សម្ដេចតេជោ ហ៊ុន សែន អំពាវនាវដល់ធុរជនសិង្ហបុរីមកស្វែងយល់ពីកម្ពុជា
ដោយ ៖ ប្រុសកោះ
ថ្ងៃអង្គារ ទី២៧ ខែកក្កដា ឆ្នាំ២០១០ ម៉ោង ០៩:៥៦
កោះសន្តិភាព
សម្តេចនាយករដ្ឋមន្រ្តីហ៊ុន សែន ពេលអញ្ជើញដល់សាំងហ្គាពួរ ប្រទេសសិង្ហបុរី
សិង្ហបុរី ៖ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជា មានប្រសាសន៍ថា ខ្ញុំសូមអញ្ជើញធុរជនសិង្ហបុរី ដែលមិនធ្លាប់ទស្សនាប្រទេសកម្ពុជាទៅសិក្សាស្វែងយល់ការពិត និងក្ដាប់យកឱកាសវិនិយោគជួបពិភាក្សាជាមួយសហគមន៍ពាណិជ្ជកម្មកម្ពុជាដើម្បីស្វែងរកដៃគូ និងចាប់ដៃគ្នាចែករំលែកនូវស្ថានភាពឈ្នះ=ឈ្នះជាមួយគ្នា ។
សម្ដេចតេជានាយករដ្ឋមន្ដ្រីបានមានប្រសាសន៍បែបនេះ នាព្រឹកថ្ងៃទី២៦ កក្កដា ឆ្នាំ២០១០ ក្នុងឱកាសអញ្ជើញជួបជាមួយធុរជន និងវិនិយោគិននៅសាកលវិទ្យាល័យជាតិសិង្ហបុរី ខណៈពេលដែលសម្ដេចតេជោនាយករដ្ឋមន្ដ្រី អញ្ជើញទៅបំពេញទស្សនកិច្ចផ្លូវការរយៈពេល២ថ្ងៃតាមការអញ្ជើញរបស់លោកនាយករដ្ឋមន្ដ្រីនៃសាធារណរដ្ឋសិង្ហបុរី ។
សម្ដេចតេជោនាយករដ្ឋមន្ដ្រីបញ្ជាក់ថា អស់លោកលោកស្រីមានដើមទុនមានចំណេះដឹងមានចំណេះធ្វើ និងមានបទពិសោធន៍ ។ ដូច្នេះគួបផ្សំគ្នានឹងសក្ដានុពលដ៏ធំធេងរបស់កម្ពុជាខ្ញុំយល់ថា នៅមានកន្លែង និងឱកាសជាច្រើនដែលសេដ្ឋកិច្ចយើងទាំងពីរអាចបំពេញគ្នាទៅវិញទៅមកបាន ។ ខ្លួនខ្ញុំផ្ទាល់សូមសន្យានិងធានាចំពោះបរិយាកាសធុរកិច្ចប្រកបដោយភាពអនុគ្រោះ និងរាក់ទាក់ ។ កម្ពុជាបើកចំហទ្វារយ៉ាងធំទូលាយ សំរាប់ធុរជន និងវិនិយោគិនសិង្ហបុរី ។
សម្ដេចតេជានាយករដ្ឋមន្ដ្រីគូសបញ្ជាក់ថា ការបើកចំហនេះអនុញាតឱ្យក្រុមហ៊ុនសិង្ហបុរីផ្ដួចផ្ដើមវិនិយោគវិស័យធនាគារ និងធានារ៉ាប់រ៉ង និងវិស័យផ្សេងៗមុនវិនិយោគិនមកពីប្រទេសដទៃ ។ ជាច្រើនឆ្នាំកន្លងមក ស្របជាមួយនឹងការកែលំអហេដ្ឋារចនាសម្ព័ន្ធរូបវ័ន្ដវឌ្ឍនភាពក៏មានផងដែរក្នុងការងារកែលំអច្បាប់ និងបទប្បញត្ដិពាណិជ្ជកម្ម។ ថ្វីបើកម្មសិទ្ធិដីនៅតែរក្សាទុកជាកម្មសិទ្ធិនៃប្រជាពលរដ្ឋកម្ពុជាកាលពីថ្ងៃទី៥ មេសា ឆ្នាំ២០១០ រដ្ឋសភាជាតិកម្ពុជាបានអនុម័តច្បាប់មួយដែលអនុញាតឱ្យជនបរទេសមាន កម្មសិទ្ធិឯកជនក្នុងអគាសហកម្មសិទ្ធិគួបផ្សំជាមួយច្បាប់ពីមុនដែលតំរូវឱ្យរៀបចំប័ណ្ណកម្មសិទ្ធិដោយឡែកពីគ្នាសំរាប់ខុនដូ ។
