ក្រុមហ៊ុន «ស៊ីដ តិចណូឡូជី» ជាក្រុមហ៊ុនជំនាញខាងផ្នែកផលិត និងអភិវឌ្ឍបន្លែប្រភេទថ្មី ឬបន្លែឆ្លងកាត់ការផ្សាំពូជ ដើម្បីបង្កើនគុណប្រយោជន៍ផ្នែកម្ហូបអាហារ ស្ថិតនៅទីក្រុងកាហ្វា រុត ប្រទេសអ៊ីស្រាអែល បានទទួលជោគជ័យក្នុងការផ្សាំប៉េងប៉ោះខ្មៅដូចដែលបានបង្ហាញនេះ។ ប៉េងប៉ោះដែលបានផ្សាំនេះឈ្មោះថា «ប៊្លេកហ្កាឡេកស៊ី» (Black Galaxy) ដោយអ្នកជំនាញបានយកប៉េងប៉ោះព្រៃមកផ្សាំពូជជាមួយប៉េងប៉ោះធម្មតា រហូតក្លាយជាប៉េងប៉ោះមានពណ៌ខ្មៅចម្លែក ខណៈពេលពណ៌ខ្មៅនេះកើតចេញពីសារធាតុមួយប្រភេទដូចនឹងសារធាតុមាននៅក្នុងផ្លែប៊្លូប៊ឺរី ។
សារធាតុខាងលើមានប្រតិកម្មនឹងពន្លឺយ៉ាងខ្លាំង ដូច្នេះប្រសិនបើប៉េងប៉ោះនេះកាន់តែត្រូវពន្លឺថ្ងៃវានឹងមានពណ៌កាន់តែខ្មៅឡើង។ អ្នកជំនាញម្នាក់ក្នុងក្រុមអ្នកស្រាវជ្រាវរបស់ក្រុមហ៊ុនបានថ្លែងឱ្យដឹងថា «ក្រៅពីវាមានពណ៌ខ្មៅចម្លែកនោះ ប៉េងប៉ោះនេះសម្បូរទៅដោយសារធាតុអាហារដ៏មានតម្លៃ រួមទាំងសារធាតុប្រឆាំងនឹងជាតិពុលក្នុងរាងកាយផងដែរ» ។
គួរបញ្ជាក់ថា ក្រុមហ៊ុន «ស៊ីដតិចណូឡូជី» នឹងលក់ប៉េងប៉ោះពណ៌ខ្មៅនេះដល់អតិថិជនជាចម្បងដូចជានៅតាមរោងចក្រផ្សេងៗ បន្ទាប់មកពួកគេនឹងដាក់លក់នៅលើទីផ្សារទូទៅនៅក្នុងឆ្នាំនេះ៕
ចែករំលែកព័តមាននេះ