លោកស្រីមូរ សុខហួរ ប្រកាសសង្រ្គាមជាមួយតុលាការ និងសំរេចចិត្ដជាប់គុក
ដោយ ៖ អប្សរា
ថ្ងៃព្រហស្បត្ត៏ ទី១៥ ខែកក្កដា ឆ្នាំ២០១០ ម៉ោង ១៨:២៣
ស.សុខុម
លោកស្រីមូរ សុខហួរនៅក្នុងសន្និសីទកាសែតនៅឯស្នាក់ការគណបក្ស
រាជធានីភ្នំពេញ ៖ លោកស្រីមូរ សុខហួរ តំណាងរាស្ដ្រមណ្ឌលកំពតមកពីគណបក្សសម រង្ស៊ី មានប្រសាសន៍កាលពីថ្ងៃទី ១៥ កក្កដា ឆ្នាំ២០១០ នៅក្នុងសន្និសីទកាសែតនៅឯស្នាក់ការគណបក្សថា “ខ្ញុំមិន បង់លុយទេ ខ្ញុំសំរេចចិត្ដជាប់គុក”។ ការអះអាងរបស់លោកស្រីមួរ សុខហួរ ធ្វើឡើងស្របពេលដែលការកំណត់របស់ដីកាសាលាដំបូងក្រុងអស់សុពលភាពនៅរសៀល ថ្ងៃទី១៥ កក្កដា ឆ្នាំ២០១០ ដែលតំរូវឱ្យលោកស្រីត្រូវបង់ប្រាក់ដែលចាញ់ក្ដីសរុប១៦,៥ លានរៀល ។នៅក្នុងសន្និសីទកាសែត លោកស្រីមូរ សុខហួរ បានថ្លែងថា “វាដល់ពេលដែលពលរដ្ឋទូទៅចូលរួមជាមួយអ្នកប្រជាធិបតេយ្យ ដើម្បីកែប្រែប្រព័ន្ធតុលាការនៅកម្ពុជាឱ្យមានភាពអព្យាក្រឹត មិនលំអៀង មិនស្ថិតនៅក្រោមឥទ្ធិពលនយោបាយនៃអ្នកមាន អំណាចហើយ។ យើងត្រូវកសាងតុលាការមួយឱ្យឯករាជ្យ” ។
លោកស្រីមូរ សុខហួរ ថ្លែងថា លោកស្រីមិនអាចទទួលយកការស្នើសុំរបស់ចលនា ស្ដ្រីដែលចង់ផ្ដល់លុយឱ្យលោកស្រីបង់ទៅតុលាការទេ ព្រោះវាខុសទៅនឹងឆន្ទៈរបស់លោកស្រីដែលនៅតែប្រកាន់ជំហរដដែលមិនផ្លាស់ប្ដូរនោះទេ ។ យើងត្រូវតស៊ូសំរាប់ការកែប្រែមួយសំរាប់ប្រព័ន្ធតុលាការនៅកម្ពុជា ដែលគេទាំងអស់គ្នាអះអាងថា មិនទាន់មានភាពយុត្ដិធម៌នៅឡើយ ។ ការធ្វើសន្និសីទកាសែតរបស់លោកស្រីមូរ សុខហួរ ស្របពេលសាលាដំបូងរាជធានីភ្នំពេញកំណត់ពេល១០ថ្ងៃឱ្យលោកស្រី ត្រូវបង់ប្រាក់ចំនួន៨លានរៀលទៅដើមបណ្ដឹងរដ្ឋប្បវេណី និង៨,៥លានរៀលទៀត ចូលថវិកាជាតិ ។ គេមិនទាន់ដឹងថា តើវិធានការបន្ដផ្នែកច្បាប់របស់តុលាការយ៉ាងណាទៀតនោះទេ ។ ទាក់ទិនរឿងនេះ លោកស្រីមូរ សុខហួរ បានថ្លែងថា វាអាស្រ័យទៅលើតុលាការជាអ្នកសំរេច ដែលពេលនេះលោកស្រីមិនគេចខ្លួនទៅណាទេ រង់ចាំចំណាត់ការរបស់តុលាការ។
កាលពីថ្ងៃទី១៤ កក្កដា ស្ដ្រីមួយក្រុមតូចដែលគេមិនសូវស្គាល់ដោយហៅខ្លួនឯងថា “ចលនាស្ដ្រីគាំទ្រស្ដ្រីក្នុងឆាកនយោបាយ” បានអះអាងថា ពួកគេមកពីក្រុមផ្សេងៗគ្នារួមមានកម្មការិនីកាត់ដេរស្ដ្រីលក់ស្រាបៀរ និស្សិត អ្នករត់ម៉ូតូឌុប កសិករ និងគ្រូបង្រៀន បានស្ម័គ្រចិត្ដរៃអង្គាសប្រាក់គ្រោងជួយដល់ លោកស្រីមូរ សុខហួរ ដើម្បីបង់ពិន័យ និងសំណងជំងឺចិត្ដសម្ដេចតេជោនាយករដ្ឋមន្ដ្រីហ៊ុន សែន ក្នុងបទបរិហារកេរ្ដិ៍ ។ ការអះអាងរបស់ក្រុមស្ដ្រីក្មេងៗបែបនេះនៅក្នុងសន្និសីទកាសែតនៅឯភោជនីយដ្ឋានបៃតង ស្ថិតក្នុងសង្កាត់បឹងកេងកងី រាជធានីភ្នំពេញ ។ កញ្ញានាង សុវ៉ាតនា អាយុ២៣ឆ្នាំ ដែលអះអាងថា ជានិស្សិតមួយរូបបាននិយាយថា ក្រុមស្ដ្រីដែលមានបំណងចូលរួមក្នុងវិស័យនយោបាយនាពេលអនាគតកំពុងតែយកចិត្ដទុកដាក់ចំពោះករណីលោកស្រីមូរ សុខហួរ ។ ករណីនេះ ត្រូវបានគេមើលឃើញថា វាមិនយុត្ដិធម៌ទេ សំរាប់លោកស្រីមូរ សុខហួរ ។
កញ្ញានាង សុវ៉ាតនា អះអាងថា “លោកស្រីមូរ សុខហួរ ជាគំរូល្អសំរាប់ស្ដ្រីខ្មែរនៅក្នុងឆាកនយោបាយ ព្រោះគាត់ហ៊ានលះបង់ ហើយនៅប្រកាន់ជំហរដាច់ខាតថា មិនព្រមបង់លុយ១៦,៥លានរៀលនោះទេ ហើយនៅប្រកាន់ជំហរជាប់ពន្ធនាគារ”។ ក្រុមស្ដ្រីដែលអះអាងថាជា“ចលនាស្ដ្រីគាំទ្រស្ដ្រីក្នុងឆាកនយោបាយ” បានថ្លែងនៅមុនមួយថ្ងៃនៃការកំណត់របស់តុលាការតំរូវឱ្យលោកស្រីមូរ សុខហួរ បង់ប្រាក់សំណងជំងឺចិត្ដជូនទៅសម្ដេចនាយករដ្ឋមន្ដ្រីនៅថ្ងៃទី១៥ កក្កដា ២០១០។ ចៅក្រមសាលា ដំបូងរាជធានីភ្នំពេញ ជា សុខហៀង បានចេញដីកាឱ្យលោកស្រីមូរ សុខហួរ បង់ប្រាក់៨លានរៀលក្នុងរយៈពេល១០ថ្ងៃ គិតពីថ្ងៃ ចេញដីកា បើមិនព្រមបង់ទេតុលាការនឹង ចាត់វិធានការតាមផ្លូវច្បាប់ ។
លោកស្រីធីតា ឃឹះ អគ្គលេខាធិការនៃចលនាស្ដ្រីបានថ្លែងថា “ក្រុមចលនាស្ដ្រីមិន ចង់ឃើញលោកស្រីមូរ សុខហួរ ជាប់គុកទេ ប៉ុន្ដែក្រុមចលនាស្ដ្រីនៅតែគាំទ្រការសំរេចរបស់លោកស្រីមូរ សុខហួរ ថាតើគាត់ត្រូវបង់ប្រាក់ជូនទៅសម្ដេចនាយករដ្ឋមន្ដ្រី ហ៊ុន សែន ឬមួយសំរេចថា ជាប់គុក ។ ក្នុងពេលដែលតំណាងស្ដ្រីម្នាក់ត្រូវបានជាប់គុកនោះវាអាចធ្វើឱ្យមានការសោកស្ដាយ ហើយយើងមិនចង់ឃើញរបៀបនេះទេ ប៉ុន្ដែចង់ឱ្យមានដំណោះស្រាយសមស្របមួយ” ។នៅពេលទាក់ទងតាមទូរស័ព្ទកាលពីថ្ងៃ ទី១៤ កក្កដា ២០១០ លោកស្រីមូរ សុខហួរ បានបដិសេធមិនធ្វើអត្ថាធិប្បាយទេ ហើយថា លោកស្រីនៅមិនទាន់ឆ្លើយតបនៅឡើយ ទេចំពោះអ្វីដែលក្រុមចលនាស្ដ្រីបានស្នើសុំ នោះ ។លោក គី តិច មេធាវីសម្ដេចនាយករដ្ឋមន្ដ្រីហ៊ុន សែន បានមានប្រសាសន៍ថា ខាងដើមបណ្ដឹងនៅតែរក្សាជំហរដដែល ព្រោះកន្លងមកខាងដើមបណ្ដឹងបានដាក់ពាក្យស្នើសុំ ទៅតុលាការឱ្យអនុវត្ដសាលដីកាស្ថាពររួចហើយ ។ ពេលនេះវាជាសមត្ថកិច្ចរបស់តុលាការជាអ្នកសំរេចតាមនីតិវិធីច្បាប់ ៕
