ខេត្តព្រះសីហនុ ៖ បុរសម្នាក់បានត្រូវជនល្មើសកាប់ជាច្រើនពូថៅ បណ្តាលឱ្យស្លាប់នៅនឹងកន្លែង ក្នុងខណៈពេលដែលបុរសរូបនេះ កំពុងដើរតាមផ្លូវ កាលពីថ្ងៃទី២ កញ្ញា នៅតាមបណ្តោយផ្លូវជាតិលេខ៤ ចន្លោះគីឡូម៉ែត្រលេខ១៦៨ និង១៦៩ ស្ថិតក្នុងភូមិតាពៅ ឃុំជើងគោ ស្រុកព្រៃនប់ វេលាម៉ោង១០និង៤៥នាទីយប់ ។ បុរសរងគ្រោះក្នុងហេតុការណ៍នេះឈ្មោះស៊ី នន អាយុ៤០ឆ្នាំ រស់នៅក្រុម១០ ភូមិ-ឃុំកើតហេតុខាងលើ ឯជនល្មើសឈ្មោះកែវ ម៉ី អាយុ៤១ឆ្នាំ រស់នៅក្រុម៩ ភូមិ-ឃុំជាមួយគ្នា ហើយន្ទាប់ពីធ្វើសកម្មភាពរួចក៏បានរត់គេចខ្លួនបាត់តែម្តង ។
តាមមន្ត្រីកងរាជអាវុធហត្ថដែលប្រចាំការតាមបណ្តោយផ្លូវជាតិលេខ៤ ស្នាក់ការលេខ៤០១ បានឱ្យដឹងថា មុនពេលធ្វើសកម្មភាព១០នាទី ជនល្មើសបានរត់ទៅប្តឹងលោកមេភូមិដែលខ្លួនរស់នៅថា មានក្មេងម្នាក់យកលាមកច្រកក្នុងស្បោងគប់មកលើម៉ូតូរបស់ខ្លួន ។ ពេលនោះលោកមេភូមិបានសួរថា មានស្គាល់ក្មេងនោះដែរឬទេ ឯជនល្មើសឆ្លើយថា អត់ស្គាល់ទេ ហើយក៏ប្រាប់ឱ្យរង់ចាំដល់ថ្ងៃស្អែក ។ បន្ទាប់មកជននោះបានជិះម៉ូតូរបស់ខ្លួនមួយគ្រឿងធុនសេ១០០ ពណ៌ខ្មៅ ស៊េរី៩៧ ចេញពីផ្ទះលោកមេភូមិសំដៅទៅផ្ទះរបស់ខ្លួន តែមិនទាន់ទាំងបាន១០នាទីផង លោកមេភូមិក៏បានឃើញជននោះជិះម៉ូតូកាត់មុខផ្ទះគាត់សំដៅឡើងមកលើផ្លូវជាតិ ។ បន្តិចក្រោយមកលោកមេភូមិក៏ឮសំលេងប្រាវ គឺជនល្មើសបានផ្តួលម៉ូតូរបស់ខ្លួន ដើម្បីរត់មកកាប់ជនរងគ្រោះដែលកំពុងដើរតាមផ្លូវចំនួន៤ពូថៅ បណ្តាលឱ្យស្លាប់នៅនឹងកន្លែងតែម្តង ។
ក្នុងខណៈនោះដែរ ពេលដែលជនល្មើសកាប់ជនរងគ្រោះនោះ បុរសម្នាក់ឈ្មោះសយ រ៉ន អាយុ២៥ឆ្នាំ បានឃើញក៏រត់ទៅជួយ ដោយលោតធាក់ជនល្មើសមួយជើង តែត្រូវជនល្មើសគ្រវាសពូថៅត្រូវដៃខាងឆ្វេង បណ្តាលឱ្យរបួសស្រាល ។ បន្ទាប់មកជនល្មើសក៏បានកាន់ពូថៅនៅនឹងដៃរត់ទៅបាត់ចោលទាំងម៉ូតូ និងស្បែកជើង ។ មន្ត្រីសមត្ថកិច្ចដដែលបានឱ្យដឹងទៀតថា ចំពោះករណីមនុស្សឃាតនេះ សមត្ថកិច្ចពុំទាន់កំណត់ថា តើជនល្មើសចោទថាជនរងគ្រោះជាអ្នកយកលាមកច្រកស្បោង រួចយកមកគប់លើម៉ូតូរបស់ខ្លួន ឬយ៉ាងណាទេ ទើបបានជាមកកាប់ជនរងគ្រោះយ៉ាងសហាវបែបនេះ? តែទោះបីជាយា៉ងណាអត្តសញ្ញាណជនល្មើសត្រូវបានស្គាល់អស់ហើយ ដែលសមត្ថកិច្ចកំពុងតាមប្រមាញ់ ៕
ចែករំលែកព័តមាននេះ