ខេត្តក្រចេះ ៖ យ៉ាងហោចណាស់ក៏មានបុរសពីរនាក់ស្លាប់បាត់បង់ជីវិតនៅនឹងកន្លែង និងបួននាក់ទៀតរងរបួសធ្ងន់ ខណៈពេលដែលពួកគេមានគ្នាទាំងអស់១១នាក់ កំពុងតែអង្គុយផឹកស៊ីជុំគ្នាក៏ត្រូវជនមិនស្គាល់មុខប្រដាប់កាំភ្លើងអាកាបានបាញ់រះមកលើអស់ជាច្រើនគ្រាប់។
អំពើបាញ់សម្លាប់យ៉ាងសាហាវមិនញញើតដៃពីខ្មាន់កាំភ្លើងនេះបានកើតឡើងកាលពីវេលាម៉ោង៧និង៣០នាទីយប់ថ្ងៃទី១៦ មករា នៅចំណុចបន្ទាយទាហានអាមេរិកាំងចាស់ ក្នុងភូមិ សាស្រ្តភូមិអាញាន ឃុំស្រែចារ ស្រុកស្នួល មានចម្ងាយ១៥គីឡូមែត្រ ពីផ្លូវជាតិលេខ៧។ អំពើបាញ់ប្រហារដ៏ឃោរឃៅនេះត្រូវបានសមត្ថកិច្ចចាត់ទុកថា ជាលើកទីមួយហើយ ព្រោះពុំធ្លាប់កើតមានកន្លងមក ។
ក្រុមមន្ត្រីនគរបាលនិយាយថា ជនរងគ្រោះនៅក្នុងហេតុការណ៍នេះ មានចំនួន៦នាក់ ក្នុងនោះមានពីរនាក់បានស្លាប់បាត់បង់ជីវិតដោយសារអំណាចគ្រាប់កាំភ្លើងជាច្រើនគ្រាប់ និងបួននាក់ទៀតរងរបួសធ្ងន់។
ជនរងគ្រោះទាំង៦នាក់នេះ ត្រូវបានសមត្ថកិច្ចបញ្ជាក់ប្រាប់ថា ១-ឈ្មោះភឿន សាវឿន អាយុ២៨ឆ្នាំ ត្រូវបានខ្មាន់កាំភ្លើងបាញ់ត្រូវចំថ្ងាស១គ្រាប់ និងបានស្លាប់បាត់បង់ជីវិតពេលបញ្ជូនមកសង្គ្រោះនៅមន្ទីរពេទ្យ ២-ឈ្មោះវ៉ែន គង់ អាយុ៣៦ឆ្នាំ ត្រូវចំបេះដូងចំនួន១គ្រាប់ និងបានស្លាប់នៅកន្លែងកើតហេតុ។ ៣-ឈ្មោះភឿន វ៉ា អាយុ២០ឆ្នាំ ត្រូវចំនួន៣គ្រាប់រងរបួសធ្ងន់ ៤-ឈ្មោះឆន ធឿន អាយុ៣៣ឆ្នាំ ត្រូវចំនួន២គ្រាប់ រងរបួសធ្ងន់ ៥-ឈ្មោះហន វិចិត្រ អាយុ២៦ឆ្នាំ ត្រូវ១គ្រាប់រងរបួសធ្ងន់ និង៦-ឈ្មោះយិត សុខណាង អាយុ៣០ឆ្នាំ ត្រូវ៤គ្រាប់ រងរបួសធ្ងន់ និងបាននាំទៅសង្គ្រោះនៅមន្ទីរពេទ្យផ្សេងគ្នា។ ជនរងគ្រោះទាំង៦នាក់នេះ មានមុខរបរជាអ្នកធ្វើចម្ការមានទីលំនៅចំណុចកើតហេតុខាងលើ។
ក្រោយពីកើតហេតុភ្លាមៗកម្លាំងប៉ូលិសដឹកនាំដោយលោកឧត្តមសេនីយ៍ស្នងការនគរបាល ខេត្ត បានចុះទៅពិនិត្យមើលដល់កន្លែងកើតហេតុ ដើម្បីស្រាវជ្រាវរកអត្តសញ្ញាណជនដៃដល់។ លោកវរសេនីយ៍ត្រី ចាន់ សុគីម នាយការិយាល័យព្រហ្មទណ្ឌកម្រិតធ្ងន់ខេត្តបាននិយាយថា នៅកន្លែងកើតហេតុប៉ូលិសបានរកឃើញសំបក គ្រាប់អាកា៤៧ចំនួនជិត១០គ្រាប់ ដែលសមត្ថកិច្ចសន្និដ្ឋានថា ជាសំបកគ្រាប់ដែលក្រុមខ្មាន់កាំភ្លើងបានបាញ់ប្រហារ។
