*FIFA ត្រៀមឱ្យមានការផ្លាស់ប្តូរកីឡាករទី៤ ក្នុងអំឡុងពេលបន្ថែមម៉ោងពិសេស
នៅក្នុងរបាយការណ៍របស់ FIFA បានពិចារណា និងពិភាក្សាពីការផ្លាស់ប្តូរកីឡាករទី៤ដែលត្រូវដាក់ក្នុងកិច្ចប្រជុំនៅថ្ងៃទី៧ កុម្ភៈ ខាងមុខ ។ ក្រៅពីនេះក៏មានការបង្ហើបឱ្យដឹងថា នៅក្នុងកិច្ចប្រជុំលើកនេះ នឹងមានការពិភាក្សាពីការនាំយកបច្ចេកវិទ្យាពិនិត្យបាល់ចូលទីមកប្រើប្រាស់នៅក្នុងការប្រកួតបាល់ទាត់ផងដែរ ។ សម្រាប់ការផ្លាស់ប្តូរកីឡាករទី៤ ខាងលើ នឹងមានការស្នើឱ្យមានការប្តូរកីឡាករបន្ថែមពីកូតា៣នាក់ ក្នុងអំឡុងពេលប្រកួតធម្មតា៩០នាទី និងនៅពេលបន្ថែមម៉ោងរយៈពេល៣០នាទីគឺក្លឹបទាំង២ អាចផ្លាស់ប្តូរកីឡាករកើនឡើងម្នាក់ទៀត ។
*FIFA ពិន័យក្រុមជម្រើសជាតិកាតាឱ្យចាញ់អូម៉ង់ ០-៣ ក្រោយពីបញ្ចូលកីឡាករពិន័យកាតលឿងចូលប្រកួត
សហព័ន្ធបាល់ទាត់អន្តរជាតិ (FIFA) បានពិន័យក្រុមជម្រើសជាតិកាតា ឱ្យចាញ់ក្រុមជម្រើសជាតិអូម៉ង់ ០-៣ ព្រោះមានកំហុសបញ្ចូលកីឡាករដែលទទួលពិន័យកាតលឿង២សន្លឹក ចូលប្រកួតកាលពីខែវិច្ឆិកា ឆ្នាំមុន ក្នុងការប្រកួតជម្រុះអូឡាំពិកហ្គេមស៍ ខណៈពេលកីឡាករទទួលពិន័យកាតលឿង២សន្លឹកមិនត្រូវបានអនុញ្ញាតឱ្យចូលលេង១ប្រកួត ។ ការពិន័យឱ្យចាញ់លើកនេះធ្វើឱ្យស្ថានភាពរបស់ក្រុមជម្រើសជាតិកាតា ត្រូវស្ថិតនៅលំដាប់ទី៣ នៃពូល A ដោយមានពិន្ទុតាមពីក្រោយក្រុមជម្រើសជាតិអូម៉ង់ ស្ថិតនៅលំដាប់ទី២ មាន៤ពិន្ទុ និងកូរ៉េខាងត្បូង ស្ថិតនៅកំពូលតារាងពូលA។
ស្របពេលជាមួយគ្នានេះ កាតានឹងប្តឹងទៅឧទ្ធរណ៍ស្តីពីការសម្រេចរបស់ FIFA ប៉ុន្តែបច្ចុប្បន្នកំពុងពង្រឹងកីឡាករឱ្យហាត់សមសម្រាប់ចូលប្រកួតនៅថ្ងៃទី៥ កុម្ភៈ ដែលជួបជាមួយក្រុមជម្រើសជាតិអូម៉ង់ និងនៅថ្ងៃទី២២ កុម្ភៈ ជួបជាមួយក្រុមជម្រើសជាតិអារ៉ាប៊ីសាអ៊ូឌីត ។
*តុលាការអង់គ្លេស ត្រៀមបើកសវនាការរឿងក្តីកីឡាករចន ធឺរី មើលងាយជាតិសាសន៍ក្រោយពេលចប់ការប្រកួតអឺរ៉ុប
តុលាការនៅក្នុងខណ្ឌវ៉េសមីនស្ទ័រ បានសម្រេចកំណត់ថ្ងៃបើកសវនាការសាកសួរជាលើកទី២ក្នុងរឿងក្តីកីឡាករចន ធឺរី ខ្សែការពារក្លឹប Chelsea មើលងាយជាតិសាសន៍លើកីឡាករអេនថុន ហ្វើឌីណង់ ខ្សែការពារក្លឹប QPR នៅថ្ងៃទី៩ កក្កដា ខាងមុខ បន្ទាប់ពីកីឡាករចន ធឺរី ធ្វើដំណើរត្រឡប់ពីការប្រកួតឱ្យក្រុមជម្រើសជាតិអង់គ្លេសក្នុងក្របខណ្ឌបាល់ទាត់អឺរ៉ុប ២០១២ ជុំចុងក្រោយនៅប្រទេសអ៊ុយក្រែន និងប៉ូឡូញ ៕
ចែករំលែកព័តមាននេះ