លទ្ធផលប្រកួតប្រដាល់នៅលើរេញបាយ័ន-TV5
ដោយ ៖ឈិត គឹមឆុន
ថ្ងៃអង្គារ ទី១ ខែមិថុនា ឆ្នាំ២០១០ ម៉ោង ១៣:៣៩
កោះសន្តិភាព
លោកអាជ្ញាកណ្ដាលលើកដៃ ជ័យ កុសល ឈ្នះ ពេជ្រ សីហា លើកទី២នៅរេញបាយ័ន
រាជធានីភ្នំពេញ ៖ ក្នុងការប្រកួតសង សឹកនៅលើសង្វៀនស្ថានីយទូរទស្សន៍បាយ័ន កាលពីរសៀលថ្ងៃអាទិត្យ ទី៣០ ឧសភា កន្លងមកនេះ ពេជ្រ សីហា មកពីក្លឹបក្រសួងការពារជាតិ ត្រូវចាញ់ពិន្ទុជ័យ កុសល មកពី ក្លឹបព្រះខ័នរាជ្យម្ដងទៀត ។ ការជួបប្រកួត ទាំង៥ទឹកនោះ គឺពោរពេញទៅដោយភាព ស្វិតស្វាញខ្លាំងណាស់ ។ ផ្ទៃមុខរបស់អ្នកទាំង ២ ត្រូវទទួលរងនូវការវាយប្រហារដូចគ្នាជ័យ កុសល ត្រូវកណ្ដាប់ដៃរបស់សីហា ហើយសីហាក៏ត្រូវនឹងកែងរបស់កុសលដែរ ។ នៅទឹកទី៣ ជ័យ កុសល ត្រូវសីហា ដាល់ ត្រូវបណ្ដាលឱ្យប៉ោងក្រោមភ្នែកខាងស្ដាំ ប៉ុន្ដែចូលទឹកទី៤ ក៏ត្រូវកុសលវាយកែង បណ្ដាលឱ្យបែកចិញ្ចើមឆ្វេងវិញដែរ ។
គូនេះ ពិតជាស័ក្ដិសមជាគូសងសឹក ព្រោះអ្នកទាំង២ប្រកួតគ្នាមិនប្រណី និងមិនសន្សំកំលាំងទេ ។ គួររំលឹកថា កាលពីថ្ងៃទី២៥ មេសា កន្លង មក ពេជ្រ សីហា ធ្លាប់ប្រកួតចាញ់ពិន្ទុជ័យ កុសល ម្ដងរួចមកហើយនៅលើសង្វៀន ស្ថានីយទូរទស្សន៍ប៉ុសិ៍្ដលេខ៥ លុះពេលប្រកួត សងសឹកនៅសង្វៀនស្ថានីយទូរទស្សន៍បាយ័ននេះ គេត្រូវចាញ់ពិន្ទុម្ដងទៀត ។ ការចាញ់ លើកទី១ ហាក់ដូចជាស្ថិតក្នុងភាពប្រដំ ប្រសង ប៉ុន្ដែលើកនេះជ័យ កុសល មាន ប្រៀបដាច់តែម្ដង ។ ក្នុងនាមជាសិស្សច្បង ជ័យ កុសល មិនចុះញ៉មជាមួយសិស្សប្អូនទេ។
មានកីឡាករប្រដាល់ជើងថ្មីចំនួន៤គូ ទៀត ដែលត្រូវប្រកួតជំរុះឈានទៅដណ្ដើម ប្រាក់លានពីក្រុមហ៊ុនជីប ម៉ុង ដែលជាលទ្ធ ផល គឺគីន សំបូរ មកពីក្លឹប៧មករាអមតៈ បានយកឈ្នះពិន្ទុ សុខ វន មកពីក្លឹបកងរាជ អាវុធហត្ថខេត្ដកំពង់ស្ពឺ ។ គូនេះភាគច្រើន គេប្រើដៃដាល់គ្នាដូចវាយសាកលដែរ ។ នៅ ទឹកទី៣ សុខ វន ត្រូវអាជ្ញាកណ្ដាលរាប់៨ម្ដង ដោយសាររងនឹងកណ្ដាប់ដៃរបស់សំបូរច្រើនពេក ។ នៅទឹកទី៤ សុខ វន បានប្ដូរកែង វាយត្រូវក្រោមភ្នែកស្ដាំរបស់សំបូរបណ្ដាលឱ្យមានរបួស តែមិនធ្ងន់ធ្ងរទេ ចប់ការប្រកួត គីន សំបូរ ជាអ្នកឈ្នះដោយពិន្ទុ ។