លោកនាយការិយាល័យបានឱ្យដឹងទៀតថា នៅវេលាម៉ោងកើតហេតុ ខណៈពេលដែលជនរងគ្រោះមានគ្នាចំនួន១១នាក់ បានមកអង្គុយផឹកស៊ីនៅលើគ្រែឫស្សីជាបជញ្ជាំងផ្ទះរបស់បុរសម្នាក់ឈ្មោះយិត សុណាង អាយុ៣០ឆ្នាំ។ លុះពេលកំពុងតែផឹកស៊ីអស់ស្រាចំនួនជិត២ដបក៏ស្រាប់តែខ្មាន់កាំភ្លើងមានគ្នាបីនាក់ជិះម៉ូតូម៉ាកហុងដា C100 ពណ៌ព្រីងទុំ មកឈប់នៅលើផ្លូវជិតបង្កើយនឹងគ្រែផឹកស៊ី ហើយក៏ធ្វើសកម្មភាពបាញ់ប្រហារជាច្រើនគ្រាប់ឮដូចរន្ទះមកលើជនរងគ្រោះទាំង១១នាក់ ដែលកំពុងតែអង្គុយផឹកស៊ី បណ្តាលឱ្យដេកដួលរដូករណែល និងខ្លះទៀតមិនត្រូវរបួសបានរត់ចូលពួនក្រោមផ្ទះ ធ្វើឱ្យមានការភ្ញាក់ផ្អើលទាំងយប់ ។ រីឯក្រុមជនដៃដល់បានគេចខ្លួនបាត់ដោយសុវត្ថិភាពក្រោយពីបង្កហេតុរួចមក។
ក្នុងសកម្មភាពបាញ់ប្រហារយ៉ាងសាហាវព្រៃផ្សៃនេះ ត្រូវបានសមត្ថកិច្ចសន្និដ្ឋានថា ជារឿងគំនុំ ដោយសារតែក្រោយពីបង្កហេតុបាញ់ប្រហាររួច ក្រុមជនដៃដល់បានរត់គេចខ្លួនដោយមិនបានយកសម្ភារមានតម្លៃណាមួយពីក្រុមជនរងគ្រោះទាំងនោះទេ។
តាមប្រភពព័ត៌មានពីកន្លែងកើតហេតុបានឱ្យដឹងដែរថា ក្នុងអំពើបាញ់សម្លាប់មនុស្សនេះក្រុមជនសង្ស័យបានបាញ់រះមកលើក្រុមជនរងគ្រោះមិនតិចជាង១០គ្រាប់នោះទេ។
ជុំវិញអំពីបាញ់ប្រហារដោយកាំភ្លើងអាការពីសំណាក់ក្រុមជនមិនស្គាល់មុខមកលើក្រុមជនរងគ្រោះទាំងកំរោល បណ្តាលឱ្យមនុស្សស្លាប់ដូចសត្វធាតុនេះ លោកឧត្តមសេនីយ៍ត្រី ជួង ស៊ាងហាក់ ស្នងការនគរបាលខេត្តបាននិយាយថា ក្នុងករណីនេះប៉ូលិសកំពុងតែដុតដៃដុតជើងយ៉ាងខ្លាំងក្នុងការតាមប្រមាញ់រកមុខសញ្ញាក្រុមជនដៃដល់។ លោកបានបញ្ជាក់ថា រហូតមកទល់ នឹងពេលនេះ សមត្ថកិច្ចបានធ្វើការកំណត់មុខសញ្ញាបានខ្លះៗហើយដែរដែលមិនយូរទេ នឹងវែកមុខក្រុមជនដៃដល់បានមិនខាន៕
ចែករំលែកព័តមាននេះ