ច្បាប់ដែលទើបចេញថ្មីនេះ គឺជាការជឿនលឿនដ៏ធំមួយក្នុងវិស័យអចលនទ្រព្យជារួមច្បាប់នេះ ក៏ធ្វើឱ្យកម្មសិទ្ធិឯកជនរបស់វិនិយោគិនទាំងសំរាប់ពលរដ្ឋកម្ពុជា ទាំងសំរាប់ជនបរទេសមានសុវត្ថិភាពខ្ពស់ជាងមុន និងជួយកាត់បន្ថយហានិភ័យដល់អ្នកធ្វើគំរោង និងអ្នកប្រើប្រាស់ចុងក្រោយ ។ ក្នុងការអនុវត្ដ អ្នកប្រើប្រាស់ចុងក្រោយមានភាពងាយស្រួល ជាងមុនក្នុងការប្រើប្រាស់ផ្ដល់ប្រាក់ទិញខុនដូ ពីព្រោះកម្មសិទ្ធិនេះអាចដាក់ជាវត្ថុបញ្ចាំបាន ។
ជាមួយគ្នានេះ យើងបានខិតខំថែមទៀត ក្នុងកំណែទំរង់ច្បាប់ និងតុលាការដែលមានក្នុងកម្មវិធីរបស់រាជរដ្ឋាភិបាលដូចជាការបង្កើតមជ្ឈមណ្ឌលមជ្ឈវិនិច្ឆ័យជាតិ ដែលនឹងដោះស្រាយចន្លោះប្រហោងមួយចំនួនថែមទៀត ។ មជ្ឈវិនិច្ច័យពាណិជ្ជកម្មក៏កំពុងត្រូវបានរៀបចំដាក់ឱ្យអនុវត្ដ ដែលក្នុងនោះអាជ្ញាកណ្ដាលរបស់វិស័យឯកជនកំពុងតែត្រៀមរៀបចំខ្លួន និងទទួលការបណ្ដុះបណ្ដាលដោយអ្នកជំនាញអន្ដរជាតិ ។
សម្ដេចតេជោនាយករដ្ឋមន្ដ្រីមានប្រសាសន៍ថា ច្បាប់អាសន្នភាពត្រូវបានដាក់ប្រកាសឱ្យប្រើដោយពង្រឹងសិទ្ធិរបស់ម្ចាស់ឥណទាន និងតម្លាភាពក្នុងការទូទាត់សងបំណុល ។ គួរកត់សំគាល់ផងដែរថា កម្ពុជាជាប្រទេសមួយក្នុងចំណោមប្រទេសតិចតួចក្នុងតំបន់ ដែលធានាក្នុងការចល័តទំនិញតាមរយៈការចុះបញ្ជីតាមប្រព័ន្ធអ៊ីនធើរណេតភ្លាមៗ ដែលប្រព័ន្ធរបៀបនេះកំពុងពេញនិយមនៅក្នុងចំណោមវិស័យឯកជន ។ ច្បាប់ថ្មីស្ដីពីកិច្ចសន្យាពាណិជ្ជកម្មកំពុងតែត្រូវបានរៀបចំដោយធានានូវភាពប្រាកដប្រជាទាក់ទងទៅនឹងកិច្ចសន្យាទូទៅដែលកំពុងប្រើនៅក្នុងកិច្ចអាជីវកម្ម ។
បន្ថែមលើការពង្រឹងក្របខណ្ឌច្បាប់រាជរដ្ឋាភិបាលបានផ្ដោតការយកចិត្ដទុកដាក់យ៉ាងខ្លាំងទៅលើការសំរួលធុរកិច្ច និងពាណិជ្ជកម្មតាមរយៈការដាក់ចេញនូវយន្ដការពិភាក្សារវាងរដ្ឋាភិបាលនិងវិស័យឯកជនតាមរយៈវេទិការដ្ឋាភិបាល និងវិស័យឯកជន។ គណៈរដ្ឋមន្ដ្រីទាំងមូលនៅក្រោមអធិបតីភាពរបស់នាយករដ្ឋមន្ដ្រីផ្ទាល់បានជួបជាប្រចាំក្នុងរយៈពេល៦ខែម្ដងជាមួយសហ គមន៍ធុរកិច្ចដើម្បីពិភាក្សា និងដោះស្រាយ បញ្ហាប្រឈមទាំងឡាយក្នុងការអភិវឌ្ឍវិស័យឯកជន និងការវិនិយោគ ។
