រាជធានីភ្នំពេញ ៖ ក្មេងវ័យជំទង់មានមុខរបរអ្នករើសអេតចាយម្នាក់ កាលពីម៉ោង១០និង៤០នាទីយប់ ថ្ងៃទី២៩ ធ្នូ ត្រូវរថយន្តបុកស្លាប់នៅចំណុចមុខវិមានសន្តិភាព តាមបណ្តោយមហាវិថីសហព័ន្ធរុស្ស៊ីស្ថិតក្នុងសង្កាត់មិត្តភាព ខណ្ឌ៧មករា រាជធានីភ្នំពេញ ។ ក្មេងវ័យជំទង់រងគ្រោះឈ្មោះស៊ិន សីលា ភេទប្រុស អាយុ១២ឆ្នាំ មុខរបរអ្នកដើររើសអេតចាយ ស្នាក់នៅផ្ទះជួលភូមិសែនសុខ សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ ។
ប្រភពព័ត៌មានកន្លែងកើតហេតុបានឱ្យដឹងថា នៅវេលាម៉ោងខាងលើយុវជនជំទង់ឈ្មោះស៊ិន សីលា បានជិះកង់កញ្ចាស់១គ្រឿង ម្នាក់ឯងហើយឪពុកអូសរ៉ឺម៉កតាមពីក្រោយចេញដំណើរពីកើតទៅលិចតាមបណ្តោយមហាវិថីសហព័ន្ធរស្ស៊ី ក្នុងគោលបំណងទៅផ្ទះជួលនៅភូមិសែនសុខវិញ ។ លុះដល់មុខវិមានសន្តិភាពជាប់ទីស្តីការគណៈរដ្ឋមន្ត្រីទំនងឃើញមានកំប៉ុងអេតចាយ ដែលគេចោលនៅផ្លូវម្ខាង យុវជនវ័យជំទង់រូបនោះបានជិះកង់ឆ្លងកាត់ផ្លូវ ដើម្បីទៅរើសអេតចាយនោះ ខណៈពេលឆ្លងផុតគំនូសផ្លូវស្រាប់តែមានរថយន្តឡិចស៊ីស RX300 មួយគ្រឿង ដែលសាក្សីបានឃើញ ពាក់ស្លាកលេខ ភ្នំេពញ2Q-0161 បើកយ៉ាងលឿនពីទិសខាងលិចបញ្ច្រាសទិសគ្នាទៅបុកយុវជនរើសអេតចាយចំពេញទំហឹងទាំងកង់ ទាំងមនុស្សប៉ើងជាង២០ម៉ែត្រ បណ្តាលឱ្យស្លាប់នៅពេលទៅដល់មន្ទីរពេទ្យកាល់ម៉ែត ។
ក្រោយពីរថយន្តបុកស្លាប់សពយុវជនវ័យជំទង់ឈ្មោះស៊ិន សីលា ត្រូវបានឪពុកម្តាយដឹកទៅតម្កល់ទុកនៅឈាបនដ្ឋានវត្តទឹកថ្លា ដើម្បីធ្វើបុណ្យបូជា ។ ប៉ុន្តែអ្វីដែលគួរឱ្យសង្វេគនោះត្រង់ថា ឪពុក និងម្តាយគ្មានប្រាក់សម្រាប់ធ្វើបុណ្យបូជាកូនទេ គឺមានតែទឹកភ្នែក និងបានប្រគល់ទៅអាចារ្យភ្លុកចាត់ចែងតាមរបៀបរបបនៅទីប៉ាឆានោះទៅ ។ ករណីខាងលើនេះ សមត្ថកិច្ចនគរបាលជំនាញវាស់វែង ខណ្ឌ៧មករា បានពិនិត្យកន្លែងកើតហេតុ និងបានធ្វើការវាយតម្លៃបានឱ្យឃើញថា យុវជនរងគ្រោះពិតជាឆ្លងកាត់ខុសច្បាប់ចរាចរណ៍ហើយបណ្តាលឱ្យរថយន្តបុកស្លាប់ ។ តែអ្នកបើកបរក៏មានកំហុសដែរ ពេលបុកមនុស្សស្លាប់ហើយបើកគេចខ្លួន សូម្បីមានអ្នករត់ម៉ូតូឌុបដេញតាមឃាត់ក៏មិនឈប់ដែរ ។
សរុបមកវិញ នគរបាលជំនាញផ្នែកសណ្តាប់ធ្នាប់ចរាចរខណ្ឌ៧មករា សំណូមពរឱ្យអ្នកបើកបររថយន្តបុកជនរងគ្រោះស្លាប់ ដូចភិនភាគសាក្សីបានបញ្ជាក់ខាងលើឱ្យចូលទៅដោះស្រាយជាមួយភាគីម្ខាងទៀត ចៀសវាងកុំឱ្យសមត្ថកិច្ចធ្វើលិខិតកោះហៅនាំខាតពេលវេលា ។ នគរបាលខណ្ឌ៧មករា បានអះអាងថា អ្នកបើកបររថយន្តមិនខុសទេ តែយោងតាមការស្លាប់បាត់បង់ជីវិតយុវជនជំទង់រើសអេតចាយពាក់ព័ន្ធនឹងអ្នកបើកបររថយន្តនោះគួរតែចូលខ្លួនដោះស្រាយគ្នាទៅ ម្យ៉ាងទៀតក៏ត្រូវមានមនុស្សធម៌ដល់ជនរងគ្រោះដែរ អាណិតជីវិតជនក្រីក្រផង ដែលជីវិតអ្នករើសអេតចាយគ្មានប្រាក់១រៀលសោះនោះ ។ បើសិនជាចង់គេចវេសក៏មិនអាចគេចបានឡើយ ព្រោះសមត្ថកិច្ចបានស្គាល់អត្តសញ្ញាណអ្នកបើកបរនោះអស់ហើយ ៕ ប៊ុនណាក់
ចែករំលែកព័តមាននេះ