សល់ ប៊ុនហូវ មកពីក្លឹបអាស៊ីកីឡា ប្រកួតឈ្នះពិន្ទុជាតិ សុខខេង មកពីក្លឹបបាក់ ខែងកីឡា ។ ចាប់ផ្ដើមភ្លាម ប៊ុនហូវ ប្រើ ស្នៀតជង្គង់ចូលវាយលុករហូតពេលខ្លះធ្វើឱ្យ សុខខេង ខ្លាចរអាយ៉ាងខ្លាំង ។ សុខខេង ព្យាយាមប្រើកណ្ដាប់ដៃវាយបកវិញដែរ ប៉ុន្ដែគេហាក់ដូចជាខ្លាចជង្គង់ប៊ុនហូវ ។ពូន សុវណ្ណគិរី មកពីក្លឹបនិរោធមានជ័យ ប្រើជង្គង់ផ្ដួលឈិន លន់ មកពីក្លឹបរស្មីកុមារ កំព្រាឱ្យសន្លប់ក្នុងទឹកទី២ ។ រីឯមាស សារិទ្ធ មកពីក្លឹបប្រដាល់ក្រុងប៉ោយប៉ែត ប្រើ កណ្ដាប់ដៃផ្ដួលពុទ្ធ សំប៊ុនតាត មកពីក្លឹបពុទ្ធ សេរីវង្សព្រែកតាទែន ឱ្យសន្លប់ក្នុងទឹកទី១។ចំពោះអ្នកប្រដាល់ទាំង៤គូខាងលើនេះ សំរាប់អ្នកឈ្នះមានគីន សំបូរ, សល់ ប៊ុនហូវ, ពូន សុវណ្ណគិរី និងមាស សារិទ្ធ ត្រូវត្រៀម ទៅប្រកួតដណ្ដើមប្រាក់លានពីក្រុមហ៊ុនជីប ម៉ុង នៅ២សបា្ដហ៍ក្រោយទៀត ។
នៅលើសង្វៀនប្រដាល់ស្ថានីយទូរទស្សន៍ប៉ុសិ៍្ដលេខ៥ នារសៀលថ្ងៃទី៣០ ឧសភា នេះដែរ សួង សុវណ្ណថា មកពីក្លឹបក្រសួងការ ពារជាតិប្រកួតឈ្នះពិន្ទុ រឿង សោភ័ណ្ឌ មកពី ក្លឹប ខេមរៈកីឡា ។ រឿង សោភ័ណ្ឌ ដែល មួយរយៈចុងក្រោយនេះ មិនធ្លាប់ចាញ់សោះ នោះនៅពេលប៉ះជាមួយសួង សវុណ្ណថា គេ នៅតែខ្លាំង ប៉ុន្ដែអាស្រ័យដោយសុវណ្ណថា ជារៀមច្បង និងជាជើងខ្លាំង១រូបដែរ ទើប សោភ័ណ្ឌ មិនអាចយកឈ្នះបាន ។ នៅ ទឹកទី៥ ក្រោមភ្នែកខាងឆ្វេងរបស់សោភ័ណ្ឌ មានបញ្ហាដោយសារស្នៀតកែងរបស់សួង សុវណ្ណថា ទោះបីជាយ៉ាងណា ការប្រកួតបាន បន្ដដល់ទីបញ្ចប់ ហើយសុវណ្ណថា ឈ្នះដោយ ពិន្ទុ ។
សុខ សុវណ្ណ មកពីក្លឹបប្រដាល់ខេត្ដកោះ កុង ប្រកួតឈ្នះពិន្ទុ យស់ សំអាល់ មកពីក្លឹប ឃ្លាំងមឿងកីឡា។ កាលពីពេលផ្គូផ្គងគូ នេះ សុខ សុវណ្ណ ត្រូវប្រកួតជាមួយសឺន ចាន់ វិរៈ មកពីក្លឹបសិង្ហកីឡា ប៉ុន្ដែដោយសារ បញ្ហាសុខភាព ទើបយកយស់ សំអាល់ មក ជំនួសវិញ ។ ក្នុងការប្រកួតទាំង៥ទឹកនោះ សុខ សុវណ្ណ មិនមែនឈ្នះសំអាល់ដោយ ស្រួលនោះទេ។ សរ សី មកពីក្លឹបអេភូថងកីឡា ប្រកួត ឈ្នះពិន្ទុសៅ ប៊ុននឿន មកពីក្លឹបក្រសួង មហាផ្ទៃ ។ ចំណុចខ្សោយដែលជាបញ្ហា សំរាប់ប៊ុននឿន គឺបញ្ហាកំលាំង ខណៈដែល សរ សី មានថាមពលពេញសំរាប់ការប្រកួត ទាំង៥ទឹក ។
ប៊ុននឿន មានឱកាសតដៃជា មួយសរ សី បានតែ៣ទឹកប៉ុណ្ណោះ លុះចាប់ពី ទឹកទី៤ទៅ*គេស្ទើរតែក្លាយជាបាវសាក់ ជា ពិសេសនៅទឹកទី៥ សៅ*ប៊ុននឿន ត្រូវអាជ្ញា កណ្ដាលរាប់ដល់៨ ដោយសាររងនឹងការ ដាល់របស់សរ សី ។ ជា ឆៃយ៉ា មកពីក្លឹបខេមរិន្ទមានឫទ្ធិ ប្រើ ជង្គង់ផ្ដួលនួន លីម មកពីក្លឹបតាឡីដំរីមាន ឫទ្ធិ ឱ្យសន្លប់ក្នុងទឹកទី៣ ។ រីឯការប្រកួត ជាលក្ខណៈសាកលវិញឡុង ឡាំដា មកពីក្លឹប សាលវ័ន្ដកីឡា ប្រកួតឈ្នះពិន្ទុ ចាន់ វិបុល មកពីក្លឹបក្រសួងមហាផ្ទៃ ៕
