តាមទីភ្នាក់ងារព័ត៌មានបរទេសកាលពីថ្ងៃទី១ កុម្ភៈ ផ្សាយឱ្យដឹងថា អាជ្ញាធរត្រួតពិនិត្យបទដ្ឋានការឃោសនាផ្សព្វផ្សាយ(ASA)របស់អង់គ្លេស បានដាក់បម្រាមការឃោសនាក្រែមលុបបំបាត់ស្លាកស្នាមរបស់ L’OREAL ដែលជាក្រុមហ៊ុនផលិតផលបង្កើនសម្រស់។ ការដាក់បម្រាមនេះ គឺក្រោយពីមានផ្សព្វផ្សាយតាមទស្សនាវដ្តីជាច្រើនជាមួយនឹងការបង្ហាញរូបភាពផ្ទៃមុខរបស់តារាម៉ូដមានលក្ខណៈសស្អាត និងគ្មានស្លាកស្នាមដែលហួសពីការពិត ។
ASA បានគូសបញ្ជាក់ថា រូបភាពរបស់នាងរ៉ាឆេល វ៉ៃ តារាផ្សព្វផ្សាយផលិតផលលុបបំបាត់ស្លាកស្នាម«រីវីថេហ្វ តូតាល រីភែរ៍»របស់ក្រុមហ៊ុន L’OREAL ដែលបង្ហាញនៅតាមទស្សនាវដ្តី បានធ្វើការតុបតែងលម្អហួសពីធាតុពិត ។ក្រៅពីនេះ ក៏បានបញ្ជាក់នៅក្នុងការឃោសនាផ្សាយពាណិជ្ជកម្មថា ផលិតផលនេះនឹងធ្វើឱ្យមានភាពស្រស់ស្អាតកាន់តែខ្លាំង រួមទាំងធ្វើឱ្យអ្នកមានតម្រូវការកាន់តែមានជំនឿដ៏ងុបងុល ។
លោកស្រីចូស្វ៊ីនសុន សមាជិកសភារបស់អង់គ្លេសដែលប្រឆាំងផលិតផលខាងលើថ្លែងថា លោកស្រីមានការត្រេកអរលើការប្រតិបត្តិការរបស់ ASA ។ ចំណែកក្រុមហ៊ុន L’OREAL នឹងមិនធ្វើការឃោសនាបែបនេះទៀតឡើយដោយបញ្ជាក់ថា «អ្នករៀបចំការឃោសនា និងផលិតផលបង្កើនសម្រស់ គួរបញ្ឈប់ការបោកបញ្ឆោតអ្នកប្រើប្រាស់ដោយប្រើរូបភាពមិនមែនជាការពិត»៕
ចែករំលែកព័តមាននេះ