សម្ដេចតេជោនាយករដ្ឋមន្ដ្រីបានលើកបង្ហាញផងដែរថា នៅក្នុងសេចក្ដីរាយការណ៍ឆ្នាំ២០០៩ របស់ធនាគារពិភពលោកកម្ពុជាបានទទួលចំណាត់ថ្នាក់លេខ១ ក្នុងចំណោមប្រទេស២៤ផ្នែកការពិភាក្សារវាងរដ្ឋាភិបាល និងវិស័យឯកជន ។ នៅក្នុងបរិការណ៍នេះសម្ដេចតេជានាយករដ្ឋមន្ដ្រីមានប្រសាសន៍ថា ខ្ញុំសូមជំរុញឱ្យវិនិយោគិនសិង្ហបុរីនៅកម្ពុជាសកម្មចូលរួមនៅក្នុងយន្ដការនេះ ។ ទោះបីសំរេចបាននូវលទ្ធផលល្អប្រសើរមួយចំនួនធំ ហើយក្ដីរាជរដ្ឋាភិបាលនឹងបន្ដខិតខំប្រឹងប្រែងទៀតក្នុងការកាត់បន្ថយបែបបទមិនចាំបាច់នានាដើម្បីសំរួលដល់វិនិយោគិន និងបង្កដាក់នូវវិធានការមុតស្រួចជាប្រព័ន្ធស៊ី ចង្វាក់ប្រទាក់ក្រឡាគ្នាដើម្បីកាត់បន្ថយថ្លៃដើមក្នុងការធ្វើអាជីវកម្មនៅកម្ពុជា ជាពិសេសគឺការពង្រឹងអភិបាលកិច្ច និងការទាញឱ្យចុះថោកនូវថ្លៃដឹកជញ្ជូននិងថ្លៃអគ្គិសនី ។ ចំពោះថ្លៃអគ្គិសនី រាជរដ្ឋាភិបាលរំពឹងថា នឹងអាចចុះថោកថែមមួយកំរិតទៀត ក្រោយពីគំរោងវារីអគ្គិសនីមួយចំនួនត្រូវបានដាក់ឱ្យដំណើរការនៅឆ្នាំ២០១០នេះ ។
ជំហានដ៏សំខាន់មួយទៀតនៅក្នុងទិសដៅនេះ សម្ដេចតេជោនាយករដ្ឋមន្ដ្រីគូសបញ្ជាក់ថា គឺការបង្កើត និងដាក់ឱ្យដំណើរការនូវតំបន់សេដ្ឋកិច្ច ពិសេសជាមួយនឹងសេវាបញ្ជាតែមួយនៅតាមបណ្ដោយព្រំដែនវៀតណាម និងថៃព្រមទាំងនៅក្នុងតំបន់ជាយក្រុងភ្នំពេញ និងខេត្ដព្រះសីហនុ ដែលនៅជិតកំពង់ផែសមុទ្រទឹកជ្រៅ ។
សម្ដេចតេជោគូសបញ្ជាក់ថែមទៀត ចំពោះវិនិយោគិនបរទេស ដែលមានសិទ្ធិទាក់ទងទៅនឹងការទិញខុនដូថា គណៈរដ្ឋមន្ដ្រី ទើបនឹងបានសំរេចដោយបានចេញអនុក្រឹត្យមួយពីថ្ងៃសុក្រសបា្ដហ៍មុន គឺកំណត់ឱ្យមានសិទ្ធិឱ្យទិញ៧០% ។ ដូច្នេះអគារមួយជនបរទេសអាចមានសិទ្ធិទិញ៧០% ។ ដូច្នេះនេះជាការងាយស្រួលមួយ ហើយតាមរយៈនោះអាចមានសិទ្ធិទទួលកម្មសិទ្ធិ ហើយកម្មសិទ្ធិនោះអាចដាក់ទៅធនាគារដើម្បីទទួលឥណទានពីធនាគារបាន ៕
