រាជធានីភ្នំពេញ ៖ ការលុបលាងមុខពិតជាមានសារៈប្រយោជន៍ខ្លាំងណាស់ សម្រាប់មនុស្សគ្រប់វ័យព្រោះអាចលាងជម្រះនូវភាពកខ្វក់ សារជាតិខ្លាញ់ និងមេរោគផ្សេងៗ ដែលកកនៅលើផ្ទៃមុខ ធ្វើឱ្យផ្ទៃមុខមានភាពស្រស់ថ្លា អាចការពារកុំឱ្យកើតមុន ឬកន្ទួលរមាស់នៅស្បែកមុខ រួមទាំងការពារកុំឱ្យផ្ទៃមុខឆាប់ជ្រីវជ្រួញថែមទៀតផង ។
បើសិនជាលោកអ្នកមិនបានយកចិត្តទុកដាក់ទៅដល់ការលាងសម្អាតមផ្ទៃមុខ ឱ្យបានត្រឹមត្រូវទេនោះ លោកអ្នកអាចប្រឈមទៅនឹងបញ្ហាជាច្រើនដែលកើតឡើង ចំពោះផ្ទៃមុខដូចជាមុន បណ្តាលឱ្យស្បែកមុខឆាប់ជាំស្រអាប់ ងាយនឹងប្រតិកម្ម ឡើងកន្ទួលរមាស់ ជាពិសេសធ្វើឱ្យផ្ទៃមុខពុំមានភាពស្រស់ថ្លា ស្ងួតហើយឆាប់ជ្រួញ ឬក៏ធ្វើឱ្យមានសារជាតិខ្លាញ់ច្រើនងាយនឹងកើតមុនជាដើម ។ ដូច្នេះដើម្បីឱ្យផ្ទៃមុខស្រស់ស្អាតសុភាពនារី និងសុភាពបុរសទាំងឡាយត្រូវអនុវត្តទៅតាមវិធីសាស្ត្រខាងក្រោមនេះ ។
-ជាទូទៅដើម្បីឱ្យស្បែកមុខស្អាត និងមានភាពស្រស់ថ្លាពេញមួយថ្ងៃ គប្បីសម្អាតផ្ទៃមុខឱ្យបានពីរទៅបីដង គឺពេលព្រឹកថ្ងៃត្រង់ និងមុនពេលចូលគេង ។
-ការលុបមុខនៅពេលព្រឹក ៖ ការលុបមុខនៅពេលព្រឹកព្រលឹម គឺមានសារៈប្រយោជន៍បំផុតសម្រាប់ស្បែកមុខ អាចធ្វើឱ្យមុខមានភាពស្រស់ថ្លា ។ ជាដំបូងត្រូវលុបមុខ ដោយប្រើផលិតផលលាងមុខ ដែលមានលក្ខណៈសមស្របទៅនឹងស្បែកមុខរបស់លោកអ្នក ។ ត្រូវប្រើដៃស្រាលៗញីនៅលើផ្ទៃមុខ តែមិនត្រូវឱ្យចូលភ្នែកនោះទេ នៅពេលដែលលាងសម្អាតហើយត្រូវយកកូនកន្សែងទន់ ហើយស្អាតមកជូតមុខចេញ ដោយជូតថ្នមៗជាការស្រេច ។
-ការលុបមុខនៅពេលថ្ងៃត្រង់ ៖ ការលុបផ្ទៃមុខនៅពេលថ្ងៃក៏មិនខុសពីការលុបមុខនៅពេលព្រឹកព្រលឹមនោះដែរ ។ ដោយបន្ទាប់ពីលុបលាងមុខហើយ លោកអ្នកគួរតែមានផលិតផលសម្រាប់ប្រើ ដើម្បីការពារពន្លឺព្រះអាទិត្យមកលាបនៅលើផ្ទៃមុខ ជាការស្រេច ។
-ការលុបលាងមុខនៅមុនពេលចូលគេង ៖ លោកអ្នកត្រូវសម្អាតខ្លួនប្រាណឱ្យបានស្អាត ជាពិសេសគឺផ្ទៃមុខតែម្តងដោយគ្រាន់តែប្រើផលិតផលដែលសមស្របទៅនឹងស្បែកមុខ ដើម្បីលាងជម្រះនូវមេរោគលើផ្ទៃមុខ និងជាតិខ្លាញ់ ជាពិសេសនៅពេលដែលលាងសម្អាតផ្ទៃមុខហើយលោកអ្នកគួរតែមានផលិតផលសម្រាប់លាងលើស្បែកមុខ ដើម្បីឱ្យមុខរឹតតែមានភាពស្រស់ស្អាត ហើយមានសំណើមថែមទៀតផង ។
លោកអ្នកគួរតែយកចិត្តទុកដាក់បំផុតនៅក្នុងការថែរក្សាស្បែកមុខ ។ ជាពិសេសត្រូវជ្រើសរើសនូវផលិតផល ដែលមានគុណភាពខ្ពស់ ហើយប្រើឱ្យសមស្របជាមួយនឹងស្បែកមុខរបស់លោកអ្នកផងដែរ ៕
ចែករំលែកព័តមាននេះ