវីដ បេកខាំ ខ្សែបម្រើក្លឹប Los Angeles Galaxy បង្ហាញម៉ូដខោស្ល៊ីប ផ្សព្វផ្សាយតាមទូរទស្សន៍
កីឡាករដេវីដ បេកខាំ ខ្សែបម្រើក្លឹប Los Angeles Galaxy ជាក្លឹបល្បីនៅក្របខណ្ឌបាល់ទាត់ MLS សហរដ្ឋអាមេរិក ត្រៀមបង្ហាញផលិតផលឈុតក្នុងបុរស “H&M” នៅថ្ងៃទី៥ កុម្ភៈ ។ បេកខាំបានដោះសម្លៀកបំពាក់បង្ហាញស្នាមសាក់នៅលើដងខ្លួនរហូតមានការលេចឮពាក្យចចាមអារ៉ាមម្តងរួចមកហើយ កាលពីពេលថ្មីៗកន្លងមក ។ ចុងក្រោយនេះមានការរំពឹងទុកថា ការឃោសនាបង្ហាញឈុតក្នុងរបស់កីឡាករបេកខាំ នឹងផ្សព្វផ្សាយដោយចំហនៅប្រទេសអង់គ្លេស ៕
ចែករំលែកព័តមាននេះ