នាង Kirsten Wildបានសម្តែងក្តីរីករាយជាពន់ពេកក្រោយពីបានយកឈ្នះដំណាក់ទី១ប្រណាំងកង់រដូវកាលឆ្នាំថ្មីកម្មវិធី Ladies Tour of Qatar 2012កាលពីថ្ងៃពុធទី០១ខែកុម្ភៈ កន្លងមកនេះ។ ការប្រណាំងក្នុងដំណាក់នេះត្រូវបានបញ្ចប់នៅទីក្រុង Al Khor Corniche ប្រទេសកាតា។ Kirsten Wildដែលជាអ្នកជិះកង់ឱ្យក្រុមNetherlandsបានយកឈ្នះដំណាក់ដែលមានចម្ងាយផ្លូវ៩៧គីឡូម៉ែត្រចេញដំណើរពីទីក្រុងCamel Race Trackឆ្ពោះទៅកាន់ទីក្រុង Al Khor Corniche ប្រទេសកាតាដោយប្រើអស់ថិរវេលា២ម៉ោង១៦នាទីនិង៥០វិនាទីយកឈ្នះកីឡាការិនីជើងខ្លាំងរបស់អូស្ត្រាលី Chloe Hosking ជិះឱ្យក្រុម Team Specialized Lululemon និងបានយកឈ្នះកីឡាករហូឡង់ Elen Van Dijkជិះឱ្យក្រុម Team Specialized Lululemonដែលទាំងពីរនាក់បានប្រើថិរវេលាច្រើនជាងស្មើៗគ្នា ។
ថ្លែងបន្ទាប់ពីទទួលបានជ័យជម្នះកីឡាការិនី Kirsten Wildបានបញ្ជាក់ដោយក្តីរីករាយថា៖«ពិតជាសំណាងណាស់ដែលរូបនាងខ្ញុំបានយកឈ្នះការប្រណាំងក្នុងថ្ងៃនេះ។ នេះមិនមែនជាបច្ចេកទេសឬក៏ជាយុទ្ធសាស្ត្ររបស់យើងសម្រាប់យកឈ្នះដំណាក់នេះទេ។ ប៉ុន្តែវាជាសំណាងមួយទៅវិញទេ។ នៅសល់៨០០ម៉ែត្រចូលដល់ទីព្រ័ត្រមានការដួលបន្តបន្ទាប់គ្នាមួយ។ ពេលនោះល្បឿនរបស់ខ្ញុំក៏បានថយចុះហើយខ្ញុំបានធ្លាក់ពីលំដាប់ទី៥មកទី២០ តែខ្ញុំបានព្យាយាមបំពេញចន្លោះនោះ»។
ឯនៅលើតារាងពេលវេលាសរុបវិញ បន្ទាប់ពីបញ្ចប់ដំណាក់ទី១នេះ កីឡាការិនី Kirsten Wild ស្ថិតនៅលំដាប់លើគេដោយប្រើថិរវេលាសរុបអស់២ម៉ោង ១៦នាទីនិង៣៦វិនាទីនាំមុខកីឡាការិនីអូស្ត្រាលី Chloe Hoskingដែលប្រើអស់ថិរវេលាច្រើនជាង៨វិនាទី។ ចំណែកកីឡាការិនីអាល្លឺម៉ង់ Judith Arndtជិះឱ្យក្រុម GreenEdge-AISស្ថិតនៅលំដាប់ទី៣ដោយប្រើអស់ថិរវេលាច្រើនជាង៩វិនាទី។
ការប្រណាំងកម្មវិធី Ladies Tour of Qatar ឆ្នាំ2012 នេះចែកចេញជា៣ដំណាក់និងមានចម្ងាយផ្លូវសរុប៣០៤គីឡូម៉ែត្រ។ ដោយឡែកដំណាក់ទី២ដែលជាដំណាក់បន្តមានចម្ងាយផ្លូវ១១៤,៥គីឡូម៉ែត្រចេញដំណើរពីទីក្រុង Al Zubara Fortឆ្ពោះទៅកាន់ទីក្រុងMadinat Al Shamalប្រទេសកាតា ៕
ចែករំលែកព័តមាននេះ