រាជធានីភ្នំពេញ ៖ ក្នុងការសម្តែងនូវសមានចិត្តសប្បុរសធម៌ចូលរួមរំលែកមរណទុក្ខដល់គ្រួសារសពដែលជានិស្សិតរបស់វិទ្យាស្ថានវ៉ាន់ដាផងនោះ វិទ្យាស្ថាននេះបានសម្រេចប្រគល់ថវិកាចំនួន៣លាន៦ម៉ឺន១ពាន់៥រយរៀល(៣.០៦១.៥០០) ជូនដល់អ្នកស្រីញឹប សុខុម ដែលត្រូវជាម្តាយសពឈ្មោះហ៊ុន មករា អតីតនិស្សិតវិទ្យាស្ថានវ៉ាន់ដា ជំនាន់ទី១១ បានស្លាប់ដោយជំងឺគាំងបេះដូងកាលពីថ្ងៃទី២៨ ធ្នូ កន្លងមក ហើយពិធីប្រគល់អំណោយជាសាច់ប្រាក់នោះគឺបានធ្វើឡើងកាលពីថ្ងៃទី១១ មករា នៅវិទ្យាស្ថានវ៉ាន់ដា ។
និស្សិតហ៊ុន មករា ជាកូនស្រីម្នាក់ក្នុងចំណោមបងប្អូនទាំង៨នាក់ ដែលមានម្តាយឈ្មោះញឹប សុខុម ឪពុកឈ្មោះវ៉ា ប៉ោអៀន ។ នាងបានស្លាប់នៅតាមផ្លូវមុនពេលទៅដល់មន្ទីរពេទ្យកាល់ម៉ែត ហើយពេលទៅដល់មន្ទីរពេទ្យ គ្រូពេទ្យបានប្រាប់ថា នាងបានស្លាប់ទៅហើយដោយជំងឺគាំងបេះដូង ។
លោកនៅ ដាល័យ តំណាងវិទ្យាស្ថានវ៉ាន់ដា បាននិយាយថា ទឹកប្រាក់ដែលប្រគល់ជូនអ្នកស្រីញឹប សុខុម នៅពេលនេះគឺបានមកពីការរៃអង្គាសពីបុគ្គលិក សាស្ត្រាចារ្យ និងនិស្សិតនៅក្នុងវិទ្យាស្ថានវ៉ាន់ដា ដើម្បីចូលរួមរំលែកទុក្ខដល់ក្រុមគ្រួសារសព ។
អ្នកស្រីញឹប សុខុម បាននិយាយថា ប្តីរបស់អ្នកស្រីឈ្មោះ វ៉ា ប៉ោអៀន ជាប់រវល់មិនអាចមកចូលរួមទទួលយកថវិកាពីវិទ្យាស្ថានវ៉ាន់ដានៅពេលនេះបានទេ ដោយគាត់បានផ្តាំផ្ញើការថ្លែងអំណរគុណយ៉ាងជ្រាលជ្រៅបំផុតដល់បុគ្គលិក សាស្ត្រាចារ្យ និងនិស្សិតវិទ្យាស្ថានវ៉ាន់ដា ទាំងអស់ដែលបានបរិច្ចាគថវិកាផ្តាល់ខ្លួនចូលរួមរំលែកមរណទុក្ខជាមួយក្រុមគ្រួសាររបស់លោកហើយអ្នកស្រីបានជូនពរសូមឱ្យសប្បុរសជនទាំងអស់ជួបប្រទះតែពុទ្ធពរទាំងបួនប្រការ កុំបីឃ្លៀងឃ្លាតឡើយ ។
វិទ្យាស្ថានវ៉ាន់ដា ជាវិទ្យាស្ថានឯកទេសគណនេយ្យសវនកម្ម និងពន្ធដារតែមួយគត់ដែលមានរៀបចំកម្មវិធីសិក្សាសម្រាប់និស្សិតធ្វើការងារនៅតាមបណ្តាក្រុមហ៊ុននានាគ្រប់វិស័យទាំងអស់។ កម្មវិធីសិក្សាត្រូវបានរៀបចំឡើងយ៉ាងពិសេសដែលនិស្សិតសិក្សាជំនាញគណនេយ្យអាចក្លាយជាគណនេយ្យអាជីពសវនករ អ្នកជំនាញពន្ធដារ អ្នកគ្រប់គ្រងហិរញ្ញវត្ថុ អ្នករៀបចំផែនការ ដឹកនាំលើកទឹកចិត្តនិងត្រួតពិនិត្យ អ្នកវិភាគសម្រាប់ការសម្រេចចិត្ត វិនិយោគ ដើម្បីទទួលបាននូវប្រាក់ចំណេញខ្ពស់ អ្នកគ្រប់គ្រងចំណាយឱ្យមានប្រសិទ្ធភាពខ្ពស់ និងអ្នកវិភាគសេដ្ឋកិច្ចជាដើម ៕
ចែករំលែកព័តមាននេះ